12 ޑިސެމްބަރ 2018 - 13:51
ވޮޝިންޓަން (ޑިސެމްބަރު 12) - ޓައިމް މަޖައްލާގެ މި އަހަރުގެ ޝަހުސިއްޔަތުންގެ ގޮތުގައި މަރާލި އަދި ޖަލުގައި އަނިޔާ ލިބެމުންދާ ނޫސްވެރިން ހޮވައިފި އެވެ.
ޓައިމް އިން މި ފަހަރު ވަނީ ހަތަރު ބޭރުގަނޑު ހަދައިފަ އެވެ. ކޮންމެ ބޭރުގަނޑަކަށް ވެސް އަރުވާފައި ވަނީ ޒިންމާ އަދާކުރަނިކޮށް ހަމަލާ އަމާޒުވި ނޫސްވެރިންނެވެ. އޭގެ ތެރޭގައި އިސްތަންބޫލްގައި ހުންނަ ސައުދީ ކޮންސިއުލޭޓް ތެރޭ މަރާލި ޖަމާލް ޚާޝުގްޖީ ހިމެނެ އެވެ. ދެން ހިމެނެނީ އެމެރިކާގެ ނޫހެއްގެ އިދާރާ އަށް ހަމަލާދީ މަރާލި ފަސް ނޫސްވެރިންނެވެ. އަދި ފިލިޕީންސްގެ ސަރުކާރާ ދެކޮޅަށް ލިޔަމުންދާ ނޫސްވެރިޔާ މާރިއާ ރެއްސާ އާއި މިއަންމާގެ ޖަލުގައި ތިބި ރޮއިޓާސްގެ ދެ ނޫސްވެރިން ކަމަށް ވަ ލޯން އާއި ކިޔޯ ސޮއެ އޫ ހިމެނެ އެވެ.
ޓައިމް އިން ބުނީ އަހަރުގެ ޝަޚްސިއްޔަތުންގެ ގޮތުގައި އެ މީހުން ހޮވީ އެއީ އަމިއްލަ ފުރާނަ އަށް އަތްމައްޗަށް ލައިގެން ތެދު ހާމަކުރަން ނުކުތް ބަޔަކަށްވާތީ ކަމަށެވެ.
ސައުދީ ސަރުކާރަށް ފާޑުކިޔަމުން ދިޔަ ނޫސްވެރިޔާ މަރާލީ ސައުދީ ޝާހީ އާއިލާގެ އިސް ފަރާތެއްގެ އަމުރަށް ކަމަށް ތުހުމަތުކޮށްފައިވެ އެވެ. އޭނާ ދިރިއުޅެމުން ދިޔައީ އަމިއްލަ އަށް އަރުވާލެވިގެން އެމެރިކާގަ އެވެ. ވޮޝިންޓަން ޕޯސްޓަށް ލިޔަމުން ދިޔަ ކޮލަމްގައި އޭނާ ވަނީ ސައުދީ ސަރުކާރުގެ ބައެއް ސިޔާސަތުތަކަށް ފާޑުކިޔައިފަ އެވެ.
އެމެރިކާގެ މެރީލޭންޑްގެ ކެޕިޓަލް ގެޒެޓް ނޫހުގެ އޮފީހަށް ބަޑި ހިފައިގެން ތިބި ބަޔަކު ވަދެ ހަމަލާދީ ފަސް ނޫސްވެރިން މަރާލީ ޖުލައި 28 ގަ އެވެ. ތަހުގީގުން ފަހުން އެނގުނު ގޮތުގައި ހަމަލާ ދިނީ އެ ނޫހާ މެދު ހަސަދަ އޮތް ބައެކެވެ. އެ ބިރުވެރި ހާލަތުގައި ވެސް ސްޓާފުން ވަނީ ކާރު ޕާކް ސަރަހައްދުގައި މަސައްކަތްކޮށް ޖެހިގެން އައި ދުވަހުގެ ނޫސް ތައްޔާރުކޮށްފަ އެވެ.
ސީއެންއެންގެ ކުރީގެ ނޫސްވެރިޔާ މާރިއާ ރެއްސާ ވަނީ އޭނާގެ އަމިއްލަ އޮންލައިން ވެބްސައިޓެއް ކަމަށްވާ ރެޕްލާ 2012 ވަނަ އަހަރު ފިލިޕީންސްގައި އުފައްދާ ތަހުގީގީ ނޫސްވެރިކަމެއް ފަށައިފަ އެވެ. ރައީސް ރޮޑްރިގޯ ޑުޓާޓެ ދެއްވާ ބަޔާންތަކަށް ފާޅުގައި އެ ނޫހުން ފާޑުކިޔަ އެވެ. ޚާއްސަކޮށް ޑްރަގާ ދެކޮޅަށް ފަށާފައިވާ ހަނގުރާމައިގައި މީހުން މަރަމުންދާ މައްސަލައަށެވެ. އެ ނޫހުގެ ނޫސްވެރިން ފިލިޕީންސްގެ ރިޔާސީ ގަނޑުވަރަށް ވަނުން އޮންނަނީ މަނާކޮށްފަ އެވެ. މި އަހަރުގެ ޖެނުއަރީ މަހު ވަނީ ވެބްސައިޓުގެ ލައިސަންސް ވެސް ބާތިލްކޮށްފަ އެވެ.
ރޮއިޓާސް އަށް މަސައްކަތް ކުރާ މިއަންމާގެ ދެ ނޫސްވެރިން ކަމަށްވާ ވަ ލޯން އާއި ކިޔޯ ސޮއެ ވަނީ ސިއްރު ބޭޒާރު ކުރުމާ ބެހޭ ގާނޫނާ ޚިލާފުވި ކަމަށް ބަލައި މިދިޔަ ސެޕްޓެމްބަރު މަހު ހަތް އަހަރަށް ޖަލަށް ލައިފަ އެވެ. ދެ ނޫސްވެރިން ދިޔައީ މިއަންމާ ސިފައިން ރޮހިންޖާ މުސްލިމުންނަށް ދިން އަނިޔާ ތަހުގީގުކޮށް ރިޕޯޓެއް ތައްޔާރު ކުރަމުންނެވެ. އެ މީހުން ހައްޔަރު ކުރީ މިއަންމާ ސަަރުކާރުގެ ރޭވުމެއްގެ ދަށުންނެވެ.
ޓައިމް މަޖައްލާގެ މިދިޔަ އަހަރުގެ ޝަޚްސިއްޔަތުންގެ ގޮތުގައި ހޮވާފައި ވަނީ "ސައިލެންސް ބްރޭކާސް" އެވެ. އެއީ ޖިންސީ އަނިޔާއާ ދެކޮޅަށް ވާހަކަ ދައްކާ ދެ ޖިންސްގެ މީހުންނެވެ.
ޓައިމް މަޖައްލާ އިން އަހަރުގެ ޝަޚްސިއްޔަތު ހޮވަން ފަށާފައި ވަނީ 1927 ވަނަ އަހަރު އެވެ.