16 ޑިސެމްބަރ 2018 - 10:50
އަލް އައިން (ޑިސެމްބަރު 16) – ފީފާ ކްލަބް ވޯލްޑް ކަޕުގެ ސެމީ ފައިނަލުގައި އެންމެ ފަހު ދެ އަހަރުގެ ޗެމްޕިއަން ރެއާލް މެޑްރިޑާ ވާދަކުރުމުގެ ފުރުސަތު ޖަޕާނުގެ ކަޝިމާ އެންޓްލާސް ހޯދައިފި އެވެ.
ދެ ވަނަ ބުރުގެ މެޗުން ކަޝިމާ މޮޅުވީ މެކްސިކޯގެ ގުއަޑަލަޔަރާ އަތުން 3-2 އިން މޮޅުވެގެންނެވެ. އޮޓޮމެޓިކުން ސެމީ ފައިނަލުން ފުރުސަތު ހޯދާފައިވާ މެޑްރިޑާއި ކަޝިމާގެ މެޗު އޮންނާނީ އަބޫ ދާބީގައި ބުދަ ދުވަހު އެވެ.
އަނެއް ސެމީ ފައިނަލުގައި ބައްދަލުކުރާނީ ދާދި ފަހުން ދެކުނު އެމެރިކާގެ ޗެމްޕިއަންކަން ހޯދި އާޖެންޓީނާގެ ރިވާ ޕްލޭޓާއި ޔޫއޭއީގެ އަލް އައިން އެވެ. ރިވާ ޕްލޭޓަށް އޮޓޮމެޓިކުން ސެމީން ފުރުސަތު ލިބުނުއިރު އަލް އައިން ފުރުސަތު ހޯދީ ދެ ވަނަ ބުރުގައި އެފްރިކާގެ ޗެމްޕިއަން ޓިއުނީޝިއާގެ އެސްޕަރަންސް ޑި ތޫނިސް އަތުން 3-0 މޮޅުވެގެންނެވެ.
ޔޫއޭއީގައި ކުރިއަށްދާ މި މުބާރާތުގެ ފައިނަލް މެޗު އޮންނާނީ އަންނަ ހޮނިހިރު ދުވަހު އަބޫ ދާބީގެ ޒަޔެދު ސްޕޯޓްސް ސިޓީ ސްޓޭޑިއަމުގަ އެވެ.
ބައްރުތަކުގެ ޗެމްޕިއަނުންގެ މެދުގައި ކުޅޭ މި މުބާރާތުގެ އެންމެ ކާމިޔާބު ޓީމަކީ ތިން ފަހަރު ތަށި ހޯދާފައިވާ މެޑްރިޑުގެ އިތުރުން ބާސެލޯނާ އެވެ.