15 ޖެނުއަރީ 2019 - 05:55
ސަލްމާން ހާންގެ ކުރިއަށް އޮތް ފިލްމު "ބާރަތު" ގައި ވެސް މުހިއްމު ރޯލެއް ކުޅޭ ބަތަލާ ޑިޝާ ޕަޓްނީ، ސަލްމާނުގެ ފިލްމު "ކިކް 2" ގެ ބަތަލާގެ ރޯލަށް ވެސް ސޮއިކޮށްފި އެވެ.
ބޮލީވުޑް ލައިފުން ބުނި ގޮތުގައި ޕްރޮޑިއުސަރު ސާޖިދު ނަދިއަދްވާލާ 2014 ގައި ޑައިރެކްޝަނަށް ނުކުތް ފިލްމުގެ ދެވަނަ ބައި ޑިޝާ އަށް ހުށަހެޅީ ސަލްމާންގެ އެދުމުގެ މަތިންނެވެ. އަދި "ބާރަތު" ގެ މަސައްކަތުގައި ޒުވާން ބަތަލާ ދައްކަމުން އަންނަ ހުނަރު ސަލްމާނަށް ވަރަށް ކަމުގޮސްފައިވާ ކަމަށްވެ އެވެ.
ޑިޝާއަކީ އެކްޓަރު ޓައިގާ ޝްރޮފްގެ ލޯބިވެރިޔާ އެވެ. މިދިޔަ އަހަރު އެ ދެ މީހުން އެކުގައި ކުޅުނު "ބާގީ 2" އަކީ ވެސް ސާޖިދު ޕްރޮޑިއުސްކޮށްފައިވާ ފިލްމެކެވެ.
"ކިކް 2" އަށް ޑިޝާ ސޮއިކުރި ކަމަށް މީޑިއާތަކުން ބުނަމުން ދިޔަ ނަމަވެސް ސަލްމާނާއި ސާޖިދު އަދި ޑިޗާ ވެސް މިކަން ކަށަވަރެއް ނުކޮށްދެ އެވެ. ރިޕޯޓްތައް ބުނާ ގޮތުން "ކިކް 2" ގެ ޝޫޓިން މި އަހަރުގެ ފަހުކޮޅު ފަށަން ވަނީ ނިންމައިފަ އެވެ. އަދި ފިލްމު ސިނަމާތަކަށް އަންނާނީ އަންނަ އަހަރު އެވެ.
"ކިކް" ގައި ސަލްމާނާ އެކު ބަތަލާގެ ރޯލް ކުޅެފައި ވަނީ ޖެކްލިން ފެނަންޑޭޒެވެ. ސަލްމާންގެ އެހެން ފްރެންޗައިޒެއް ކަމަށްވާ "ދަބަންގް 3" ގެ ޝޫޓިން އަންނަ އެޕްރީލް މަހުގެ ތެރޭގައި ފަށަން މިހާރު އަންނަނީ ތައްޔާރީތައްވަމުންނެވެ.
ސަލްމާނާ އެކު ޑިޝާ ފެނިގެންދާ ފުރަތަމަ ފިލްމު "ބާރަތު" ސިނަމާތަކަށް އަންނާނީ ޖޫން 5 ގަ އެވެ.