26 އޮކްޓޯބަރ 2018 - 22:46
ކޮލަމްބޯ (އޮކްޓޯބަރު 26) - ސްރީ ލަންކާގެ ރައީސް މައިތުރިޕާލާ ސިރިސޭނާ އަވަހާރަކޮށްލަން ރޭވި މައްސަލާގައި ފުލުހުންގެ ސީނިއާ އޮފިސަރަކު ހައްޔަރުކޮށްފި އެވެ.
ފުލުހުންގެ ތަރުޖަމާން ރުވާން ގުނަސެކަރަ ވިދާޅުވީ ކްރިމިނަލް އިންވެސްޓިގޭޝަން ޑިވިޝަނުން ހައްޔަރުކޮށްފައި ވަނީ ކައުންޓަ ޓެރަރިޒަމް ޑިވިޝަން ހިންގުމާ ހަވާލުވެ ހުންނެވި ނަލަކަ ޑި ސިލްވާ ކަމަށެވެ. ހައްޔަރު ކުރުމުގެ ކުރިން އޭނާއާ ފުލުހުން ވަނީ ފަސް ދުވަސްވަންދެން ސުވާލުކޮށްފަ އެވެ.
ތަރުޖަމާން ވިދާޅުވީ ޑި ސިލްވާގެ މައްޗަަށް ވަނީ ސިރިސޭނާގެ އިތުރުން ކުރީގެ ޑިފެންސް ސެކްރެޓަރީ ގޮތަބަޔާ ރާޖަޕަކްސާ އާއި ފުލުހުންގެ ސީނިއާ އޮފިސަރުންތަކެއް އަވަހާރަކޮށްލަން އުޅުނު ކަމަށް ތުހުމަތުކޮށްފަ އެވެ.
ފުލުހުން ބުނެފައި ވަނީ ތަހުގީގު ކުރާ ފަރާތްތަކުން މިހާރު މަސައްކަތް ކުރަމުން ދަނީ ޑި ސިލްވާގެ ފޯނުން ޑިލީޓްކޮށްފައިވާ ޑޭޓާ ހޯދުމަށް ކަމަށެވެ.
ސިރިސޭނާ އަވަހަރަކޮށްލަން އުޅޭ ކަމަށް އިންޑިއާގެ ނޫހަކުން ބުނުމާ އެކު ލަންކާ އާއި އިންޑިއާއާ ދެމެދު ވަނީ ނުތަނަވަސްކަން އުފެދިފަ އެވެ. ސިރިސޭނާ އަވަހާރަކޮށްލަން އުޅޭ ކަމަށް އެމަނިކުފާން ތުހުމަތުކޮށްފައި ވަނީ އިންޑިއާގެ އިންޓަލިޖެންސް ސާވިސް އަށް ކަމަށް ނޫހުން ބުނެފައިވެ އެވެ. ނަމަވެސް ނިއު ދިއްލީން ވަނީ އެކަން ދޮގުކޮށްފަ އެވެ.