07 ނޮވެމްބަރ 2018 - 14:17
އެމެރިކާ ކުންފުނި "ޑަންކަން ހައިންސް"ގެ ހަތަރު ބާވަތެއްގެ ކޭކު މިކްސްގައި ނަޖިހެއް އެކުލެވިފައިވާ ކަމަށް ލަފާ ކުރެވޭތީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އެ ތަކެތި ވިއްކުން މަނާކޮށްފި އެވެ.
ޑަންކަން ހައިންސް ބްރޭންޑުގެ ކޭކް މިކްސްތަކުގައި އެކުލެވިފައިވަނީ "ސަލްމޮނެއްލާ" ކިޔާ ބައްޔެއް ފަތުރާ ޖަރާސީމެކެވެ. މި ބައްޔަކީ ވަކިން ހާއްސަކޮށް ކުޑަކުދިންނަށް ނުރައްކާތެރި ބައްޔެކެވެ. މި ބަލި ޖެހޭ މީހުން އާންމު ގޮތެއްގައި ހުން އައިސް، ހޮޑުލައި، ބޭރަށް ހިންގުމުގެ އިތުރުން ބަނޑުގައި ރިއްސުން ތަހައްމަލު ކުރާނެ އެވެ.
ސަލްމޮނެއްލާ ޖަރާސީމު އެކުލެވިފައިވާ ކަމަށް ލަފާކުރެވެނީ ޑަންކަން ހައިންސްގެ "ކްލެސިކް ވައިޓް ކޭކް" މިކްސް، "ކްލެސިކް ޔެލޯ ކޭކް" މިކްސް، "ބަޓާ ގޯލްޑެން ކޭކް" މިކްސް އަދި "ސިގްނޭޗާ ކޮންފެޓީ ކޭކް" މިކްސް ކަމުގައި އެމްއެފްޑީއޭ އިން ބުންޏެވެ. އަދި މި ޖަރާސީމު އެކުލެވިފައިވާ ބެޗުގެ ކޭކުތައް ރާއްޖޭގެ ބާޒާރުގައި އެބަހުރި ކަމަށާއި، އެހެންކަމުން އެ ތަކެތި ބާޒާރުން ނެގުމަށް އެ މުއާސަސާއިން އެދިފައިވެ އެވެ.
"މި ބެޗް ނަންބަރުގެ ކޭކް މިކްސްތައް ވެސް ރާއްޖޭގެ ބާޒާރުގައި އެބަހުރި. އެހެންވެ އަޅުގަނޑުމެން އެ އެއްޗެހި ރިކޯލް ކުރަން މި ގޮވާލީ،" އެމްއެފްޑީއޭގެ މީޑިއާ އޮފިޝަލަކު ވިދާޅުވި އެވެ.
މީގެ އިތުރުން މި އުފެއްދުންތައް ފިހާރަތަކުން ވިއްކާކަން ފާހަގަ ކުރެވިއްޖެ ނަމަ އެ ކަން އެމްއެފްޑީއޭ އަށް އެންގުމަށް ވެސް އެ ތަނުން ގޮވާލާފައި ވެއެވެ.
އޭނާ ވިދާޅުވި ގޮތުގައި މި ކޭކު މިކްސްގެ މައްސަލަ ކުރިން ވެސް އެތަނުން ތަހްގީގު ކުރި އެވެ. އެ ބައްޔާއި އެ ކޭކް މިކްސްތަކާ ހުރި ގުޅުން އެމެރިކާގެ ފުޑް އެން ޑްރަގް އޮތޯރިޓީން އިއްޔެ ގޮވާލުމުން، އެ ތަކެތި ބާޒާރުން ނެގުމުގެ މައްސަލަ ފެށީ ކަމަށް ވެސް އޭނާ ވިދާޅުވި އެވެ.
އެސްޓީއޯ އިން ރާއްޖެ އެތެރެކޮށްގެން ވިއްކާ ފުށް ބެޗެއްގައި ތަފާތު ވަހަކާއި ރަހައެއް އެކުލަވާލާފައި ވުމުން އެ ތަކެތި ބާޒާރުން ނެގުމުގެ މަސައްކަތް ވެސް އިއްޔެ އެމްއެފްޑީއޭ އިން ކޮށްފައި ވެއެވެ.