05 ނޮވެމްބަރ 2018 - 14:32
ވޮޝިންޓަން (ނޮވެމްބަރު 5) - އިސްތަންބޫލްގައި ހުންނަ ސައުދީ ކޮންސިއުލޭޓް ތެރޭ މަރާލި ނޫސްވެރިޔާ ޖަމާލް ޚާޝުހްޖީގެ ދަރިން ބޭނުން ވަނީ ބައްޕަގެ ހަށިގަނޑު މަދީނާގައި ވަޅުލަން ކަމަށް ބުނެފި އެވެ.
ސީއެންއެން އަށް ދިން އިންޓަވިއުއެއްގައި ސަލާހު އަދި އަބްދުﷲ ޚާޝުގްޖީ ބުނީ ބައްޕަގެ ހަށިގަނޑުވީ ތަނެއް ބަލަން އެ މީހުން ބޭނުންވާ ކަމަށެވެ.
"އެއީ އާދައިގެ މަރެއް ނޫން. އަޅުގަނޑުމެން އެންމެން ވެސް ބޭނުން ވަނީ ބައްޕަގެ ހަށިގަނޑު އާއިލާގެ އެހެން މެންބަރުންނެކޭ އެއްގޮތަށް މަދީނާގައި ވަޅުލަން،" ސަލާހު ޚާޝުގްޖީ ބުންޏެވެ. "ބައްޕަ މަރުވިކަން ގަބޫލްކުރަން އަދިވެސް ދަތި.
ސައުދީ ސަރުކާރަށް ފާޑުކިޔަމުން ދިޔަ ވޮޝިންޓަން ޕޯސްޓުގެ ކޮލަމިސްޓް މަރާލީ މިދިޔަ މަހު 2 ވަނަ ދުވަހު ސައުދީ ކޮންސިއުލޭޓަށް ވަން ފަހުންނެވެ. މަރުގެ ތަހުގީގު ތުރުކީގެ އޮފިޝަލުން ކުރިއަށް ގެންދިޔަ ނަމަވެސް ޚާޝުގްޖީގެ ހަށިގަނޑު ވީތަނެއް ނޭނގެ އެވެ.
މިދިޔަ މަހު 24 ވަނަ ދުވަހު ސަލާހް ވަނީ ސައުދީ ރަސްގެފާން ސަލްމާން އާއި ވަލީ އަހުދު މުހައްމަދާ ރިޔާޒުގައި ބައްދަލުކޮށްފަ އެވެ. އޭގެ އެއް ދުވަސް ފަހުން އޭނާ ވަނީ އެމެރިކާ އަށް ފުރައިފަ އެވެ.