13 އޯގަސްޓް 2016 - 08:37
ބީނޯސް އޭރީޒް (އޮގަސްޓް 13) - ކޮޕާ އެމެރިކާގެ ނާކާމިޔާބީއާ ގުޅިގެން ގައުމީ ޓީމަށް ކުޅުން ހުއްޓާލި އާޖެންޓީނާގެ ކެޕްޓަން ލިއޮނަލް މެސީ އެ ނިންމުން ބަދަލުކޮށް އަލުން ގައުމީ ޓީމަށް ކުޅެން ނިންމައިފި އެވެ.
ވޯލްޑް ކަޕް ކޮލިފައިންގައި ސެޕްޓެމްބަރު ކުރީކޮޅު އުރުގުއޭ އާއި ވެނެޒުއޭލާއާ ދެކޮޅަށް ކުޅޭ އާޖެންޓީނާގެ ސްކޮޑުގައި މެސީގެ ނަން ވަނީ ހިމަނައިފަ އެވެ. މެސީއާ ހަވާލާދީ އާޖެންޓީނާގެ ނޫސްތަކުން ބުނާ ގޮތުގައި އޭނާ ގައުމީ ޓީމަށް އެނބުރި އަންނަން ނިންމީ ގައުމުގެ ދެކެ ވާ ލޯބިން ކަމަށާއި އަދި ގައުމީ ޓީމަށް އެހީވުމަށް ކަމަށެވެ.
"ފައިނަލަށް ފަހު އަހަރެންގެ ސިކުނޑީގައި ވަރަށް ގިނަ ކަންތައްތައް އެނބުރުނު. ކުޅުން ހުއްޓާލުމާ މެދު ވަރަށް ސީރިއަސްކޮށް ވިސްނިން. އެކަމަކު ގައުމާއި މި ޖާޒީ ދެކެ ވާ ލޯބި އެއަށް ވުރެ ބޮޑު. އާޖެންޓީނާގެ ފުޓްބޯޅައިގެ ވަރަށް ގިނަ ކަންކަން ބަދަލުކުރަން ޖެހޭ. އަހަރެން އެކަން ކުރަން ބޭނުންވަނީ ޓީމުގެ އެތެރޭގައި ހުރެ،" މެސީ ބުނި ކަމަށް ރިޕޯޓްކޮށްފައިވެ އެވެ.
މެސީ އަނބުރާ އައިއިރު، އެކަމަށް އާޖެންޓީނާގެ ގިނަ ބަޔަކު ވަނީ އެދިފަ އެވެ. އަދި އާޖެންޓީނާގެ ރައީސް ވެސް ވަނީ ސީދާ މެސީ ގާތު، އަލުން ގައުމީ ޓީމަށް ކުޅެން އައުމަށް އެދިވަޑައިގެންފަ އެވެ. މީގެ އިތުރުން އާޖެންޓީނާގެ އާ ކޯޗު އެޑްގާޑޯ ބައުޒާ ވެސް ވަނީ މެސީ އަށް ޓީމަށް އައުމަށް ދައުވަތު ދީފަ އެވެ.
އުމުރުން 29 އަހަރުގެ މެސީ ގައުމީ ޓީމަށް ކުޅުން ހުއްޓާލިކަން އިއުލާންކުރީ ކޮޕަ އެމެރިކާގެ ފައިނަލުގައި ޖޫން 27 ގައި ޗިލީ އަތުން ޕެނަލްޓީ ޖަހައިގެން ބަލިވި މެޗަށް ފަހު ނޫސްވެރިންނާ ވާހަކަދައްކަމުންނެވެ. ޕެނަލްޓީ ޖަހައިގެން 4-3 އިން އާޖެންޓީނާ ބަލިވިއިރު މެސީގެ ޕެނަލްޓީ ވަނީ ނާކާމިޔާބުވެފަ އެވެ. ޗިލީގެ ފުރަތަމަ ޕެނަލްޓީ އާޖެންޓީނާ ކީޕަރު ސޭވްކޮށް އެ ޓީމަށް ލީޑު ނަގަން ލިބުނު ފުރުސަތު ބޭކާރުވީ މެސީގެ ޕެނަލްޓީ ނުވަނުމުންނެވެ.
މެސީގެ ކެޕްޓަންކަމުގެ ދަށުން އާޖެންޓީނާ ވަނީ 2014 ވަނަ އަހަރުގެ ވޯލްޑް ކަޕުގެ ފައިނަލުން އަދި މި ދެ އަހަރުގެ ކޮޕަ އެމެރިކާގެ ފައިނަލުން ބަލިވެފަ އެވެ. އޭގެ ކުރިން 2007 ވަނަ އަހަރުގެ ކޮޕާ އެމެރިކާގެ ފައިނަލުން ވެސް އާޖެންޓީނާއާ އެކު އޭނާ އަށް ވަނީ ނާކާމިޔާބީއާ ކުރިމަތިވެފަ އެވެ.
އާޖެންޓީނާއާ އެކު އޭނާ އަށް ހޯދުނު ކާމިޔާބީތަކަކީ 2005 ވަނަ އަހަރުގެ ޔޫތު ވޯލްޑް ކަޕް ކާމިޔާބުކުރުމާއި 2008 ވަނަ އަހަރުގެ އޮލިމްޕިކްސް ރަން މެޑަލް ހާސިލްކުރުމެވެ. އެކަމަކު ސީނިއާ ޓީމާ އެކު ބޮޑު ކާމިޔާބެއް ހޯދިފައެއް ނުވެ އެވެ. އޭނާ އަށް 2006 ވަނަ އަހަރުގެ ވޯލްޑް ކަޕުގައި ބެންޗުން ފުރުސަތު ލިބުނުއިރު 2010 ވަނަ އަހަރުގެ ވޯލްޑް ކަޕުގައި ފުލްކޮށް ކުޅުނެވެ. އެކަމަކު އެ ފަހަރު ކުއާޓާ ފައިނަލުން ޖަރުމަން އަތުން ބަލިވެ ކެޓީ އެވެ. އޭގެ ފަހުން 2014 ވަނަ އަހަރުގެ ވޯލްޑް ކަޕުގެ ފައިނަލަށް ދަތުރުކުރި ނަމަވެސް ޖަރުމަން އަތުން އަނެއްކާވެސް ބަލިވީ އެވެ.
ގައުމީ ޓީމަށް 2005 ވަނަ އަހަރުން ފެށިގެން 112 މެޗު ކުޅެ 55 ގޯލް ޖަހައިދީފައިވާ މެސީ އަކީ އާޖެންޓީނާ ގައުމީ ޓީމަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާ އެވެ. އެކަމަކު ޑިއޭގޯ މަރަޑޯނާ އާއި ގެބްރިއަސް ބަޓިސްޓޫޓާ ފަދަ ކުޅުންތެރިން ގައުމީ ޓީމާ އެކު ހޯދި ކާމިޔާބީ އޭނާއަށް ނުހޯދޭތީ ފާޑުކިޔުން ވަނީ އަމާޒުވެފަ އެވެ. އޭނާ ވަނީ ކްލަބް ލެވެލްގައި ބާސެލޯނާއާ އެކު ގިނަ ކާމިޔާބީތަކެއް ހާސިލްކޮށްފަ އެވެ.