11 ނޮވެމްބަރ 2018 - 14:22
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ޖެނެރަލް ސެކްރެޓަރީގެ މަގާމަށް ކުރިން ވެސް އެ މަގާމް ފުރާފައިވާ މުހައްމަދު ޝާފީ ހަމަޖައްސައިފި އެވެ.
ވީއޭއެމްގެ ޖެނަރަލް ސެކްރެޓަރީގެ މަގާމު އިއްޔެ އާ ހަަމައަށް ފުރަމުން އައީ ގައުމީ އަންހެން ވޮލީބޯޅަ ޓީމުގެ ކޯޗު އަހުމަދު އަދީލް (ބޭބެ) އެވެ. ބޭބެ ދެން ފެންނާނީ ވޮލީބޯޅަ ޑިވޮލޮޕްމެންޓް ދާއިރާ އިން ކަމަށް ވަނީ ބުނެފަ އެވެ.
ވީއޭއެމްގެ ރައީސް މުހައްމަދު ލަތީފްއާ އެކު ކުރިން މަސައްކަތް ކުރުމަށް ފަހު ޝާފީ އެ އިދާރާގެ ކަންތައްތަކާ ދުރުވީ މިދިޔަ އަހަރުގެ އިންޓަ ރިސޯޓް ވޮލީބޯޅަ މުބާރާތުގައި ހިނގާދިޔަ ކަންތައްތަކަަށް ފަހު އެވެ. އެ މުބާރާތުގެ ޒޯން ފަހެއްގެ ފައިނަލުގައި ސޮނޭވާފުށްޓާއި އަނަންތަރާ ކިހާވަށް ވިލާސް ސޮނޭވާފުށީގައި ކުޅެން އޮތް ފައިނަލް މެޗަށް ވޮލީބޯޅަ އެސޯސިއޭޝަނުގެ އިސް އޮފިޝަލުންތަކަށް އެ ރަށަށް އެރުމުގެ ހުއްދަ ނެތް ކަމަށް ބުނެ ޖެހުނު މައްސަލަ އަށް ފަހު ޝާފީ ވަނީ ވީއޭއެމުން ވަކިވެފަ އެވެ.
ޝާފީ މީގެ ކުރިން ފެނުނީ ވީއޭއެމްގެ މާކެޓިންގް އެންޑް ޕްރޮމޯޝަންގެ ޑިރެކްޓަރުގެ މަގާމުންނެވެ. އޭރު އޭނާ ވަނީ އިންޓަ ރިސޯޓް މުބާރާތުގެ ޗެއާމަންގެ މަގާމާއި މިދިޔަ އަހަރު ރާއްޖޭގައި އޮތް އޭވީސީ އަންހެން މުބާރާތުގެ ކޮލިފައިންގެ ކަންތައްތަކުގައި އިސްކޮށް ހަރަކާތްތެރިވެފަ އެވެ.
މީގެ ކުރިން ޝާފީ ވަނީ ދެ ފަހަރެއްގެ މަތިން ވީއޭއެމްގެ ރައީސަކު ހޮވާ އިންތިހާބުގައި ވާދަ ކޮށްފަ އެވެ. އެ ގޮތުން މީގެ ދެ އަހަރު ކުރިން އޮތް އިންތިހާބުގައި ވާދަކުރުމަށް ނިންމި ނަމަވެސް ފަހުން ނަން އަނބުރާ ގެންދިޔަ އެވެ. އޭގެ ކުރިން އޭނާ ވަނީ 2012 ވަނަ އަހަރު ވީއޭއެމްގެ އިންތިހާބުގައި ވާދަކޮށްފަ އެވެ.
ވީއޭއެމްގެ ހިންގާގޮތާ މެދު ފަހަކަށް އައިސް ގިނަ ބަޔެއްގެ ފާޑުކިޔުން ގިނަވެފައިވަނިކޮށް އެ އެސޯސިއޭޝަނުގެ ސީނިއާ ނައިބު ރައީސެއްގެ މަގާމުގައި ހުންނެވި ކުރީގެ ކުޅުންތެރިޔާ މުހައްމަދު ރަނޭޝް (ރަނޭ) ވަނީ މަގާމުން އިސްތިއުފާ ދެއްވައިފަ އެވެ. އޭނާ އެ މަގާމުން ދުރުވީ ވީއޭއެމްގެ ލީޑަޝިޕަށް ވަރަށް ބޮޑަށް ފާޑުވިދާޅުވުމަށް ފަހު އެވެ.