14 ނޮވެމްބަރ 2018 - 07:03
ފޯނަކީ ހަމައެކަނި މުއާސަލާތީ ބޭނުމަށް ގެންގުޅޭ އެއްޗެއް ނޫނެވެ. ތިމާގެ ޒަރޫރީ ކިތަންމެ ކަމެއް ފޯނާ ގުޅިފައިވެއެވެ. ވީއިރު ފޯނު ފުރިހަމަ ޗާޖާއެކު ބާއްވަން މަޖުބޫރެވެ. މިކަމަށްޓަކައި ދުނިޔޭގައި އެކި ނަންނަމުގައި އެކި މަރުކާގެ ޗާޖަރުތައް ލިބެން އެބަހުއްޓެވެ. ކަރަންޓާ ޖަހައިގެންނާއި ކަރަންޓާ ނުގުޅާ ބޭނުންކުރެވޭނެ ޗާޖަރު ވެސް ހުރެއެވެ.
އެކަމަކު ހިފައިގެން ޖީބަށްލައިގެން ގެންދެވޭނެ ޗާޖަރެއް ދަންނަންހެއްޔެވެ؟ ޓައިނީ ޖޫސްގެ މައިގަނޑު މަގްސަދަކީ ހިނގަހިނގާ ހުންނައިރު ވެސް ފޯނު ޗާޖުކުރުމެވެ.
ބޭނުން ތާކަށް އުފުލޭނެ، ބޭނުން ތާކަށް ގެންދެވޭނެ ޗާޖަރުތައް މަދެއް ނޫނެވެ. ޓައިނީޖޫސް ޚާއްސަވަނީ މިފަދަ އެންމެ ކުޑަ ޗާޖަރަށްވީތީއެވެ. ބަރުދަނުގައި 105 ގްރާމް ހުންނަ މި ޗާޖަރަކީ ބޭނުންވުމުން ފޯނުގެ ނުފުށުގައި ތަތްކޮށްލެވޭ ގޮތަށް ފަރުމާކޮށްފައިވާ ޗާޖަރެކެވެ. ބޯމިނުގައި 2.5 އިންޗި، ދިގުމިނުގައި 3 އިންޗި ހުންނަ މިޗާޖަރު ފޯނުގައި ތަތްކޮށްލެވެނީ ނެނޯ ސަކްޝަންގެ އެހީގައެވެ. އެހެންވެ ފޯނު ޗާޖަރަށް ޖަހައިގެން ނެއްޓިދާނެކަމުގެ ބިރެއް ނެތެވެ. ފޯނާ ވަކިވެގެން ދޫވެގެން ވެއްޓިދާނެތީ ކަންބޮޑުވާކަށް ވެސް ނުޖެހެއެވެ.
ޓައިނީޖޫސްއަކީ އޭގެ ނަމުން ވެސް ދޭހަވާ ފަދައިން ފޯނަށް ހަކަތަ ހޯދައިދޭ ކުޑަކުޑަ ބާރެކެވެ. އައިފޯން އެކްސްއެސް މެކްސްއަކަށްވުރެ ދެބައިކުޅަ އެއްބައި ލުޔެވެ. ބެލެވޭ ގޮތުގައި މިއީ މިވަގުތު ބާޒާރުގައި ލިބެން ހުރި އެންމެ ކުޑަ އަދި އެންމެ ލުއި ޗާޖަރެވެ. އެންމެ ފަހުގެ ޗާޖަރުތަކެކޭ އެއްފަދައިން ޓައިނީޖޫސް ވެސް ފަރުމާކޮށްފައިވަނީ މި އިންޑަސްޓްރީގެ އެންމެ މަތީ ދަރަޖަ ދެވިފައިވާ ކިޔުއައި ފެންވަރަށް ފޯނު ޗާޖުކުރެވޭ ގޮތަށެވެ. ފޯނު ޗާޖަރެއްގެ އިތުރުން މިއީ ފޯން ހަރަކަށްވެސް ފުދެއެވެ. ޗާޖަރުގައި އަޅުވާފައިވާ ބޮޅަކީ ބޭނުންނަމަ ޗާޖުކުރަމުން ފޯނު އުފުލާއިރު ފަސޭހައަކަށް އިނގިލިވެސް އަޅުވާލެވިދާނެ ބޮޅެކެވެ.
ޓައިނީޖޫސް ޕަވަ ބޭންކަކީ ގިނަ މަރުކާތަކުގެ ފޯނު ޗާޖުކުރުމުގެ ބާރު ލިބިފައިވާ ޗާޖަރެކެވެ. އޭގެ ތެރޭގައި އައިފޯނާއި ސެމްސަންގްގެ ގިނަ ވާޝަންތަކުގައި މި ބޭނުންކުރެވެއެވެ.