27 އޮކްޓޯބަރ 2018 - 10:53
މެންޗެސްޓާ (އޮކްޓޫބަރު 27) - މެންޗެސްޓާ ސިޓީ ނޫން އިނގިރޭސި ޓީމަކަށް ކޯޗުކޮށްނުދޭނެ ކަމަށް އެޓީމުގެ ކޯޗު ޕެޕް ގާޑިއޯލާ ބުނެފި އެވެ.
ގާޑިއޯލާ ސިޓީއާ ހަވާލުވީ މީގެ ދެ ސީޒަން ކުރިންނެވެ. ބާސެލޯނާ އާއި ބަޔާން މިއުނިކާ އެކު ގިނަ ކާމިޔާބީތަކެއް ހޯދި ގާޑިއޯލާ އަށް މީގެ ކުރިން މެންޗެސްޓާ ޔުނައިޓެޑްގެ ކޯޗުކަން ހުށަހެޅި އެވެ.
ބާސެލޯނާ ކޯޗުކަން 2012 ވަނަ އަހަރު ދޫކޮށްލުމަށް ފަހު 2013 ވަނަ އަހަރުގެ ޖެނުއަރީ މަހު ގާޑިއޯލާ ވަނީ އެ އަހަރު ޖޫން މަހު ބަޔާންއާ ހަވާލުވާނެ ކަމަށް އިއުލާން ކޮށްފަ އެވެ. ޔުނައިޓެޑްގެ ކޯޗުކަމުން އެލެކްސް ފާގަސަން ވަނީ 2013 ވަނަ އަހަރުގެ މެއި މަހު ވަކިވެފަ އެވެ. އޭރު ފާގަސަން ވަނީ ގާޑިއޯލާ ޔުނައިޓެޑްގެ ކޯޗުކަމަށް ގެންނަން މަސައްކަތް ކޮށްފަ އެވެ.
ގާޑިއޯލާ ސިޓީއާ ހަވާލުވީ 2016 ވަަނަ އަހަރު ޖޫން މަހު އެވެ. މިދިޔަ ސީޒަނުގައި ގާޑިއޯލާގެ އިރުޝާދުގެ ދަށުން ސިޓީން ވަނީ 100 ޕޮއިންޓް ހަމަކޮށް ރެކޯޑަކާ އެކު އިނގިރޭސި ޕްރިމިއާ ލީގުގެ ތަށި އުފުލާލައިފަ އެވެ.
"އަހަރެން ސިޓީ ނޫން އެހެން އިނގިރޭސި ކްލަބަކުން ނުފެންނާނެ. މި ޓީމު ދޫކޮށްލިޔަސް މުޅި އުމުރުގައި އަހަރެން ހުންނާނީ މި ޓީމުގެ ސަޕޯޓަރެއްގެ ގޮތުގައި. ސިޓީގެ މީހުން އަހަރެން ދެކެ ވަރަށް ލޯބިވޭ،" ބީބީސީ އަށް ދިން އިންޓަވިއުއެއްގައި ގާޑިއޯލާ ބުންޏެވެ.
އޭނާ ބުނީ ކޯޗިން ކެރިއަރުގައި މިހާތަނަށް ކުރެވުނު ހުރިހާ މަސައްކަތެއްގެ ތެރެއިން އެންމެ ތަފާތު ކަމެއް ތަޖުރިބާ ކުރެވެނީ ސިޓީގައި ކަމަށެވެ.
"ލަ މާސިއާގައި ޖެހުނީ ޒުވާން ކުޅުންތެރިން ތަމްރީން ކުރަން. ބާސެލޯނާގެ ހެޑް ކޯޗަކަށް އައިއިރު އަހަރެންގެ އަތުގައި އޮތީ ދުނިޔޭގެ އެންމެ ވަރުގަދަ ޓީމު. ބަޔާނަށް އައިއިރު އެ ޓީމަކީ އެ ގައުމުގެ އަދި ޔޫރަޕްގެ ވެސް ޗެމްޕިއަން. އެކަމަކު ސިޓީ އަކީ އިންގްލެންޑްގެ ކުރިއަރަމުން އަންނަ ކްލަބެއް. މި ޓީމަށް އަހަރެން ފުރަތަމަ ހޯދައިދެން ޖެހެނީ ބޮޑެތި ކާމިޔާބީތަކެއް. ގިނަ ބަޔެއްގެ މަގުބޫލުކަން،" ގާޑިއޯލާ ބުންޏެވެ.
މި ފަހަރު ލީގުގައި މިހާތަނަށް ސިޓީ ބަލިނުވެ އެވެ. ލީގުގައި އެ ޓީމުގެ އަތުން ގެއްލުނީ ހަތަރު ޕޮއިންޓެވެ. ގާޑިއޯލާގެ ނަޒަރުގައި މި ފަހަރުގެ ލީގު މިދިޔަ އަހަރަށް ވުރެ އުނދަގުލެވެ.
"މިހާރު ވެސް އެނގިއްޖެ. މި އަހަރު ވަރަށް އުނދަގޫވާނެ. ޓީމުތަކުން ވަރަށް ތަރައްގީކޮށްފި. ޓޭބަލްގެ ކުރި ބަލާލީމަ ވެސް އެނގޭނެ ވާދަވެރިކަން އޮތް މިންވަރު،" އޭނާ ބުންޏެވެ.
ލީގުގައި މާދަމާރޭ ކުޅޭ މެޗުގައި ސިޓީ ރަށުންބޭރުގައި ނުކުންނާނީ ޓޮޓެންހަމް ހޮޓްސްޕާސްއާ ދެކޮޅަށެވެ.