15 ނޮވެމްބަރ 2018 - 12:21
ކޮލަމްބޯ (ނޮވެމްބަރު 15) - ލަންކާ ޕާލަމެންޓުގައި ހިމެނޭ ސަރުކާރު މެންބަރުންނާއި އިދިކޮޅު މެންބަރުންގެ މެދުގައި މިއަދު ގަޔަށް އަތްލައި މާރާމާރީ ހިންގައިފި އެވެ.
ދެ ޕާޓީގެ މެދުގައި ހަމަނުޖެހުން އުފެދެން މެދުވެރީ ބޮޑު ވަޒީރު ކަމަށް ހަމަޖެއްސި މަހިންދާ ރާޖަޕަކްސާ ބަޔާނެއް ދެއްވަން އުޅުއްވުމުންނެވެ. މަގާމުން ދުރުކުރި ބޮޑު ވަޒީރު ރަނިލް ވިކްރަމަސިންހަގެ ޕާޓީގެ މެންބަރުން ވަނީ ރާޖަޕަކްސާގެ ތަގްރީރު ހުއްޓުވަން ވޯޓެއް ނަގަން މަސައްކަތް ކޮށްފަ އެވެ. އެ ވޯޓަށް އަހަން ޕާލަމެންޓުގެ ރައީސް ކަރޫ ޖަޔަސޫރިއާ އުޅުއްވުމުން ސަރުކާރަށް ތާއީދުކުރާ މެންބަރުން ވަނީ ރިޔާސަތަށް ގޮސް ބިރު ދައްކަން ފަށައިފަ އެވެ.
ރައީސް ޖަޔަސޫރިއާ ވަނީ މެންބަރުންގެ ގޮނޑިތަކަށް ވަޑައިގަތުމަށް އެދިވަޑައިގެންފަ އެވެ. އެކަމަކު މެންބަރުން ގެންދިޔައީ ޖަޔަސޫރިއާގެ އެދިވަޑައިގަތުމަށް ދެކޮޅު ހަދައި ބަހުގެ ހަމަލާތައް ދެމުންނެވެ. ޔޫއެންޕީންގެ މެންބަރުން ދެން މަސައްކަތް ކުރީ ޔަޖަސޫރިއާ ހިމާޔަތް ކުރާށެވެ. އެ ހިސާބުން ދެ ޕާޓީގެ މެންބަރުންގެ މެދުގައި ހަމަނުޖެހުން ހިންގައި އެއް މެންބަރަކު އަނެއް މެންބަރަކު ކޮއްޕަން ފެށި އެވެ. މި ހަމަނުޖެހުންގަނޑުގެ ތެރޭގައި ބައެއް މެންބަރުން ވެއްޓި ކޮންމެވެސް ވަރަކަށް އަނިޔާ ވެސް ވި އެވެ. ހަމަނުޖެހުން ބޮޑުވެ ބައެއް މެންބަރުން ވަނީ ޑަސްބިންގައި ހުރި ކަރުދާސްތައް ވެސް އުކަން ފަށައިފަ އެވެ.
ހަމަނުޖެހުން ބޮޑުވުމުން ޖަޔަސޫރިއާ ވަނީ ޖަލްސާ މެދުކަނޑާލައްވައި ވަޑައިގެންފަ އެވެ.