17 ޑިސެމްބަރ 2018 - 09:40
އިދިކޮޅު ޕީޕީއެމްގެ ހަރަކާތްތައް ވަރުގަދަކޮށް ކޮންމެ ރެއަކު ވެސް އެ ޕާޓީގެ އޮފީސް ކުރިމަތީގައި ކޮންމެވެސް ހަރަކާތެއް ހިންގާނެ ކަމަށް އެ ޕާޓީގެ ޕާލަމެންޓަރީ ގްރޫޕުގެ ލީޑަރު އަހުމަދު ނިހާން ރޭ ވިދާޅުވެއްޖެ އެވެ.
ޕީޕީއެމްގެ އޮފީހުގައި ރޭ ބޭއްވި ނޫސްވެރިންގެ ބައްދަލުވުމެއްގައި ނިހާން ވިދާޅުވީ ހިޔާލު ފާޅުކުރުމާއި އެއްވެ އުޅުމުގެ މިނިވަންކަމުގެ ބޭނުން ވެސް އެ ޕާޓީން ކުރިއަށް އޮތް ތަނުގައި ހިފާނެ ކަމަށެވެ.
"މި ވާހަކަ ދައްކަން ފަށަން ޖެހުނީ މިނިވަންކަމާއި ހިޔާލު ފާޅު ކުރުމާއި އެއްވެ އުޅުމަކީ އަޅުގަނޑުމެން ވެސް ފަރިތަކަމާ އެކު މާލޭގެ މަގުތަކުގައި ކުރަން ދަންނަ ކަންކަން. އެއްވެސް ޕާޓީއަކުން ނުވަތަ ކޯލިޝަނަކުން ގަބޫލު ކުރައްވައިގެން ނުތިއްބަވާތި އަޅުގަނޑުމެންނަށް ހިނގަން ނޭންގޭނެ މަގަކުން އެ ބޭފުޅުންނަށް ހިނގިފައި އޮންނާނެ ކަމަށް،" ނިހާން ވިދާޅުވި އެވެ.
ޕީޕީއެމުން ބުނެފައި ވަނީ އެ ޕާޓީން ކުރިއަށް ގެންދިއުމަށް ހަމަޖެހިފައިވާ ހަރަކާތްތައް ފެށޭނީ ކޮންމެ ރެއަކު ވެސް ޕާޓީގެ އޮފީސް ކުރިމަތިން ރޭގަނޑު 8:30 ގައި ކަމަށެވެ.
އެ ނޫސްވެރިންގެ ބައްދަލުވުމުގައި ނިހާން ވަނީ ކުރީގެ ރައީސް އަބްދުﷲ ޔާމީންގެ ބޭންކް އެކައުންޓެއްގައި 100 މިލިއަން ރުފިޔާ ހުރި މައްސަލަ ދިފާއު ކުރައްވައިފަ އެވެ.
"100 މިލިއަން ރުފިޔާ ހުރުމަކީ މައްސަލައެއްތޯ. އެއްވެސް ގާނޫނެއްގައި ނެތް އެހެނެއް،" ނިހާން ވިދާޅުވި އެވެ.