28 އޮކްޓޯބަރ 2018 - 08:53
ލެސްޓާ (އޮކްޓޯބަރު 28) – ޕްރިމިއާ ލީގުގައި ރޭ ވެސްޓް ހޭމް ޔުނައިޓެޑާއި ލެސްޓާ ސިޓީ 1-1 އިން އެއްވަރުވި މެޗަށް ފަހު ލެސްޓާގެ ވެރިޔާ ތައިލެންޑުގެ ބިލިއަނަރު ވިޗާއީ ސްރިވަދަނަޕްރަބާގެ ހެލިކަޕްޓަރު ސްޓޭޑިއަމް ކައިރިއަށް ވެއްޓިއްޖެ އެވެ.
މި ބޯޓުގައި ސްރިވަދަނަޕްރަބާ ހުންނެވި ކަމަށް ރިޕޯޓްތައް ބުނެ އެވެ. އެކަމަކު އޭނާ އަށް ވެސް އަދި އެހެން މީހަކަށް ވެސް ގެއްލުމެއް ލިބުނު ކަމުގެ ރިޕޯޓެއް ނެތެވެ. އަދި ބޯޓުގައި ތިބި ފަސިންޖަރުންގެ އެއްވެސް ތަފްސީލެއް ހާމައެއް ނުކުރެ އެވެ.
ބޯޓު ވެއްޓުނީ ސްޓޭޑިއަމް ކައިރީގައި ހުރި ކާރު ޕާކިން ޒޯނަކުން ނައްޓާލި ތަނުންނެވެ. މަންޒަރު ދުށް މީހަކު ބުނި ގޮތުގައި ބޯޓުގެ ހަރަކާތް ހުއްޓި އެންމެ ފަހުން ކޮންޓްރޯލެއް ނެތި ތިރިވީ ކަމަށާއި އެ ވަގުތު އެއްޗެއް ގޮވި އަޑު އިވި ބޮޑު އަލިފާންގަނޑެއް ފެނުނު ކަމަށެވެ.
ތައިލެންޑުގެ ކިންގް ޕަވާ ކޮމްޕެނީގެ ވެރިޔާ ވިޗާއީ ލެސްޓާ ސިޓީ ބައްލަވައިގަތީ 2010 ވަނަ އަހަރު 39 މިލިއަން ޕައުންޑަށެވެ. އެ ޓީމުން 2016 ވަނަ އަހަރު ޕްރިމިއާ ލީގު ކާމިޔާބުކުރުމަކީ ފުޓްބޯޅަ ތާރީހުގައި ވެސް ފެނުނު އެންމެ ހައިރާންކުރުވަނިވި އެއް ނަތީޖާ އެވެ. އެ ކާމިޔާބީއާ އެކު ލެސްޓާ އަށް އެތައް ބަޔެއްގެ ލޯތްބާއި އިހުތިރާމް ލިބުނެވެ.