23 ޖެނުއަރީ 2019 - 12:07
ލާމަރުކަޒީ ގާނޫނު އިސްލާހު ކުރުމަށް އެޓާނީ ޖެނެރަލް އޮފީހުން އާންމުންގެ ހިޔާލު ހޯދަން ފަށައިފި އެވެ.
ލޯކަލް ކައުންސިލްތައް ބާރުވެރިކުރުވުމުގެ ބޭނުމުގައި ހެދި ލާމަރުކަޒީ ގާނޫނަށް ބޮޑެތި އިސްލާހުތަކެއް ގެނައުމަކީ ސަރުކާރުގެ ފުރަތަމަ 100 ދުވަހުގެ އެޖެންޑާގެ ތެރޭގައި ހިމެނޭ ވައުދެކެވެ. ލާމަރުކަޒީ ގާނޫނުގެ އިތުރުން، އެހެން ބައެއް ގާނޫނުތައް އިސްލާހުކުރަން ވެސް ސަރުކާރުން ވައުދުވެފައިވެ އެވެ.
އެޓާނީ ޖެނެރަލް އޮފީހުން މިއަދު ނެރުނު ބަޔާނުގައި ބުނީ ރައްޔިތުންގެ މަޖިލީހަށް ބިލް ފޮނުވުމުގެ ކުރިން ކަމާބެހޭ ފަރާތްތަކާ މަޝްވަރާ ކުރުމާއި އާންމުންގެ ހިޔާލު ހޯދުން މުހިންމު ކަމަށެވެ.
އެހެންވެ، އެ ގާނޫނަށް އިސްލާހު ހުށަހެޅުމުގެ ފުރުސަތު އޮންލައިންކޮށް ވަނީ ހުޅުވައިލައިފަ އެވެ. އެޓާނީ ޖެނެރަލް އޮފީހުން ބުނި ގޮތުގައި ހިޔާލު ހޯދުމުގެ ފުރުސަތު ފެބްރުއަރީ 3ގެ ނިޔަލަށް އޮންނާނެ އެވެ.
އެޓާނާ ޖެނެރަލް އޮފީހުން ބުނީ ލާމަރުކަޒީ ގާނޫނު އިސްލާހު ކުރުމަށްޓަކައި މިހާތަނަށް ސަރުކާރުގެ ވުޒާރާތަކާއި މިނިވަން މުއައްސަސާތަކާއި މަދަނީ ޖަމިއްޔާތަކުގެ އިސް ބޭފުޅުންނާ ބައްދަލުކުރައްވައި، އެބޭފުޅުންގެ ހިޔާލު ހޯދާފައިވާ ކަމަށެވެ. އަދި ކައުންސިލްތަކުން ހުށަހަޅަން ބޭނުންވާ ހިޔާލުތަކާއި ލިޔުންތައް ހުށަހެޅުމުގެ ފުރުސަތު ވެސް ހުޅުވާލާފައިވާ ކަމަށް ވެސް އެ އޮފީހުން ބުންޏެވެ.
އެޓާނީ ޖެނެރަލް އޮފީހުން ބުނީ ރާއްޖޭގެ ރަށްރަށަށް ޒިޔާރަތްކޮށް، ކަމާބެހޭ ފަރާތްތަކާ ބަދަލުކޮށް، ހިޔާލު ހޯދުމުގެ މަސައްކަތް އޮފީހުން ކުރަމުން އަންނަ ކަމަށެވެ. ލާމަރުކަޒީ ގާނޫނު އިސްލާހު ކުރުމުގެ މަސައްކަތް ކުރަނީ ޔޫއެންޑީޕީގެ އެހީތެރިކަމާއެކު، ރައީސް އޮފީހާއި ހޯމް މިނިސްޓްރީ އާއި އެލްޖީއޭ ގުޅިގެންނެވެ.