15 ޑިސެމްބަރ 2018 - 17:04
ފުލުހަށް މިއަދު ހާޒިރުކުރީ ތުހުމަތެއްގައި ނޫން ކަމަށާއި ހާޒިރުކުރީ މައުލޫމާތެއް ސާފުކޮށްލަން ކަމަށް ކުރީގެ ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.
ފުލުސް އޮފީހަށް މިއަދު ހާޒިރުވެ ވަޑައިގަތުމަށް ފަހު ނިކުމެ ވަޑައިގެން ނޫސްވެރިންނާ ވާހަކަ ދައްކަވަމުން ޔާމީން ވިދާޅުވީ ފުލުހުން ސުވާލުކުރީ ރިޔާސީ އިންތިޚާބުގެ ކެމްޕެއިނަށް ހުޅުވި އެކައުންޓަށް ފައިސާ ޖަމާވި މައްސަލާގައި ކަމަށެވެ. އެ އެކައުންޓަކީ މިދިޔަ ރިޔާސީ އިންތިޚާބާއި އޭގެކުރީގެ ރިޔާސީ އިންތިޚާބުގެ ކެމްޕެއިންގައި ވެސް ބޭނުން ކުރެއްވި އެކައުންޓް ކަމަށް ފުލުހުންނަށް ދެންނެވި ކަމަށާއި އަދި އެކަމުގައި ގޯހެއް އުޅޭ ކަމަށް ފުލުހުން ބުނެފައިނުވާ ކަމަށް އެމަނިކުފާނު ވިދާޅުވި އެވެ.
"އެކައުންޓުގައި ވަދެ ނިކުމެ ހުރި ފައިސާ އެއީ ފެންނަން ހުރި އެއްޗެއް. އޭގައި ވަކި ކަމެއް އޮވެއްޖެ ކަމަށް ވަންޏާ ތަހުގީގީ އިދާރާތަކުން ހުންނަވާނީ މިހާރު ބައްލަވާފައި ވިދާޅުވެފައި މިވެނި ފައިސާއަކީ މިވެނި ގޮތަަކަށް ގޯސްކޮށް ވަދެފައި ހުރިި ފައިސާއެކޭ. އެޔެއް އަދި އެސްޓަބްލިޝެއް ނުކުރެއްވޭ." ޔާމީން ވިދާޅުވި އެވެ.
މީގެ އިތުރުން އެމްއެމްޕީއާރުސީގެ އެއް މިލިއަން ޑޮލަރުގެ ޗެކެއް އެމަނިކުފާނުގެ އެކައުންޓަށް ޖަމާވި މައްސަލާގައި ވެސް ފުލުހުން ސުވާލު ކުރެއްވި ކަމަށް ޔާމީން ވިދާޅުވި އެވެ. އެކަމަކު އެ ފައިސާ އަކީ އެންޓި ކޮރަޕްޝަން ކޮމިޝަން (އޭސީސީ) ގެ ބެލުމުގެ ދަށުގައި ހުރި ފައިސާއެއް ކަމަށް ވެފައި އަދި އެކަމުގައި އޭސީސީއަށް ކުރިން ބަޔާނެއް ދެއްވާފައިވާތީ އެކަން އޭސީސީން ސާފުކުރަން އެމަނިކުފާނު އެދިވަޑައިގަތް ކަމަށް ޔާމީން ވިދާޅުވި އެވެ.
"ރިޔާސީ އިންތިޚާބެއްގެ ކެމްޕެއިނެއް ހިންގައި ނިންމޭނެތޯ 20 ވަރަކަށް މިލިއަން ރުފިޔާއިން؟. އެހެންވީމަ އެއީ ބޮޑު އަދަދަކަށް ވާންޖެހޭ ސަބަބެއް އަޅުގަނޑަކަށް ނުވިސްނޭ. އަނެއްކާ މިހާރު ސަރުކާރު ހިންގަވަން ތިއްބެވި ބޭފުޅުން ވިދާޅުވެ ލައްވަންވީ ނޫންތޯ އެ ބޭފުޅުން ހޭދަ ކުރެއްވީ 20 މިލިއަން ރުފިޔާތޯ؟." އިންތިޚާބުގެ އެކައުންޓަށް ޖަމާވި ފައިސާއާ ގުޅޭގޮތުން ޔާމީން ވިދާޅުވި އެވެ.
ޔާމީން ވިދާޅުވި ގޮތުގައި އެމަނިކުފާނުގެ ބޭންކް އެކައުންޓްތައް ފްރީޒް ކޮށްފައި ވިޔަސް، އެކަމުގެ މައުލޫމާތު ފުލުހުން އެމަނިކުފާނަށް އަންގާފައެއް ނުވެ އެވެ. އެކަމަކު މިއަދު ހާޒިރުކުރި މައްސަލާގައި އިތުރު ކަމެއް ސާފުކުރަން ޖެހިއްޖެ ނަމަ، އެމަނިކުފާނު އަލުން ހާޒިރު ކުރަން ޖެހިދާނެ ކަމަށް ފުލުހުން އެންގެވި ކަމަށް ޔާމީން ވިދާޅުވި އެވެ.
ޔާމީންގެ ވަކީލެއްގެ ގޮތުން ފުލުހަށް ވަޑައިގަތް ކުރީގެ ލީގަލް އެފެއާޒް މިނިސްޓަރު އާޒިމާ ޝަކޫރު ވިދާޅުވީ ކެމްޕެއިންގެ އެކައުންޓަށް ފައިސާ ޖަމާވުމުން އެކަން ޖިނާއީ އަމަލެއް ކަމަށް ވަނީ ކީއްވެގެންތޯ ފުލުހުންނަށް ބުނެ ނުދެވޭ ކަމަށެވެ. އަދި އެކަމުގައި ގާނޫނާ ޚިލާފް އެއްވެސް ކަމެއް ކުރިކަން ފުލުހުން ބުނެދެވިފައި ނުވާ ކަމަށް އާޒިމާ ވިދާޅުވި އެވެ.
"މިއިން އެއްވެސް ޓްރާންސްއެކްޝަނެއްގައި ޝައްކު ކުރެވެނީ ނުވަތަ ގާނޫނާ ޚިލާފަށް ހިންގަވާފައި އޮތީ ކޮން ކަމެއް ކަމެއް. އެ ވިދާޅުވާ ޖިނާއީ އަމަލަކީ ކޮބައިކަމެއް ފުލުހުން އަޅުގަނޑުމެންނަށް ވިދާޅުވެއެއް ނުދެއްވާ." އާޒިމާ ވިދާޅުވި އެވެ.
ޔާމީން ފުލުހަށް ހާޒިރުވި ވަގުތު ޕީޕީއެމްގެ ސަޕޯޓަރުން އެމަނިކުފާނުގެ ދިފާއުގައި މުޒާހަރާއަށް ނިކުތްއިރު، އެމަނިކުފާނު ހައްޔަރު ކުރަން ގޮވާލައި އިދިކޮޅު އެމްޑީޕީ ސަޕޯޓަރުން ވެސް މަގުމައްޗަށް ނިކުމެ މުޒާހަރާ ކުރަމުން ދިޔަ އެވެ.