10 ޑިސެމްބަރ 2018 - 17:05
ވެންކޫވާ (ޑިސެމްބަރު 10) - ކެނެޑާ އިން ހައްޔަރުކޮށްފައިވާ ޗައިނާގެ ވާވޭ ކުންފުނީގެ އެގްޒެކެޓިވް މެންބަރެއް ކަމަށްވާ މެންގް ވަންޒޫގެ ސިއްހީ މައްސަލަތަކެއް ފެންމަތިވެއްޖެ އެވެ.
ވާވޭ ކުންފުނީގެ ޗީފް ފައިނޭންޝަލް އޮފިސަރު އަދި ކުންފުނީގެ ބާނީ ރެން ޒެންގްފެއިގެ ދަރިކަނބަލުން ނެރުނު ބަޔާނެއްގައި ބުނެފައި ވަނީ މި މަހު 1 ވަނަ ދުވަހު ވެންކޫވާ ސިޓީގެ އެއާޕޯޓުން އޭނާ ހައްޔަރު ކުރި ފަހުން ޕްރެޝަރު މަތިވެ ކެނެޑާގެ ހޮސްޕިޓަލަކުން ފަރުވާ ހޯދަން ޖެހިފައިވާ ކަމަށެވެ. ވަންޒޫގެ 55 ސަފުހާގެ ބަޔާނުގައި ބުނެފައި ވަނީ އޭނާ އަކީ ލޭގެ ޕްރެޝަރު ކުރިން ވެސް ހުންނަ މީހެއް ކަމަށެވެ.
"އަހަރެން ހައްޔަރު ކުރި ފަހުން ސިއްހީ ހާލަތު ދަނީ ގޯސްވަމުން،" ވަންޒޫގެ ބަޔާނުގައި ބުނެފައިވެ އެވެ.
ވަންޒޫ ބުނެފައި ވަނީ ކުރިން ވެސް އޭނާ އަށް ސިއްހީ މައްސަލަތައް ދިމާވެފައިވާ ކަމަށެވެ. މި ގޮތުން 2011 ވަނަ އަހަރު ވަނީ ތައިރޮޑް ކެންސަރުގ އޮޕަރޭޝަނެއް ކޮށްފައި ކަމަށް ވެސް ބުނެފައިވެ އެވެ.
"އަހަރެންގެ މައްޗަށް ތުހުމަތުކޮށްފައިވާ ކަންކަމާ ކޯޓުގައި ކުރިމަތިލާން ތައްޔާރަށް މި ހުރީ،" ވަންޒޫގެ ބަޔާނުގައި ބުނެފައިވެ އެވެ.
ކަފާލާތުގެ ދަށުން އޭނާ ދޫކޮށްލުމާ މެދު ކެނެޑާގެ ކޯޓަކުން މިއަދު ގޮތެއް ނިންމާނެ އެވެ.
ވަންޒޫގެ ބަޔާނުގައި އިތުރަށް ބުނެފައިވާ ގޮތުގައި ވެންކޫވާއަކީ މީގެ 15 އަހަރު ކުރިންސުރެ އޭނާއާ ގުޅުން އޮންނަ ސިޓީއެކެވެ. ވެންކޫވާގައި އޭނާގެ އިމާރާތްތައް ހުންނަ އިރު އޭނާ އަކީ ކެނެޑާގެ ޕާމަނަންޓް ރެސިޑެންސީ ޕާމިޓް އޮންނަ މީހެއް ކަމަށް ވެސް ބުނެފައިވެ އެވެ.
ވަންޒޫ ހައްޔަރު ކުރުމާ ގުޅިގެން ކެނެޑާ އިން ވެސް ވަނީ ނުރުހުން ފާޅުކޮށްފަ އެވެ. އަދި ކެނެޑާގެ ސަފީރު ވަނީ ޗައިނާގެ ފޮރިން މިނިސްޓްރީ އަށް ހާޒިރުކޮށްފަ އެވެ.