01 ޖެނުއަރީ 2019 - 11:02
ކޮންމެ ކުޅިވަރެއްގައި ވެސް ތަރިން އުފެއްދުމަކީ އާދައިގެ ކަމެއް ނޫނެވެ. ހަގީގަތުގައި އެ ކުޅުންތެރިއެއްގެ ހުނަރު ތަރައްގީ ކުރުމުގެ މަސައްކަތް އެންމެ ކުރިން ކޮށްދޭ ކޯޗުން ހަވާލުވަނީ ވަރަށް ބޮޑު ޒިންމާއަކާ އެވެ. އެގޮތަށް އިނގިރޭސި ފުޓްބޯޅައިގައި 25 އަހަރު ހޭދަކުރި އެވަޓަން އާއި އިނގިރޭސި އެފްއޭގެ ކުރީގެ އެކެޑަމީ ކޯޗު ރޮބާޓް އެންޑަސަން (ރޮބީ) އަކީ ގިނަ ފުޓްބޯޅަ ތަރިންނެއް އުފެއްދި މީހެކެވެ. އެ ކުޅުންތެރިން އުމުރުން ހަ އަހަރުން ފެށިގެން ދުނިޔޭގެ ލެވެލް ތަރިންނާ ހަމައަށް ގެންގޮސްދިނުމުގެ ބިންގާ އެޅުމުގެ މޭސްތިރިއަކީ ރޮބީ އެވެ.
މީގެ ހަތް ވަރަކަށް އަހަރު ކުރިން ރޮބީ އެކެޑަމީގެ ކަންތައްތައް ފެށީ އޭނާއާ އެކު އެވަޓަންގައި މަސައްކަތްކުރި އޮސްޓްރޭލިއާގެ ފޯވާޑް ޓިމް ކެހިލްއާ އެކު އެވެ. މިހާތަނަށް ދުނިޔޭގެ އަށް ގައުމުގައި ކޭހިލްގެ ފޯ ސެވަންޓީން އެކެޑަމީގެ މަސައްކަތް ކޮށްފައިވާއިރު، މިހާރު އެ މަސައްކަތް ރާއްޖޭގެ ރިޒޯޓް ބ. އަމިއްލަފުއްޓާ އެކު ވެސް މި ވަނީ ފަށައިފަ އެވެ. ރާއްޖޭގެ ކުދިންނާއި ބޭރުގެ ކުދިން ހިމެނޭގޮތަށެވެ. ރާއްޖޭގެ ކޯޗުން ގޮވައިގެން މި ފެށުނު މަސައްކަތާ މެދު ރޮބީ ހުރީ ވަރަށް ހިތްހަމަޖެހިފަ އެވެ.
"އަހަންނަށް ގަބޫލުކުރެވޭގޮތުގައި ކުރެވޭ ތަޖުރިބާތަކުން އަބަދުވެސް ފިލާވަޅު ލިބޭނެ. އުނގަންނައިދިނުމާއި ދަސްކުރުން މިއީ ދުވަހަކު ވެސް ހުއްޓާލައިގެން ވާނެ ކަމެއް ނޫން. ފުޓްބޯޅަ އަކީ އެންމެނަށް އެނގޭ ބަހުރުވައެއް. މި ކުޅިވަރަށް ލޯބި އޮންނަ ކޮންމެ ބަޔެއް ވެސް ދެކެފަރިތަވާނެ،" ފުޓްބޯޅަ ކޯޗިންއާ ބެހޭގޮތުން ރޮބީ އޭނާ ދެކޭގޮތް "މިހާރަ"ށް ހިއްސާކުރި އެވެ.
ރޮބީގެ ވަނަވަރަށް ބަލާއިރު އޭނާ އަކީ ވޭން ރޫނީ އާއި ޑޭވިޑް ބެކަމް އަދި އެޑްވިން ވަންޑަސާ ފަދަ ތަރިންނާ އެކު މަސައްކަތްކުރި ކޯޗެކެވެ. އެވަޓަން އާއި އިނގިރޭސި އެފްއޭގައި އެކެޑަމީ ކޯޗެއްގެ ގޮތުގައި މަސައްކަތްކުރިއިރު، ދުނިޔޭގެ އެކި ގައުމުތަކުގައި އެކެޑަމީތައް ހިންގުމުގެ ގޮތާ ބެހޭގޮތުން ފިލާވަޅު ނަގައިިދިނެވެ.
އޭނާ ބުނީ ކުޅުންތެރިން އެންމެ ޅަ އުމުރުން ފެށިގެން ޕްރޮފެޝަނަލް ލެވެލަށް ގެންދިއުމުގައި ގިނަ މަސައްކަތްތަކެއް އެކި އުމުރުގައި ކުރަން ޖެހޭ ކަމަށާއި އެގޮތަށް އެކަން ކޮށްގެން ނޫނީ ދުނިޔޭގެ ފެންވަރު ތަރިން ނުއުފެއްދޭނެ ކަމަށެވެ.
"އުމުރުން ހައެއް ނޫނީ ފަސް އަހަރުން ފެށިގެން ފުޓްބޯޅަ އަކީ ދަސްކުރަން ޖެހޭ އެއްޗެއް. ހުނަރު ހަމައެކަނި ހުރުމަކީ ފުޓްބޯޅަ ކުޅެވޭނެ ސަބަބެއް ނޫން. ހުނަރު ތަރައްގީ ކުރުމުގެ މަސައްކަތް ޒުވާން އުމުރުގައި ފަށައިގެން ނޫނީ ދުރު މުސްތަގުބަލަކަށް އޭގެ ބޭނުމެއް ނުކުރެވޭނެ،" ރޮބީ ބުންޏެވެ.
"މިސާލަކަށް އަހަރެން ނަގާނީ ރޫނީ. އޭނާ އުމުރުން ހަ އަހަރުގައި އަހަރެން ގާތަށް އައިއިރު އެއީ ހަމައެކަނި ހުނަރެއް. ދުވަހުން ދުވަހަށް އޭނާ އައީ ހަމައެކަނި ދަނޑުމަތީގައި ކުޅޭ ކުޅުން ދަސްކުރަމުންނެއް ނޫން. ދަނޑުން ބޭރުގައި ޑިސިޕްލިންކޮށް އުޅުމާއި ޕްރޮފެޝަނަލް އުސޫލު ދެމެހެއްޓޭނެ ގޮތް ދަސްކުރި. ސޯޅާ އަހަރުގައި އެންމެން ހައިރާންކޮށްލި. އަހަރެމެން ދެއްކި މިސްރާބުން ގޮސް އޭނާ އަކީ މިހާރު ބޮޑު ގައުމެއްގެ ކުޅިވަރު ސަހުޝިއްޔަތެއް."
ރޮބީ ބުނީ އޭނާ އާއި ކޭހިލް އަކީ މުޅި ދުނިޔޭގެ އެކި ކަންކޮޅުތަކުގައި މި މަސައްކަތް ކުރަމުން އަންނަ ބައެއް ކަމަށާއި ދެ މީހުންގެ ފުޓްބޯޅަ ތަޖުރިބާ ގިނަ ބަޔަކާ ހިއްސާ ކުރުމަކީ ލިބޭ އެންމެ ބޮޑު އުފާ ކަމަށެވެ. އަދި ރާއްޖޭގައި ކުރިއަށްގެންދިޔަ ހަތަރު ދުވަހުގެ ކޭމްޕުން ފެނުނީ އުއްމީދީ މަންޒަރުތަކެއް ކަމަށް ވެސް ބުންޏެވެ
"ރާއްޖޭގެ ކުދިންނާއި ކޯޗުންނަށް އަހަރެމެންނަށް ގިނަ ކަންތައްތަކެއް ދަސްކޮށްދެވިއްޖެ. އެންމެ މުހިއްމު ކަމަކީ ކޯޗުން ތަމްރީން ކުރުން. އެއީ މި މަސައްކަތް ކުރުމުގައި ދެމި ތިބޭނެ ބަޔަކީ،" ތައިލެންޑް، އިންޑިއާ، އެމެރިކާ، އޮސްޓްރޭލިއާ. ކެނެޑާ އަދި އިންގްލެންޑްގައި އެކެޑަމީގެ ގިނަ މަސައްކަތްތަކެއް ކުރި ރޮބީ ބުންޏެވެ.
މުޅި ދުނިޔޭގެ ފުޓްބޯޅަ އަށް މި ވަގުތު ބަލާއިރު އެންމެ ގިނަ ގައުމުތަކުން މިހާރު ކުރާ މަސައްކަތަކީ ޒުވާން ހުނަރު ތަރައްގީ ކުރުމުގެ ކަންތައްތަކެވެ. އެންމެ ޅަ އުމުރުފުރާއިން ފެށިގެން ކުޅުންތެރިން މޮނިޓާކުރެވޭ ސިސްޓަމްތައް ގާއިމްކުރުމެވެ. ގްރާސްރޫޓްގެ ޕްލޭންތައް ކަނޑައަޅައި ކުރިއަށްދިއުމެވެ. ރޮބީ ބުނީ އެ ނޫން ގޮތަކަށް އެއްވެސް ގައުމެއްގެ ފުޓްބޯޅަ އަށް މުސްތަގުބަލެއް ނެތެވެ.
"ކުޅުންތެރިން އަމިއްލަ އަށް ކުރިއަރައިގެން ގޮސް ކާމިޔާބު ހޯދާނެ ކަމަށް ގަބޫލުކުރެވިގެން ނުވާނެ. ފުޓްބޯޅަ އަކީ ދަސްކޮށްދޭން ޖެހޭ އެއްޗެއް. ރަނގަޅު ކޯޗުން ތިބެ. ކުޅުންތެރިން ދާންވީ މިސްރާބު ދައްކައިދީގެން ނޫނީ ދާން ބޭނުންވާ މަންޒިލަށް ނުދެވޭނެ،" އޭނާ ބުންޏެވެ.
ދުނިޔޭގެ ލެވެލަށް ބަލާއިރު ކުދި ގައުމުތަކަށް ނިސްބަތްވާ ކުޅުންތެރިން އަންނަނީ މަޝްހޫރު ބޮޑެތި ލީގުތަކުގައި ކުޅެމުންނެވެ. ރޮބީ ބުނީ އެ ކުޅުންތެރިންނަށް އެ ހިސާބަށް ދެވުނީ ވަރަށް ގިނަ މަސައްކަތްތަކެއް އެކި ލެވެލްގައި ކޮށްގެން ކަމަށާއި ރަނގަޅު ކޯޗުން ދިން އިރުޝާދު ކަނުލައި އަނޑުއަހައިގެން ކަމަށެވެ.
"އަހަންނަށް ފެނިިއްޖެ ރާއްޖޭގެ ޒުވާން ކުދިންގެ މެދުގައި ފުޓްބޯޅަ އަށް އޮތް ލޯބި. މި ރިޒޯޓަށް އެކަނި ބަލާލިޔަސް ފެނޭ މިތަނުގެ މުވައްޒަފުން ވެސް ފުޓްބޯޅަ ކުޅޭ މަންޒަރު. ޔަގީންކޮށް ބުނަން އެނގޭ ކަމަކީ ހުނަރު އެބައޮތްކަން. އެކަމަކު މި ހުނަރު ތަރައްގީ ކުރަން ފަށަންވީ ޅަ އުމުރުގައި އެ ނޫނީ ބޭނުންވާ ކަންތައްތައް ނުވާނެ. އަހަރެމެން މުޅި ދުނިޔޭގައި މި މަސައްކަތުގެ މުހިއްމުކަން ބުނެދެވޭތޯ މި އުޅެނީ.=،" ރޮބީ ބުންޏެވެ.
"ކިހިނެއް އެނގެނީ މުސްތަގުބަލުގައި މަޝްހޫރު ލީގެއްގައި ކުޅޭނެ ކުޅުންތެރިއެއް ރާއްޖޭގައި ވެސް ހުރެދާނެ. އެ ފަދަ ކުޅުންތެރިން ވީހާ އަވަހަކަށް ހޯދާ އެ ކުޅުންތެރިންގެ ހުނަރުގެ ބޭނުންކުރަން އުޅެންވީ."
ފުޓްބޯޅައިގައި ގިނަ ބަޔަކު ބަލަނީ ނެރޭ ނަތީޖާ އަށެވެ. އެކަމަކު އެ ނަތީޖާތައް އެ ގޮތަށް ނުކުންނަން މެދުވެރިވާ ސަބަބުތަކަށް ބައިވަރެވެ. ގްރާސްރޫޓް މަސައްކަތްތައް ހަރުދަނާ ކުރުމަކީ ފުޓްބޯޅައިގެ އެންމެ މުހިއްމު އެއް މަސައްކަތެވެ. އަދި ފެންވަރު ރަނގަޅު ލީގެއް އޮވެ، ކުޅުންތެރިން އުފެދުން ރަނގަޅު ސިސްޓަމެއްގެ ތެރެއިން އޮތުމަކީ މުސްތަގުބަލު އުޖާލާވުން ކަމަށް ރޮބީ ގަބޫލުކުރެ އެވެ.
"މިސާލަކަށް ބަލަމާ އެމްއެލްއެސް (އެމެރިކާ ލީގު). ދުނިޔޭގެ ބޮޑު ގައުމެއް އެމެރިކާ އަކީ މީގެ 10 އަހަރު ކުރިން އެމްއެލްއެސްގައި ފޯރިއެއް ނެތް. ގިނަ ބަޔަކު ޝައުގުވެރިވާ ކުޅިވަރެއް ނޫން. ދެން ބަލަމާ އިންޑިއާ. ކްރިކެޓްގެ ގައުމެއް. މާ ބޮޑު ލީގެއް ވެސް ނެތް. އެކަމަކު މި ތަންތަނުގައި ބޮޑު ލީގެއް ފެށި. ކުޅުންތެރިން އުފެއްދޭނެ ގިނަ އެކެޑަމީތަކެއް ގާއިމްކުރެވެން ފެށުމުން މިހާރު ފުޓްބޯޅައިގެ ވަރުގަދަ ދެ ގައުމަށް އެމެރިކާ އާއި އިންޑިއާ ވެއްޖެ. އެ ދެ ގައުމަކީ ފުޓްބޯޅައިގައި އަހަންނަށް ފެންނަ ދެ މިސާލު،" ރޮބީ ބުންޏެވެ.
އޭނާ ބުނީ ގައުމަކަށް ފުޓްބޯޅައިން ދެވޭނެ ހިސާބެއް ކަނޑައަޅާނީ ގައުމުގެ ބޮޑުމިން ނޫނީ އާބާދީ އަށް ބަލައިގެން ނޫން ކަމަށާއި ފުޓްބޯޅަ ކުރިއަރުވަން ކުރާ މަސައްކަތުން ކަމަށެވެ. ރަނގަޅު މަސައްކަތްތަކެއް ކުރުމުގެ މަތީ ސާބިތުވެ ހުރެފިނަމަ ފުޓްބޯޅައިގައި ހާސިލްކުރެވޭނެ ކަންތައްތަކުގެ ކޮޅެއް ނެތް ކަމަށް ރޮބީ ގަބޫލުކުރެ އެވެ. ރާއްޖެއާ މެދު ވެސް ރޮބީގެ އުއްމީދުތައް ހުރީ އެގޮތަށެވެ. އެއީ ފުޓްބޯޅަ ކުރިއެރުވުމަށް އޭނާ ދެކޭ ހުވަފެންތައް އިންތިހާއަށް ގިނަކަމުންނެވެ.