26 ނޮވެމްބަރ 2018 - 11:12
މޯލްޑިވްސް އިސްލާމިކް ބޭންކިން އެންޑް ފައިނޭންސް އިންޑަސްޓްރީގެ ފަސް ވަނަ ކޮންފަރެންސް (އެމްއައިބީއެފްއައިސީ) މާދަމާ ބާއްވަން ހަމަޖައްސައިފި އެވެ.
ރާއްޖޭގެ އިސްލާމިކް ބޭންކިން އާއި ފައިނޭންސް ދާއިރާ ފުޅާ ކުރުމުގެ މަޝްވަރާތައް ކުރުމަށް 2013 ވަނަ އަހަރުން ފެށިގެން ކޮންމެ އަހަރަކު ބާއްވާ ކޮންފަރެންސެކެވެ. އަދި މިއަހަރު މި ކޮންފަރެންސް ބާއްވަން ހަމަޖެހިފައި ވަނީ މާދަމާ ހޮޓެލް ޖެންގަ އެވެ.
މާދަމާ ބާއްވަން ހަމަޖެހިފައިވާ ބޭންކިން ކޮންފަރެންސަކީ ސްރީ ލަންކާގެ ޔޫޓީޔޫ އެޑިއުކޮންސެލްޓެންސީ ސްރީ ލަންކާ އިން އިންތިޒާމުކޮށްގެން ބާއްވާ ކޮންފަރެންސެކެވެ. އަދި އޭގެ އިތުރުން އެ ކޮންފަރެންސްގެ ޕާޓްނަރުންގެ ގޮތުގައި އަމާނާ ތަކައްފުލް މޯލްޑިވްސް، އަޔާދީ ތަކައްފުލް، ހައުސިން ޑިވެލޮޕްމަންޓް ކޯޕަރޭޝަން، ވިމެން އޮން ބޯޑް، މޯލްޑިވްސް ސެންޓަ ފޯ އިސްލާމިކް ފައިނޭންސްގެ އިތުރުން ކޭޕީއެމްޖީ މޯލްޑީވްސްގެ އިތުރުން އޭޑީއެލް ކެޕިޓަލް ސްރީ ލަންކާ ހިމެނެ އެވެ.
އެ ކޮންފަރެންސްގައި ރާއްޖޭގެ ކުންފުނިތަކާއި ސަރުކާރުގެ އިސްވެރިން ވާހަކަ ދައްކަވަން ވަނީ ހަމަޖެހިފަ އެވެ. އެ ބައްދަލުވުމުގެ ކީނޯޓް ސްޕީކާގެ ގޮތުގައި މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު ނަސީރާއި، މޯލްޑިވްސް ސެންޓަ ފޯ އިސްލާމިކް ފައިނޭންސްގެ ޗެއާޕާސަން އައިޝަތު މުނީޒާ ހިމެނެ އެވެ.