14 ނޮވެމްބަރ 2018 - 11:22
ސްރީ ލަންކާގެ ކުންފުންޏެއް ކަމަށްވާ އެންޕީއެޗުން ހުޅުމާލޭގައި ތަރައްގީ ކުރާ ޒަމާނީ އެޕާޓްމަންޓް ކޮމްޕްލެކްސް، އަކުއާ ވީޓާ ރެސިޑެންސީގެ ޑިޒައިން ރޭ އިފްތިތާހުކޮށްފި އެވެ.
ހުޅުމާލޭގައި ދުވާ ޓްރެކް އަޅާފައިވާ ދަނޑުގެ އުތުރު ފަރާތުގައި އޮތް ހުސް ބިމުގައި ހަދާ މި އެޕާޓްމަންޓްގެ ޑިޒައިން އާންމުކޮށް ދައްކާލެއްވީ އާޓް ގެލެރީގައި ބޭއްވި ރަސްމިއްޔާތުގައި އެންޕީއެޗް ޑިވެލޮޕްމަންޓް ޕްރައިވެޓް ލިމިޓެޑްގެ ޑިރެކްޓަރު ޕްރަސާން ލިއަނަގޭ އެވެ.
އެ ރަސްމިއްޔާތުގައި ވާހަކަ ދައްކަވަމުން ލިއަނަގޭ ވިދާޅުވީ އެ އެޕާޓްމަންޓްތަކުގެ ޑިޒައިން ފަރުމާކުރީ ރާއްޖޭގެ ސަގާފަތާއި ގުދުރަތީ ރީތިކަމަށް ބަލާފައި ކަމަށެވެ.
އަކުއާ ވީޓާ ރެސިޑެންސީގެ މަސައްކަތް ނިންމަން ކަނޑައަޅާފައި ވަނީ 2020 އަށެވެ. ކޮންމެ ފަންގިފިލާއެއްގައި އަށް އެޕާޓްމަންޓް ހުންނަ އިރު އިމާރާތުގެ ހުސް މިނަކީ 14 ބުރި އެވެ.
ދެ ބެޑްރޫމް އާއި ތިން ބެޑްރޫމްގެ އެޕާޓްންޓްތަކުގެ ފެށޭ އަގު އުޅެނީ 3.1 މިލިއަން ރުފިޔާގަ އެވެ. އެޕާޓްމަންޓް ގަތުމުގެ ފުރުސަތު މިހާރު ވަނީ ހުޅުވާލައިފަ އެވެ.
މި ތަނުގައި ސުވިމިން ޕޫލާއި، އެންމެ ޒަމާނީ ޖިމްއަކާއި ކްލަބް ހައުސްއެއްގެ އިތުރުން، ޕާޓީ ހޯލެއް ވެސް ހިމެނެ އެވެ.