03 ނޮވެމްބަރ 2018 - 16:17
ދުނިޔޭގެ ފުރަތަމަ މޫދު އަޑީގެ ވިލާ، ކޮންރެޑް މޯލްޑިވްސް ރަންގަލި އައިލެންޑްގައި ހުޅުވައިފި އެވެ.
ޒަމާނީ ޓެކްނޮލޮޖީގެ އެހީގައި ފަރުމާކޮށް، ކޮންރެޑް ރިސޯޓުގެ މޫދު އަޑީގައި ހެދި ވިލާ އަށް ކިޔަނީ 'ދަ މުރަކަ' އެވެ. އެ ވިލާ ފަރުމާ ކުރުމުގައި އިސްކޮށް ހަރަކާތްތެރިވީ ކްރައުން ކުންފުނީގެ އެއް ޑިރެކްޓަރު އަދި އާކިޓެކްޓް، އަހުމަދް ސަލީމެވެ.
ދެ ބުރިއަށް ޑިޒައިންކޮށްފައިވާ "ދަ މުރަކަ" ހަދަން 15 މިލިއަން ޑޮލަރު (231 މިލިއަން ރުފިޔާ) ހޭދަކުރި އެވެ. އެތަނުގައި ރެއެއް ހޭދަކޮށްލުމުގެ އަގަކީ 50،000 ޑޮލަރެވެ.
ވިލާގެ މަތީ ބައި ހުންނަނީ މޫދު މަތީގަ އެވެ. މޫދު ފަސް މީޓަރު އަޑީގައި ހުންނަނީ ނިދާ ކޮޓަރި އެވެ. އެ ބައި ހެދީ ސިންގަޕޫރުގަ އެވެ.
މިމަހު އެއް ވަނަ ދުވަހު ފަތުރުވެރިންނަށް ހުޅުވާލީ 'ދަ މުރަކަ'އަށް މިހާރު ވެސް ފަތުރުވެރިންގެ ސަމާލުކަން ވަނީ ހުއްޓިފަ އެވެ. އަދި ދުނިޔޭގެ ބައެއް މީޑިއާތަކުން އެތަނާ ބެހޭ ގޮތުން އަންނަނީ ޚަބަރު ފަތުރަމުންނެވެ.
'ދަ މުރަކަ' އަކީ މޫދު އަޑީގައި ހަދާ ގޮތަށް ސަލީމް ޑިޒައިންކުރެއްވި ދެ ވަނަ ތަނެވެ. ކޮންރެޑް ރިސޯޓުގެ މޫދު އަޑީގައި ހަދާފައިވާ "އިތާ" އަކީ ވެސް އޭނާގެ ޑިޒައިނެވެ. މިއީ ދުނިޔޭގެ ފުރަތަމަ މޫދު އަޑީގެ ރެސްޓޯރެންޓެވެ.
ރާއްޖޭގެ ޓޫރިޒަމް ދާއިރާގައި ދުނިޔޭގެ ނަމޫނާއަކަށް ވާ ކަހަލަ ހިތްގައިމު އެތައް ތަނެއް މިހާރު ހިމެނެ އެވެ. އަދި ކުރިއަށް އޮތް ތަނުގައި ވަރަށް ތަފާތު ޑިޒަައިންތަކުގެ ރިސޯޓްތައް ވެސް އަންނަނީ ހަދަމުންނެވެ.