26 އޮކްޓޯބަރ 2018 - 06:37
ޑްރޯންގެ ބާޒާރުގައި އެންމެ ނަން ހިނގާ ކުންފުންޏަކީ ޑީޖޭއައިއެވެ. އެ ކުންފުނީގެ ޑްރޯންތައް މޮޅުވެފައި އަގު ވެސް ބޮޑެވެ. ގެންގުޅެން ފަސޭހަވުމާއި އަގާ އެއްވަރުގެ ފެންވަރު ވެސް މި ޑްރޯންތަކުގެ ކިބައިގަ ހުރެއެވެ. އެކަމަކު އެ ކުންފުންޏާ ކެރިގެން ވާދަކުރާ ކުންފުނިތައް މިހާރު އަންނަނީ އިތުރުވަމުންނެވެ. ޚާއްސަކޮށް ޗައިނާގެ ބާޒާރުގައި މިފަދަ ކުންފުނިތައް ގިނައެވެ. ހަބްސަންއަކީ، ޑީޖޭއައި އަށް ދޫނުކުރާން ގަދައަޅާ މަސައްކަތްކުރާ ކުންފުންޏެކެވެ.
ހަބްސަންއިން އެންމެ ފަހުން ބާޒާރަށް ނެރުނު ޒީނޯއަކީ 4ކޭ ފެންވަރުގެ ވީޑިއޯ ނެގޭ މޮޅު ކެމެރާ ޑްރޯނެކެވެ. ޑީޖޭއައިގެ މެވިކް ސީރީޒްގެ ޑްރޯންތަކެކޭ އެއްފަދައިން ޒީނޯއަކީ ވެސް ފަތްޖަހާލެވޭ ޑްރޯނެކެވެ. މީގެ ބަރުދަނުގައި ހުންނަނީ 700 ގްރާމެވެ. 23 މިނިޓްވަންދެން އުދުހުމުގެ ގާބިލްކަން މިއަށް ލިބިފައިވެއެވެ. އެންމެ ބާރަށް ދަތުރުކުރަނީ ގަޑިއަކު 60 ކިލޯމީޓަރުގެ ބާރުމިނުގައެވެ.
ޒީނޯ ޑްރޯން ޖައްވުތެރެއަށް އުދުއްސާލުމަށް ފަހު ނަގާ ފޮޓޯތަކާއި ވީޑިއޯތައް ވަގުތުން ޓްރާންސްމިޓްކޮށްދެއެވެ. ސިގްނަލް ލިބޭނީ ހަމައެކަނި 1 ކިލޯމީޓަރަށެވެ. އެކަމަކު މި ޑްރޯންގެ ކެމެރާއިން ނަގާ ފޮޓޯތަކާއި ވީޑިއޯތައް ވަރަށް ޗާލެވެ. ކެމެރާގެ ލެންސަށް 89 ޑިގްރީގެ ސަރަހައްދެއް އަރައެވެ. މިއީ މެވިކް އެއާ އަށްވުރެ ތަންފުކެއް ގިނަ މިންވަރެކެވެ. އެންމެ މަތީ ރިޒޮލިޔުޝަންގައި ހުންނަނީ 3840x2160 އެވެ.
ޒީނޯ ފަރުމާކޮށްފައިވަނީ ޖީޕީއެސްއަށް ބަލައިގެން ދަތުރުކުރެވޭ ގޮތަށެވެ. ދުރާލާ ޕްރޮގްރާމްކޮށްގެންނާއި ރިމޯޓުގެ އެހީގައި ވެސް މި ޑްރޯން ދަތުރުކުރެއެވެ. ޝައުގުވެރި މަންޒަރެއް ފެނިއްޖެ ނަމަ، ތަކުރާރުކޮށް އެ މަންޒަރު ކެމެރާއަށް ރައްކާކުރާ ގޮތް ހެދެއެވެ. ސިގްނަލް ގެއްލުމުން އެނބުރި އައުމާއި، އަމިއްލަ ހާލަށް އުދުއްސައިގަތުމާއި ތިރިކުރުން ފަދަ ކަންކަމަށް މި ޑްރޯން ވަނީ ފައްކާކޮށްފައެވެ.
ޑީޖޭއައިގެ މެވިކް ސީރީޒްގެ ޑްރޯންތައް ހާ މި ޒީނޯ ޑްރޯން ފަސޭހަނުވެދާނެއެވެ. އެކަމަކު ސިފަތަކުގައި މާ ބޮޑު ތަފާތެއް ނެތެވެ. ޗައިނާގެ އުފެއްދުމަކަށްވާތީ ޗައިނާ ބަހުން އިގިރޭސި ބަހަށް ތަރުޖަމާކުރުމުގައި ހުންނަ ކިޔަން އުނދަގޫ، ކޮށިގޮތެއް، ޒީނޯގެ އިންސްޓްރަކްޝަން މެނުއަލްގައި ހުންނާނެކަމަށް ބަލަމާ ހިނގާށެވެ. އެކަމަކު މެވިކް ސީރީޒްގެ ޑްރޯންތަކަށްވުރެ މާ ބޮޑުތަންވެސް އަގުހެވެވެ. ޒީނޯގެ އެންމެ ޚާއްސަ ސިފައަކީވެސް މިއެވެ. މީހުންގެ ހިތް ދަމައިގަންނާނެ އެންމެ ބޮޑު ކަމަކަށްވެސް ވާނީ ދުނިޔޭގެ ބާޒާރުގައި މީގެ އަގު 399 އެމެރިކާ ޑޮލަރަށް ހުރުމުންނެވެ.