19 ޑިސެމްބަރ 2018 - 14:56
ރާއްޖޭގައި އުފެދުނު އެންމެ މޮޅު ގޯލްކީޕަރު އިމްރާން މުހައްމަދު ގައުމީ ޓީމަށް ކުޅުން ހުއްޓާލުމުގެ ގޮތުން ކުޅޭ ހާއްސަ ފުޓްބޯޅަ މެޗުގައި އޭނާގެ ޓީމަށް ކޯޗުކޮށްދޭން، އޭނާ އަށް ގައުމީ ޓީމުން އެންމެ ފުރަތަމަ ފުރުސަތު ދިން ބަލްގޭރިއާގެ ޔޮރްދާން ސްޓޮއިކޯފް އިވަނޯފް ގެންނަ ގޮތަށް ހަމަޖެހިއްޖެ އެވެ.
މޯލްޑިވްސްފުޓްބޯލް ޑޮޓް ކޮމް އާއި އެފްއޭއެމް ގުޅިގެން ކޮންމެ އަހަރަކު ބާއްވާ މޯލްޑިވްސް ފުޓްބޯލް އެވޯޑްސްގެ މި އަހަރުގެ ހަފުލާގެ ބަޔެއްގެ ގޮތުގައި ކުޅޭ މި މެޗު އޮންނާނީ މި މަހުގެ 29 ވަނަ ދުވަހުގެރޭ ގަލޮޅު ދަނޑުގަ އެވެ. "އިއްމަ 11" ގެ ނަމުގައި އެއްކޮޅުން އިމްރާނުގެ ޓީމު ކުޅޭއިރު އަނެއް ކޮޅުން ނުކުންނާނީ "އެފްއޭއެމް 11" އެވެ. އެ ޓީމަށް ކުޅެން މެންޗެސްޓާ ޔުނައިޓެޑުގެ ކުރީގެ ގޯލްކީޕަރު ޑެންމާކުގެ ޕީޓާ ޝުމައިކަލް އަދި ރެއާލް މެޑްރިޑުގެ ކުރީގެ ޑިފެންޑަރު ސްޕެއިނުގެ މިޝޭލް ސަލްގާޑޯ ގެންނަ ގޮތަށް ވަނީ ހަމަޖައްސައިފަ އެވެ.
އިމްރާނުގެ ޓީމަށް ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގް (ދަގަނޑޭ) ވެސް ކުޅޭނެ އެވެ. ދެން ވެސް ހިމެނޭނީ، އެނގިފައިވާ ގޮތުގައި އޭނާއާ އެކު އެކި ދުވަސްވަރު ގައުމީ ޓީމަށް ކުޅުނު ކުޅުންތެރިންނެވެ. އެ ޓީމުގެ ކުޅުންތެރިންނާއި ކޯޗު އަދި އޮފިޝަލުން ވެސް ހަމަޖެއްސުމުގެ އިހުތިޔާރު އޮތީ އިމްރާނަށެވެ.
އިމްރާނުގެ ޓީމުގެ ކޯޗު ސްޓޮއިކޯފަކީ ރާއްޖޭގެ ކްލަބް ފުޓްބޯޅައިގެ ތާރީހުގެ އެންމެ ކާމިޔާބު އެއް ކޯޗެވެ. އެގޮތުން ރާއްޖޭގެ ކްލަބަކުން މިހާތަނަށް ހޯދި އެންމެ ބޮޑު ކާމިޔާބީ ކަމަށްވާ، ނިއު ރޭޑިއަންޓް 2005 ވަނަ އަހަރުގެ އޭއެފްސީ ކަޕުގެ ތިން ވަނަ ހޯދިއިރު މޭސްތިރިޔަކީ އޭނާ އެވެ. އެ ޓީމުގައި އިމްރާން ނުހިމެނުނަސް ސްޓޮއިކޯފް ގައުމީ ޓީމަށް ކޯޗުކޮށްދިން ދެ ފަހަރު ވެސް އިމްރާން ކުޅުނެވެ.
އެގޮތުން ސްޓޮއިކޯފް އެންމެ ފުރަތަމަ ރާއްޖެ އައިސް އޭޝިއަން ކަޕް ކޮލިފައިން އަށް ނެގި ސްކޮޑުގައި، އޭރު ކްލަބް އީގަލްސް އަށް ކުޅެމުން ދިޔަ އިމްރާން ހިމެނުމަކީ އޭނާގެ ކާމިޔާބު ކެރިއަރުގެ ފެށުމެވެ. އެ ފަހަރު ސީރިއާ އަތުން 2-1 އިން ރާއްޖެ ބަލިވި މެޗުގެ މޮޅު ކުޅުންތެރިޔާގެ މަގާމް އިމްރާން ހޯދި އެވެ. އެއީ ދެކުނު އޭޝިއާ ސަރަހައްދުން ބޭރުގެ މެޗެއްގައި ދިވެއްސަކު ފުރަތަމަ ފަހަރަށް އެ މެޗުގައި މޮޅު ކުޅުންތެރިޔާގެ މަގާމް ހޯދުމެވެ. އަދި އެ އަހަރު މާލޭގައި ބޭއްވި ގޯލްޑަން ޖުބިލީ މުބާރާތުގައި ވެސް އިމްރާނަށް ފުރުސަތު ދިނެވެ. ތަޖުރިބާކާރު ގޯލްކީޕަރު އިސްހާގު އީސާ ހުއްޓާ އިމްރާނަށް ފުރުސަތު ދިނުމުން ބައެއް ފަރާތްތަކުން ސުވާލު އުފެއްދި ނަމަވެސް އިމްރާން ވަނީ މޮޅަށް ކުޅެ އޭނާ އަށް ޖާގަ ހައްގުކަން ކަށަވަރުކޮށްދީފަ އެވެ.
އޭގެ ފަހުން 2016 ވަނަ އަހަރާ ހަމަޔަށް އިމްރާން ގައުމީ ޓީމުގައި ފަސް އެނބުރި ބަލާފައެއް ނުވެ އެވެ. ރާއްޖޭން 2004 ވަނަ އަހަރު ދެކުނު ކޮރެއާއާ 0-0 އިން އެއްވަރުވި ކުރި މެޗާއި 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރިއިރު އެންމެ ބޮޑު ހިއްސާއެއްވީ އެއް ކުޅުންތެރިޔަކީ އިމްރާނެވެ. އޭނާގެ ކެރިއަރުގައި ދެ ވަނަ ފަހަރަށް ސްޓޮއިކޯފުގެ އިރުޝާދުގެ ދަށުން ކުޅުނީ 2005 ވަނަ އަހަރުގެ ސާފް ޗެމްޕިއަންޝިޕާއި 2006 ވަނަ އަހަރުގެ އޭޝިއަން ގޭމްސްގަ އެވެ. މީގެ ތެރެއިން އޭޝިއަން ގޭމްސްގައި 23 އަހަރުން ދަށުގެ ޓީމުގެ ކެޕްޓަންކަން ވެސް ކުރީ އިމްރާނެވެ.
ފަހުން ސްޓޮއިކޯފް ވަނީ ދެ ފަހަރެއްގެ މަތިން ނިއު އަށް އަދި އެއް ފަހަރު، އިމްރާނުގެ އުފަން ރަށު ޓީމު ކަމަށްވާ އދ. މަހިބަދޫ އަށް ކޯޗުކޮށްދީފަ އެވެ. ނިއު އިން 2009 ވަނަ އަހަރު އޭނާއާ ހަވާލުކުރުމަށް ފަހު ބަޖެޓް ތަންނުދޭ ކަމަށް ބުނެ ވަކި ހިސާބަކުން ވަކިކުރީ އެވެ. އޭގެ ފަހުން މަހިބަދޫ ޓީމަށް 2015 ގައި ކޯޗުކޮށްދިން ނަމަވެސް ނަތީޖާ ދަށްވުމުން ފޮނުވާލީ އެވެ. އެންމެ ފަހުން ނިއު އަށް ގެނައީ 2016 ގަ އެވެ. އެކަމަކު އުރީދޫ ދިވެހި ޕްރިމިއާ ލީގުގައި ޖެހިޖެހިގެން ހަތަރު މެޗުން ބަލިވުމުން ވަކިކުރި އެވެ.