05 ޖެނުއަރީ 2019 - 15:22
ޖެނީވާ (ޖެނުއަަރީ 5) - ނޫސްވެރިޔާ ޖަމާލް ޚާޝުގްޖީ މަރާލި ކަމަށް ތުހުމަތު ކުރެވޭ މީހުންގެ މައްޗަށް ސައުދީ އަރަބިއާގައި ހިންގާ ޝަރީއަތާ މެދު އދ.ގެ ހިއުމަން ރައިޓްސް އޮފީހުން ސުވާލު އުފައްދައިފި އެވެ.
އދ.ގެ އިންސާނީ ހައްގުތަކާ ބެހޭ އޮފީހުގެ ތަރުޖަމާން ރަވީނާ ޝަމްދަސާނީ ވިދާޅުވީ އދ. އިން ބާރު އަޅަނީ ބައިނަލްއަގުވާމީ ފަރާތްތަކުގެ ބައިވެރިވުމާ އެކު ވަކި ފަރާތަކަށް ނުޖެހޭ ތަހުގީގެއް ހިންގަން ކަމަށެވެ.
އދ. އިން މި ގޮތަށް ބުނެފައި ވަނީ ތުރުކީގެ އިސްތަންބޫލްގައި ހުންނަ ސައުދީ ކޮންސިއުލޭޓް ތެރޭ އޮކްޓޯބަރު 2 ވަނަ ދުވަހު ޚާޝުގްޖީ މަރާލި ކަމަށް ތުހުމަތު ކުރެވޭ 11 މީހުންގެ ޝަރީއަތް ސައުދީން ބުރާސްފަތި ދުވަހު ފަށާފައި ވަނިކޮށެވެ. ސައުދީ ޕްރޮސެކިއުޓަރު ޖެނެރަލް މަސައްކަތް ކުރައްވަނީ އެ 11 މީހުންގެ މައްޗަށް މަރުގެ ހުކުމް އިއްވުމަށެވެ.
އދ. އިން ބުނެފައި ވަނީ އެ މީހުންގެ މައްޗަށް މަރުގެ ހުކުމް އިއްވަން ތާއީދު ނުކުރާ ކަމަށެވެ.
ޚާޝުގްޖީގެ މަރުގެ ތުހުމަތު ކުރެވޭ މީހުންގެ ޝަރީއަތް ހިންގުމަށް އެ މީހުން ތުރުކީއާ ހަވާލު ކުރުމަށް އެ ގައުމުން ވެސް ވަނީ ގޮވާލައިފަ އެވެ. ނަމަވެސް ސައުދީން ބުނެފައި ވަނީ އެ މީހުން ތުރުކީއާ ހަވާލު ނުކުރާނެ ކަމަށެވެ.
ތުރުކީން ބުނެފައި ވަނީ ޚާޝުގްޖީ މަރާލީ ސައުދީ އަރަބިއާ އިން ދިޔަ ޓީމަކުން ކަމަށެވެ. ސައުދީން އެކަމަށް ދެކޮޅު ހަދަމުން ގޮސް އެންމެ ފަހުން ވަނީ ކޮންސިއުލޭޓް ތެރޭ ނޫސްވެރިޔާ މަރާލީ ހިނގި ޒުވާބަކަށް ފަހު ކަމަށް އެއްބަސްވެފަ އެވެ.