22 ޖެނުއަރީ 2019 - 14:41
ކާބުލް (ޖެނުއަރީ 22) - ވެރިރަށް ކާބުލްގެ ހުޅަނގު ދެކުނުން 44 ކިލޯ މީޓަރު ދުރުގައި އޮންނަ އަސްކަރީ މަރުކަޒަކަށް ތާލިބާނުން ދިން ހަމަލާއެއްގައި އަފްޣާނިސްތާނުގެ ސަލާމަތީ ފަރާތްތަކުގެ 100 އަށް ވުރެ ގިނަ މީހުން މަރުވެއްޖެ އެވެ.
ޕްރޮވިންޝަލް ކައުންސިލް މެންބަރު ނަފީސާ ސެލައި ވާޑަކް ވިދާޅުވީ ހަމަލާގައި 126 މީހުން މަރުވެފައިވާ ކަމަށެވެ. ހަމަލާގައި ޒަޚަމްވި މީހުންނަށް ދަނީ ޕްރޮވިންސްގެ ހޮސްޕިޓަލްތަކުގައި ފަރުވާ ދެމުންނެވެ.
މިއީ އަފްޣާނިސްތާނުގެ 17 އަހަރުގެ ހަނގުރާމައިގައި އެއް ހަމަލާގައި އެންމެ ގިނަ މީހުން މަރުވި ފަހަރެވެ.
ފަހަކަށް އައިސް އަފްޣާނިސްތާނުގައި ތާލިބާނުން ދޭ ހަމަލާތައް ވަނީ އިތުރުކޮށްފަ އެވެ. އެމެރިކާގެ ސްޕެޝަލް އިންސްޕެކްޓާ ޖެނެރަލް ފޯ އަފްޣާނިސްތާން ރިކޮންސްޓްރަކްޝަންގެ ޑޭޓާ ދައްކާ ގޮތުން އަފްޣާނިސްތާނުގެ ދެބައިކުޅަ އެއްބައި ކޮންޓްރޯލް ކުރަނީ ތާލިބާނުންނެވެ.
މިދިޔަ ޖުލައި ފަހުން ފެށިގެން އެމެރިކާ އިން ދަނީ ތާލިބާނުންނާ އެކު ސުލްހައިގެ ވާހަކަތައް ފެށޭތޯ މަސައްކަތް ކުރަމުންނެވެ. ތާލިބާނުން ދަނީ އަފްޣާން ސަރުކާރުގެ އޮފިޝަލުންނާ ބައްދަލު ކުރަން ދެކޮޅު ހަދަމުންނެވެ.