17 ނޮވެމްބަރ 2018 - 22:53
އާ ރައީސް އިބްރާހިމް މުހައްމަދު ސޯލިހު (އިބޫ)ގެ ކެބިނެޓަށް އައްޔަންކުރެއްވި ބައެއް މިނިސްޓަރުންނާ މެދު ހިތްހަމަނުޖެހި، ސޯޝަލް މީޑިއާގައި އާންމުންގެ ބޮޑެތި ފާޑުކިޔުންތަކެއް އަމާޒުވެއްޖެ އެވެ.
ތައުލީމާއި ތަޖުރިބާގެ ގޮތުން ގާބިލް، އިޚްލާސްތެރި ބޭފުޅުން ތިއްބަވާނެ ކަމަށް ރައީސް ކުރިން ވިދާޅުވިއަސް، ކެބިނެޓަށް ވަޒީރުން އައްޔަންކުރުމާ އެކު ފެނިގެންދިޔައީ ތަފާތު މަންޒަރެއް ކަމަށް ކަންބޮޑުވުން ފާޅުކޮށް ސޯޝަލް މީޑިއާގައި ވާހަކަދެއްކި ބައެއް މީހުން ބުނެ އެވެ. ބައެއް މީހުން ބުނެފައިވާ ގޮތުގައި ސަރުކާރުގެ އެންމެ އިސް މަގާމުތައް ދިޔައީ ހީކުރި ގޮތާ މުޅިން ހިލާފަށެވެ!
އާ ސަރުކާރުގައި 19 މިނިސްޓްރީއެއް ހިމެނޭއިރު ރައީސާއި ނައިބު ރައީސާއި އެޓާނީ ޖެނެރަލާ އެކު ކެބިނެޓުގައި ހިމެނިވަޑައިގަންނަވަނީ 22 ބޭފުޅުންނެވެ. ކެބިިނެޓް އެކުލަވާލާފައިވަނީ އެމްޑީޕީ އަށް 40 ޕަސެންޓު، ޖުމްހޫރީ ޕާޓީ އަށް 25 ޕަސެންޓް، ކުރީގެ ރައީސް މައުމޫން އަބްދުލްގައްޔޫމަށް 20 ޕަސެންޓް އަދި އަދާލަތު ޕާޓީ އަށް 15 ޕަސެންޓު ހިއްސާވާ ގޮތަށެވެ.
ކެބިނެޓަށް އައްޔަންކުރެއްވި ބޭފުޅުން: ފޮރިން މިނިސްޓަރު ކަމަށް އަބްދުﷲ ޝާހިދު، ޑިފެންސް މިނިސްޓަރުކަމަށް މާރިޔާ އަހުމަދު ދީދީ، ހޯމް މިނިސްޓަރަށް އިމްރާން އަބްދުﷲ، ފިނޭންސް މިނިސްޓަރަށް އިބްރާހިމް އަމީރު، ނޭޝަނަލް ޕްލޭނިން އެންޑް އިންފްރާސްޓްރަކްޗަރު މިނިސްޓަރަށް މުހައްމަދު އަސްލަމް، ހަޔާ އެޑިއުކޭޝަން މިނިސްޓަރަށް ޑރ. އިބްރާހިމް ހަސަން، ހެލްތު މިނިސްޓަރަށް އަބްދުﷲ އަމީން، ކޮމިއުނިކޭޝަން ސައިންސް އެންޑް ޓެކްނޮކޮލޮޖީ މިނިސްޓަރަށް މުހައްމަދު މަލީހް ޖަމީލް، މިނިސްޓަރު އޮފް އެޑިއުކޭޝަން ޑރ. އާއިޝަތު އަލީ، ޓްރާންސްޕޯޓް މިނިސްޓަރަކަށް އާއިޝަތު ނަހުލާ، ހެރިޓޭޖް މިނިސްޓަރަކަށް ޔުމްނާ މައުމޫން، ޓޫރިޒަމް މިނިސްޓަރަކަށް އަލީ ވަހީދު، އިކޮނޮމިކް އެންޑް ޑިވެލޮޕްމަންޓް މިނިސްޓަރަކަށް ފައްޔާޒް އިސްމާއިލް، ފިޝަރީޒް، މެރިސް ރިސޯސަސް އެންޑް އެގްރިކަލްޗަރު މިނިސްޓަރަކަށް ޒަހާ ވަހީދު، އިސްލާމިކް އެފެއާޒް މިނިސްޓަރަކަށް ޑރ. އަހުމަދު ޒާހިރު، ހައުސިން އެންޑް އާބަން ޑިވެލޮޕްމަންޓް މިނިސްޓަރަކަށް އައިމިނަތު އާތިފާ، ޔޫތު ސްޕޯޓްސް އެންޑް ކޮމިއުނިޓީ އެމްޕަވަމަންޓް މިނިސްޓަރަކަށް އަހުމަދު މަހްލޫފް، ޖެންޑާ، ފެމިލީ އެންޑް ސޯޝަލް ސާވިސް މިނިސްޓަރަކަށް ޝިދާތާ ޝަރީފް، އެންވަޔަރުމެންޓް މިނިސްޓަރަކަށް ޑރ. ހުސައިން ރަޝީދު ހަސަން
ކެބިނެޓާ ގުޅޭގޮތުން ކަންބޮޑުވުން ފާޅުކުރި މީހަކު ބުނީ އިދިކޮޅު ކޯލިޝަނަށް ވޯޓު ދިނީ ކަންކަން އިސްލާހު ކުރުމަށް ކަމަށާއި ނަމަވެސް އާ ކެބިނެޓާ އެކު އެ އުއްމީދުތައް ގެއްލިފައިވާ ކަމަށެވެ. ތައުލީމީ އަދި ގާބިލް ބޭފުޅުން ކެބިނެޓަށް އައްޔަންކުރާނެ ކަމަށް ރައީސް ވިދާޅުވިއަސް، ކެބިނެޓަށް އައްޔަންކުރި ބައެއް ބޭފުޅުންގެ ސަބަބުން ވަރަށް ބޮޑަށް މާޔޫސްވެފައިވާ ކަމަށް އޭނާ ބުންޏެވެ.
ގާނިމް ނަމުގައި މީހަކު ކުރި ޓްވީޓެއްގައި ބުނީ އެއީ އެހާ ހިތްހަމަޖޭ ކެބިނެޓެއް ނޫން ކަމަށެވެ. ނަމަވެސް އޭގެ މާނައަކީ އުއްމީދު ގެއްލުވާލުން ނޫން ކަމަށް އޭނާގެ ޓްވީޓުގައި ފާހަގަކޮށްފައި ވެ އެވެ.
ނަމަވެސް ކުރީގެ ބަންޑާރަ ނައިބު ދިޔާނާ ސައީދު ވިދާޅުވަނީ މުސްތަގުބަލާ ދޭތެރޭ އޭނާ ވަރަށް ބޮޑަށް އުފާވެވަޑައިގަންނަވާ ކަމަށެވެ. އޭނާ ކުރެއްވި ޓްވީޓެއްގައި ވިދާޅުވީ ދުނިޔޭގެ މޮޅު ޔުނިވާސިޓީތަކުން ކިޔަވައި ވިދާޅުވެ، ނަޒާހަތްތެރިކަމާ މެދު ދުވަހަކު ވެސް ސުވާލު ނުއުފެދޭ ބޭފުޅުން ކެބިނެޓުގައި ހިމެނިވަޑައިގަތުމަކީ ނަސީބުވެރި ކަމެއް ކަމަށެވެ.
ސޯޝަލް މީޑިއާގައި އެންމެ ބޮޑަށް ފާޑުކިޔުން އަމާޒުވެފައިވާ އެއް ބޭފުޅަކީ ޓްރާންސްޕޯޓް މިނިސްޓަރަކަށް އައްޔަންކުރެއްވި، ޖުމްހޫރީ ޕާޓީގެ ލީޑަރު ރައްޔިތުންގެ މަޖިލީހުގެ ރައީސް ގާސިމް އިބްރާހިމްގެ އަނބިކަނބަލުން އައިޝާ އެވެ. އޭނާ ސިޔާސީ މައިދާނަށް ނިކުމެވަޑައިގެންނެވީ މިދިޔަ ޖޫން މަހު ބޭއްވި ޖުމްހޫރީ ޕާޓީގެ ކޮންގްރެސްގެ ތެރެއިންނެވެ.
ސޯޝަލް މީޑިއާ އެކްޓިވިސްޓް ލޫކަސް ޖަލީލް ކުރި ޓްވީޓެއްގައި ބުނީ ޓޫރިޒަމް މިނިސްޓްރީ ހިންގުން "ވިލާ ކުންފުންޏަށް" އަދި "ޓްރާންސްޕޯޓް މިނިސްޓްރީ ހިންގުން ފްލައިމީ އަށް" ކަމަށެވެ. ޖުމްހޫރީ ޕާޓީގެ ސްލޮޓުގައި އެ ދެބޭފުޅުން ކެބިނެޓަށް ވަޑައިގެންނެވިއިރު، ގާސިމަކީ ފަސް ރިސޯޓެއް ހިންގަވަމުން އަންނަ ބޭފުޅެކެވެ. އެތެރޭގެ މަންޒިލްތަކަށް އުދުހެމުން އަންނަ "ފްލައިމީ" އަކީ ވެސް ގާސިމްގެ މަސްލަހަތު ހިމެނޭ ތަނެކެވެ.
އެއަށް އެހެން މީހަކު ކުރި ޓްވީޓުގައި ބުނީ ކެބިނެޓުގައި ތިއްބެވި ބޭފުޅުންގެ ތެރެއިން 60 ޕަސެންޓް ބޭފުޅުންނަކީ އިހުލާސްތެރިކަމެއް ނެތް ފެއިލްވެފައި ތިބި ސިޔާސީ ބޭފުޅުން ކަމަށެވެ. އަދި ޓްރާންސްޕޯޓާއި ޓޫރިޒަމް މިނިސްޓަރަކަށް އެ ދެ ބޭފުޅުން އައްޔަންކުރައްވަން ނިންމި ނިންމުމަކީ ގޯސް ނިންމުމެއް ކަމަށާއި ކަންކަން ދާ ގޮތް ކެތްތެރިކަމާއެކު ބަލާނަން ކަމަށް ކުރި ޓްވީޓެއްގައި ވެ އެވެ.
އަންހެނަކު ކުރި ޓްވީޓެއްގައި ބުނީ ކެބިނެޓާ ގުޅޭގޮތުން ހުރީ ތަފާތު ޝުއޫރުތަކެއް ކަމަށެވެ. އެކަމަކު އިންތިޚާބު ކާމިޔާބު ކުރީ ކޯލިޝަނަކުން ކަމަށް ހަނދާނުގައި ބަހައްޓަން މަސައްކަތް ކުރާ ކަމަށް، މިންނުގެ ނަމުގައި ޓްވީޓްކުރި މީހަކު ބުންޏެވެ.