15 ނޮވެމްބަރ 2018 - 10:13
ބާސެލޯނާ (ނޮވެމްބަރު 15) - ބާސެލޯނާ އަށް ކުޅެމުން އަންނަ ފްރާންސްގެ ވިންގް އޮސްމާން ޑެމްބެލޭއާ އެ ކްލަބާ ދެމެދު ޖެހިފައިވާ މައްސަލަތަކަށް އަވަސް ހައްލެއް ހޯދުން މުހިއްމު ކަމަށް ބާސެލޯނާގެ ކުރީ ކެޕްޓަން ކާލޮސް ޕުޔޯލް ބުނެފި އެވެ.
ފާއިތުވި ހަފްތާތަކުގައި އެންމެ އެކަށީގެންވާ ވަރަށް ކުޅުމުގެ ފުރުސަތު ޑެމްބެލޭ އަށް ނުލިބޭތީ އޭނާ ވަނީ އެކަމާ ހިތްހަމަ ނުޖެހުން ފާޅުކޮށްފަ އެވެ. އަދި ބައެއް ދުވަސްތަކުގައި ބާސެލޯނާގެ ޓްރެއިނިން އަށް ގަނޑިޖެހިގެން އަންނާތީ އެ ޓީމުގެ ކޯޗު އާނެސްޓޯ ވަލްވޭޑޭ ވަނީ ޑެމްބެލޭ އަށް ފިޔަވަޅު އަޅައިފަ އެވެ. އެކަމާ ހިތްހަމަ ނުޖެހި އުމުރުން 21 އަހަރުގެ ޑެމްބެލޭ ބާސެލޯނާ ދޫކޮށްލަން އުޅޭ ކަމަށް ވެސް މީޑިއާގައި ވަނީ އަޑުފެތުރިފަ އެވެ.
"ޑެމްބެލޭ އަކީ ޒުވާން ކުޅުންތެރިއެއް. އަހަންނަކަށް ނޭނގޭ ޓީމު ތެރޭގައި ހިނގާ ކަންތައްތަކެއް. ޔަގީނުން ވެސް އެނގޭ ކަމަކީ ޖެހިފައިވާ މައްސަލަތަކަށް އަވަސް ހައްލެއް ބޭނުންވާކަން. އެހެންނޫނީ މުޅި ޓީމަށް އެކަމުގެ ނޭދެވޭ އަސަރުކޮށްފާނެ،" ސްޕެއިނުގެ ނޫހަކަށް ދިން އިންޓަވިއުއެއްގައި ޕުޔޯލް ބުންޏެވެ.
އޭނާ ބުނީ ޑެމްބެލޭއާ ކްލަބާ ދެމެދު އުފެދިފައިވާ ހިޔާލުތަފާތުވުންތަކަށް ހައްލެއް ހޯދަން ޓީމުގެ ސީނިއާ ކުޅުންތެރިން މަސައްކަތް ކުރަން ޖެހޭ ކަމަށެވެ.
"ކޮންމެ ކްލަބެއްގެ ތެރޭގައި ވެސް މައްސަލަ ހުންނާނެ. އެއަށް ހައްލެއް ހޯދައިދެވޭނީ ޓީމުގައި ތިބޭ ސީނިއާ ކުޅުންތެރިންނަށް. ޕްރެކްޓިހަށް ލަހުން އައުމަކީ ޑެމްބެލޭ ގޯސްކޮށް ކުރި ކަމެއް. ފުރަތަމަ ބަދަލުކުރަންވީ އެޓިޓިއުޑް. ދެން ޓީމުގެ އެންމެންނާ ގުޅިގެން އުޅެންވީ،" ޕުޔޯލް ބުންޏެވެ.
މިދިޔަ އަހަރުގެ އޮގަސްޓް މަހު ޑެމްބެލޭ ބާސެލޯނާ އަށް ބަދަލުވިއިރު އޭނާ ކަންތައް ކުރިގޮތާ މެދު ކުރީގެ ކްލަބް ބޮރޫޝިއާ ޑޯޓްމަންޑުން ވެސް ވަނީ އޭރު ހިތްހަމަ ނުޖެހުން ފާޅުކޮށްފަ އެވެ. ބާސެލޯނާ އަށް ބަދަލުވުމަށް ބާރުއެޅުމުގެ ގޮތުން ޑެމްބެލޭ ވަނީ ޑޯޓްމަންޑްގެ ފަރިތަކުރުންތަކަށް ނުކުންނަން ދެކޮޅު ހަދައިފަ އެވެ.
ޖެނުއަރީ މަހު ޓްރާންސްފާގައި ލިވަޕޫލުން ޑެމްބެލޭ އަށް ރެކޯޑް ބިޑެއް ކުރަން ތައްޔާރުވަމުން އަންނަ ކަމަށް އިނގިރޭސި މީޑިއާގައި ދެކެވުނު ވާހަކަތައް އެ ކްލަބުން ވަނީ ދޮގުކޮށްފަ އެވެ.