15 އޯގަސްޓް 2016 - 11:15
ފުލުހުންނަށް ހުށަހެޅޭ މައްސަލަތައް މިނިވަންކަމާ އެކު ތަހުގީގު ކުރުމުގެ ބާރު ނެތް ކަމަށް ވިދާޅުވެ، ކުރީގެ ކޮމިޝަނާ އޮފް ޕޮލިސް އަބްދުﷲ ރިޔާޒް ފުލުހުންނަށް މިއަދު ފާޑު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، އެއްވެ އުޅުމުގެ ގާނޫނަށް ގެނައި އިސްލާހަށް ބަހުސް ކުރައްވަމުން ކިނބިދޫ ދާއިރާގެ މެމްބަރު ރިޔާޒް ވިދާޅުވީ ފުލުހުންގެ މައްޗަށް ގިނަ ތުހުމަތުތަކެއް ކުރެވެމުންދާއިރު، އެއިން އެއްވެސް ކަމެއް ވެސް ތަހުގީގުކޮށް ފިޔަވަޅު އެޅިފައިނުވާ ކަމަށެވެ. އޭގެ ބަދަލުގައި ފެންނަނީ ފުލުހުން ބޭނުންކޮށްގެން ބޮޑެތި ޖަރީމާތަކެއް ހިންގާތަން ކަމަށް އޭނާ ތުހުމަތުކުރެއްވި އެވެ.
ރިޔާޒް ފާހަގަކުރެއްވި ކަންކަމުގެ ތެރޭގައި މާލޭގައި އިންދި ފެން ފޯއް ރުއްތައް ކަނޑާލި މައްސަލަ އާއި، ކުރީގެ ޑިފެންސް މިނިސްޓަރު މުހައްމަދު ނާޒިމްގެ އެޕާޓްމަންޓުން ފިސްތޯލަ ފެނުނު މައްސަލާގައި ފުލުހުންނަށް ކުރެވޭ ތުހުމަތުތައް ތަހުގީގު ނުކުރެވުން ހިމެނެ އެވެ. ރިޔާޒް ވިދާޅުވި ގޮތުގައި ސަރުކާރުން މަސައްކަތް ކުރަނީ ފުލުހުން ބޭނުންކޮށްގެން ސިޔާސީ އެޖެންޑާއެއް ހާސިލް ކުރާށެވެ.
"މިނިވަންކަމާއެކު ތަހުގީގެއް ހިންގުމުގެ މިނިވަންކަމެއް ފުލުހުންނަކަށް ނެތް. މިއަދު މި ހާލަތުގައި އޮއްވާ، ފުލުހުން ބޭނުންކޮށްގެން ސަރުކާރުގެ ސިޔާސީ އެޖެންޑާއެއް ހާސިލް ކުރަން މިއުޅެނީ،" އޭނާ ވިދާޅުވި އެވެ.
ހުއްދަ ހޯދުމެއް ނެތި މާލޭގައި މުޒާހަރާ ކުރެވޭނީ ހޯމް މިނިސްޓްރީން ކަނޑައަޅާ ތަންތަނުގައި އެކަނި ކަމަށް ގާނޫނުގައި ހިމަނަން، އެއްވެ އުޅުމުގެ ގާނޫނަށް ގެނައި އިސްލާހަށް ރިޔާޒް ވަނީ ފާޑު ވިދާޅުވެފަ އެވެ.
އޭނާ ވިދާޅުވީ ހުއްދައެއް ކުރިން ހޯދުމަކާ ނުލާ އެއްވެ އުޅުމުގެ މިނިވަންކަން ދިވެހި ކޮންމެ ރައްޔިތަކަށް ލިބިގެންވާ ކަމަށް ގާނޫނުއަސާސީގައި ބަޔާންކޮށްފައިވާ ކަމަށެވެ. އަދި ގާނޫނުއަސާސީގެ 16 ވަނަ މާއްދާގެ ދިފާއުގައި ސަރުކާރަށް ތާއީދު ކުރައްވާ މެމްބަރުން ވާހަކަ ދައްކަވާއިރު، އޭގައި އޮންނާނީ ގާނޫނުތައް ހަދަން ވާނީ ގާނޫނުއަސާސީއާ ތައާރަޒްނުވާ ގޮތެއްގެ މަތިން ކަމަށް އޭނާ ވިދާޅުވި އެވެ.
މި އިސްލާހާ ދެކޮޅު ހައްދަވަމުން ރިޔާޒް ވިދާޅުވީ ފުލުހުންގެ މުއައްސަސާއަކީ ރައްޔިތުންގެ ރައްކާތެރިކަމަށް މަސައްކަތް ކުރަން ޖެހޭ މުއައްސަސާއަކަށް ހަދަން ސަރުކާރުން ފުރުސަތު ދޭން ޖެހޭ ކަމަށެވެ.
"މި މަޖިލީހުން އެބަޖެހޭ ފުލުހުންގެ ގާނޫނަށް ބަދަލު ގެނެސްގެން ފުލުހުންގެ މުއައްސަސާއަކީ ރައްޔިތުންގެ ރައްކާތެރިކަމަށް މަސައްކަތް ކުރާ، މިނިވަން މުއައްސަސާއެއްގެ ގޮތުގައި ހަދަން. މި ފުރުސަތު ނުލިބޭތީ ރައްޔިތުންނަށް ނެތް ރައްކާތެރިކަމެއް،" ރިޔާޒް ވިދާޅުވި އެވެ.
މާފަންނު ދެކުނު ދާއިރާގެ މެމްބަރު އަބްދުﷲ ރިފާއު ހުށަހެޅުއްވި އެ އިސްލާހަށް ބަހުސް ކުރެއްވި އެމްޑީޕީ މެމްބަރުން ވެސް ވިދާޅުވީ މިއީ ގާނޫނުއަސާސީއާ ހިލާފަށް ހުށަހަޅައިގެން އުޅޭ އިސްލާހެއް ކަމަށެވެ. އަދި މި ފަދަ އިސްލާހުތަކަށް ވޯޓު ދެއްވާ މެމްބަރުންނާ މެދު ފިޔަވަޅު އެޅޭނެ ކަމަށް މެމްބަރުން ވިދާޅުވި އެވެ.
ރިފާއު ހުށަހެޅުއްވި އިސްލާހުގައިވާ ގޮތުން މާލޭގައި މުޒާހަރާ ކުރެވޭނީ ނުވަތަ ހިނގާލުމެއް ނުވަތަ އުޅަނދު ބުރެއް ބޭއްވޭނީ މިނިސްޓްރީން ކަނޑައަޅާފައިވާ ތަންތަނުގައި އެކަންޏެވެ. ބިލް ގާނޫނަކަށް ވާތާ 30 ދުވަހުގެ ތެރޭގައި، އެއްވެ އުޅެވޭނެ ތަންތަނުގެ ލިސްޓެއް ހަދައި، ގެޒެޓް ކުރަން ޖެހެ އެވެ.