08 ޑިސެމްބަރ 2018 - 11:50
ވެންކޫވާ (ޑިސެމްބަރު 8) - ޗައިނާގެ ޓެލެކޮމް ކުންފުނި ވާވޭގެ ޗީފް ފައިނޭންޝަލް އޮފިސަރު މެންގް ވަންޒޫ ކެނެޑާ އިން ހައްޔަރުކޮށްފައި ވަނީ، ދަތިކުރުމުގެ ފިޔަވަޅުތަކާ ޚިލާފަށް އީރާނާ އެކު ވިޔަފާރީގެ ގުޅުންތައް ބޭއްވުމުން ކަމަށް ކެނެޑާގެ ކޯޓެއްގައި އިއްޔެ ބުނެފި އެވެ.
ކެނެޑާގެ ވެންކޫވާ ސިޓީން ވަންޒޫ ހައްޔަރު ކުރީ މި މަހު 1 ވަނަ ދުވަހު އެވެ. އޭނާ ހައްޔަރު ކުރީ ހޮން ކޮންގުން ކެނެޑާ އަށް ގޮސް މެކްސިކޯ އަށް ދާން މަތިންދާ ބޯޓު ބަދަލު ކުރަނިކޮށެވެ.
ކެނެޑާ ސަރުކާރުގެ ވަކީލަކު ވަނީ ކަފާލާތުގެ ދަށުން ވަންޒޫ ދޫކޮށްލަން ދެކޮޅު ހަދާ ކަމަށް ކޯޓުގައި ބުނެފަ އެވެ. ވަކީލް ބުނީ ވަންޒޫ ވަނީ ވަރަށް ގިނަ މާލީ މުއައްސަސަތަކަށް އޮޅުވާލަން މަސައްކަތް ކޮށްފައިވާ ކަމަށެވެ. އޭނާގެ ޝަރީއަތް ހިންގަން އެމެރިކާ އަށް ފޮނުވުން ވެސް އެކަށީގެންނެވެ. ކެނެޑާ އާއި އެމެރިކާ އިން ވަނީ ކުށްވެރިން ބަދަލު ކުރުމުގެ އެއްބަސްވުމުގައި ސޮއިކޮށްފަ އެވެ. ވަންޒޫގެ މައްޗަށް ކުށް ސާބިތު ވެއްޖެ ނަމަ 30 އަހަރުގެ ޖަލު ހުކުމެއް އައުން އެކަށީގެންނެވެ.
ވަންޒޫ އެމެރިކާ އަށް ފޮނުވާލެވޭނީ އޭނާގެ މައްޗަށް ތުހުމަތު ކުރާ މައްސަލައިގެ އެކަށީގެންވާ ހެކި ހުރި ކަމަށް ކޯޓަށް ފާހަގަ ކުރެވޭ ނަމަ އެވެ. އޭގެ ފަހުން ޖެހޭނީ އޭނާ އެމެރިކާ އަށް ފޮނުވުމުގެ އަމުރުގައި ޖަސްޓިސް މިނިސްޓަރު ސޮއި ކުރުމަށެވެ.
ވަންޒޫގެ މައްޗަށް ތުހުމަތުކޮށްފައި ވަނީ އެމެރިކާގެ ބޭންކްތަކަށް މަކަރު ހަދައިގެން ވާވޭގެ ސަބްސިޑަރީ ކުންފުންޏެއް މެދުވެރިކޮށް އީރާނާ އެކު ވިޔަފާރިކުރުމެވެ. ވަކީލް ބުނީ ވާވޭ އާއި ސްކައިކޮމްއާ އެއްވެސް ގުޅުމެއް ނޯންނަ ކަމަށް އެމެރިކާގެ ބޭންކްތަކަށް ވަންޒޫ އަންގާފައިވާ ކަމަށެވެ. އެކަމަކު ސްކައިކޮމް އަކީ ވާވޭ ކަމަށް ވަކީލް ވަނީ ކޯޓުގައި ބުނެފަ އެވެ.
ޗައިނާ އިން ބުނެފައި ވަނީ ވާވޭ ކުންފުނީގެ ބާނީ އަދި ޗައިނާގެ ޕީޕަލްސް އާމީގެ ކުރީގެ އިންޖިނޭރެއް ކަމަށްވާ ރެން ޒެންގްފައިގެ އަންހެން ދަރިފުޅަކީ އެއްވެސް ކުށެއް ކޮށްފައިވާ މީހެއް ނޫން ކަމަށާއި އޭނާ ވަގުތުން ދޫކޮށްލަން ޖެހޭ ކަމަށެވެ.
ކެނެޑާގެ ބޮޑު ވަޒީރު ޖަސްޓިން ޓްރޫޑޯ ވިދާޅުވެފައި ވަނީ ވަންޒޫ ހައްޔަރު ކުރުމުގެ ފަހަތުގައި އެއްވެސް ސިޔާސީ ކަމެއް ނެތް ކަމަށެވެ.
ވާވޭ އިން އަތްފޯރާ ފަށުގައި އުފައްދަން ފެށި ސްމާޓްފޯނާ އެކު އެ ކުންފުނި މިހާރު ވަނީ އެޕަލް ކުންފުނި ވައްޓާލުމަށް ފަހު މޯބައިލް ފޯނުގެ މާކެޓުގައި ސެމްސަންގެ ފަހަތުން ދެ ވަނަ އަށް އަރައިފަ އެވެ.
ވާވޭ ކުންފުނީގެ އިސްވެރިއަކު ހައްޔަރުކޮށްފައި މިވަނީ ހުޅަނގުގެ ގައުމުތަކުގައި ވާވޭ ޓެކްނޮލޮޖީ މަނާ ކުރަން އުޅޭ ދުވަސްވަރެއްގަ އެވެ. އެމެރިކާ އިން ބުނެފައި ވަނީ ވާވޭ އަކީ އެ ގައުމުގެ ގައުމީ ސަލާމަތަށް ނުރައްކަލެއް ކަމަށެވެ.