17 ޖެނުއަރީ 2019 - 12:15
ހުޅުމާލޭގައި އަމިއްލަ ފަރާތަކުން ހެދި ޕްރީސްކޫލް އެޑިއުކޭޝަން މިނިސްޓްރީއާ މިއަދު ހަވާލުކޮށްފި އެވެ.
އޯޓިޒަމް ސެންޓަރު ކައިރީގައި ހުންނަ 10 ކްލާސްރޫމުގެ ޕްރީ ސްކޫލް ހަވާލުކުރުމުގެ އެއްބަސްވުމުގައި އެޑިއުކޭޝަން މިނިސްޓަރު ޑރ. އައިޝަތު އަލީ އަދި އެޗްޑީސީގެ މެނޭޖިން ޑިރެކްޓަރު ސުހެއިލް އަހުމަދު ވަނީ ސޮއިކުރައްވައިފަ އެވެ.
މިނިސްޓަރު ވިދާޅުވީ އެ ޕްރީ ސްކޫލް ހަވާލުކުރުމަކީ ވަރަށް ބޮޑު އުފަލެއް ކަމަށާއި އެތަނުން ހުޅުމާލޭގައި ދިރިއުޅޭ ދަރިވަރުންނަށް ރަނގަޅު ހިދުމަތެއް ދެވޭނެ ކަމަށެވެ. އަދި އެތަން ބަޔަކާ ހަވާލުކޮށް ޖޫން/ޖުލައި ހިސާބުގައި ޕްރީ ސްކޫލުގައި އިންޓަނޭޝަނަލް ފެންވަރަށް ކިޔަވައިދޭން ފެށޭނެ ކަމަށް މިނިސްޓްރީން ބުންޏެވެ.
ހުޅުމާލޭގައި މިވަގުތު ހިންގަނީ އެންމެ ޕްރީ ސްކޫލެކެވެ. އެއީ އަމިއްލަ ފަރާތަކުން ހިންގާ ތަނެކެވެ. އޭގެ އިތުރުން ސަރުކާރު ސްކޫލުތަކުގައި ޕްރީ ސްކޫލަށް ކިޔަވައިދެ އެވެ.
ކޮމްޕިއުޓާ ރޫމާއި ހޯލަކާއި ސްޓާފް ރޫމެއް ވެސް ހުންނަ ޕްރީ ސްކޫލު މީގެ ކުރިން ބޭނުންކުރީ ރިޔާސީ އިންތިޚާބުގައި ކުރީގެ ރައީސް އަބްދުﷲ ޔާމީންގެ ކެމްޕެއިން ޖަގަހައެއްގެ ގޮތުގަ އެވެ.