17 އޮކްޓޯބަރ 2018 - 06:57
ފައިސާ ބޭނުން ނުވާ މީހަކު ހުންނާނެ ހެއްޔެވެ؟ ވީހާ ވެސް ކުޑަ މަސައްކަތެއްކޮށްގެން ބޮޑު ފައިދާއެއް ލިބެން ބޭނުންނުވާނީ ކާކު ހެއްޔެވެ؟ މަދު މީހެކެވެ. އެކަމަކު އަހަރެންގެ ސިކުނޑީގައި އަބަދުވެސް އެ ޚިޔާލުތައް އެނބުރެއެވެ. އެއްދުވަހަކު ނިދިން ހޭލާއިރު އަހަރެން މަހުޖަނަކަށް ބަދަލުވެފައި ހުންނާނެ ނަމަ ކިހާ ރަނގަޅު ހެއްޔެވެ. ނޭނގިހުއްޓައި ކުއްލިއަކަށް އަހަރެން މުއްސަނދިވާނެ ނަމަ ކޮންފަދަ ހެއްޔެވެ. އެ ފަދަ ޚިޔާލުތަކުގައި ކުލަޖެއްސޭތޯ އަހަރެން ނުފުރޮޅާ އެންމެ ގާކޮޅެއް ވެސް ނޯންނާނެއެވެ. އެކަމަކު ކާމިޔާބެއް ނުވެއެވެ. ކޮންމެވެސް ކަމެއް އަހަންނަށް ގޯސްކޮށް ކުރެވެނީ ހެއްޔެވެ؟ ނުވަތަ ކުރަންވާ މުހިންމުކަމެއް ނުކޮށް ދޫކޮށްލެވިފައިއޮތީ ހެއްޔެވެ؟
ދެ ހާސް އަށާރަވަނަ އަހަރުގެ އޮކްޓޯބަރު މަހުގެ ސަތާރަވަނަ ދުވަހެވެ. ގައުމުގެ ހުންގާނު އެހެން މީހެއްގެ އަތްމައްޗަށް ދޫކޮށްލަން ދިވެހިން ނިންމިތާ ފަންސަވީހަކަށް ދުވަސް ފަހެވެ. މާލޭގައި ހަމަނުޖެހުމެއް ހިނގައިފާނެތީ މީހުންގެ ހިތްތަކަށް ނުތަނަވަސްކަމެއް ފެތުރިފައިވާ ދަނޑިވަޅެކެވެ. ކޮންމެ މީހަކީ ވަކީލެކެވެ. ފަނޑިޔާރެކެވެ. ނުވަތަ ފުލުހެކެވެ. ތިމާގެ ޕާޓީއަކީ ހުދު ފޮތިކޮޅެއްކަމުގައި ނުދެކޭ މީހަކު ނެތެވެ. ދެ މީހަކު އެއްތަން ވެއްޖެއްޔާ ވޯޓުގެ ވާހަކަ ނޫން ވާހަކައެއް ނުދައްކައެވެ. އަހަރެން އާންމުކޮށް ސަޔަށްދަނީ ހަވީރު ހަތަރުގަޑި ބައިގައެވެ. އެހެންނަމަވެސް، ސިޔާސީ ޒުވާބުތައް އިވިއިވި ކަންފަތަށް ނުކުޅަދާނަވެގެން އެ ދުވަހު ބޭރަށް ނުކުންނަހިތެއް ނުވިއެވެ. ހިތަށްއެރިއެވެ. ފިލްމެއް ބަލައިލިއްޔާ މާ ރަނގަޅުވާނެއެވެ. ކޮޓަރިއަށް ވަދެފައި ލެޕްޓޮޕް ހުޅުވައިލީމެވެ. ފޯނު ރަނގަބީލުވާން ފެށިއެވެ. ބަލައިލިއިރު އަނިލްގެ ނަން އަރައިފައިއޮތެވެ. އޭނައަކީ އޮފީސް އެކުވެރިއެކެވެ. ގިނަ ފަހަރު އަހަރެން ސަޔަށްދަނީ އަނިލްއާ އެކުގައެވެ. ގިނަ ފަހަރަށް ބިލުދައްކާނީ ވެސް އޭނައެވެ.
"މިއަދު ނެތް ނުކުންނަހިތެއް." ފޯނަށް ބަލަހައްޓައިގެން އިނދެ ހިތާހިތުން އަހަރެން ބުނެލީމެވެ.
އިރުކޮޅަކު ފޯނު ރަނގަބީލުވެފައި ކެނޑުނެވެ. އޭނަގެ މެސެޖެއް ލިބުނެވެ. މެސެޖުގައި އޮތީ ސައިގަޑިޖެހުނު ވާހަކައެވެ. ޖަވާބެއް ނުދެމެވެ. އަނެއްކާ ފޯނުކުރިއެވެ. ޖަވާބެއް ނުދެނީސް އަނިލް ހުއްޓައިނުލާނެކަން ވިސްނިގެން ފޯނު ނެގީމެވެ.
"އޭ! މިއަދު ކުޑަކޮށް ބިޒީކޮށް މި އުޅެނީ." އަހަރެން ބުނީމެވެ.
"އޭ ހިނގާބަލަ ކޮފީއަކަށް އަރާލަން،" ނުތަނަވަސް ރާގެއްގައި އަނިލް ބުންޏެވެ. "މި އުޅެނީ ވަރަށް ބޮޑަށް ބޯސަކަރާތްވެގެން."
"ކޮން ކަމެއް ލައިގަތީ؟" އަހަރެން އެހީމެވެ.
އަނިލް ޖަވާބެއް ނުދިނެވެ. އެތައް އިރަކު ވާހަކަދެއްކުމުން ވެސް ފޯނުން އެ ވާހަކަ ކިޔައިދޭކަށް އަނިލް ބޭނުމެއް ނުވިއެވެ. އެންމެފަހުން ސަޔަށްދާން އަހަރެން އެއްބަސްވީމެވެ. ފޯނު ބޭއްވީމެވެ.
"މިހިރީ ފިލްމު ބެލިފައެއްނު!" އަނެއްކާ ވެސް ހިތާހިތުން ބުނެލީމެވެ.
ކަންނެތްކަމާ އެކުގައި ތައްޔާރުވެލައިގެން ސައިކަލުގައި ނައްޓައިލީމެވެ. އޭރު ވެސް ހިތަށްއެރިއެވެ. ކޮންމެވެސް މުހިންމު އެއްޗެއް އަހަރެންގެ ހަނދާނުން ކައްސައިލައިފިއެވެ. އެއީ ކޯޗެއްކަން ހަނދާންވީ ކާނިވާ ސަރަހައްދަށް ވަންފަހުންނެވެ. ލާރިދަބަސް ބޭއްވުނީ ގޭގައެވެ. ގެ ހުންނަނީ މާފަންނުގައެވެ. ނަސީބަކުން ފައިސާދަބަހަކަށް އަހަރެން ކާޑުތަކެއް ނުލަމެވެ. ވީމާ ގެއަށް ދިޔުމުގެ ބަދަލުގައި، ހެދިގޮނޑުދޮށް ކައިރީގައިހުންނަ އޭޓީއޭމާ ދިމާއަށް މިސްރާބުޖެހީމެވެ. ފަހަރެއްގައި އަނިލް އަތުގައި ފައިސާ ނުހުރެދާނެއެވެ. ކޭޝްކާޑު މަސައްކަތް ނުކޮށްފާނެއެވެ. އެހެން ދިމާވެފައި އެބަހުއްޓެވެ. އެންމެ ބުއްދިވެރިގޮތަކީ އަތުގައި ނަގުދުފައިސާ ހުރުމޭ ހިތަށްއެރިއެވެ.
ސައިކަލު ޕާކުކޮށްފައި އޭޓީއެމުން ފައިސާނަގަން ވަންއިރު، ސަލާންޖަހާ ދެ މީހަކު ދޮރުމަތީގައި ތިއްބެވެ. އެކަކު ހުރީ ދެ އަސާ ހިފާއްޓައިގެން އޭގެ އެހީގައެވެ. ދެވަނަ މީހާގެ ބޭރުފުށުން އެއްވެސް ކަހަލަ އައިބެއް ނުވަތަ ބަލިކަމެއް ވެސް ނުފެނެއެވެ. އޭނަ ސަލާންޖަހަން އުޅެނިކޮށް އަހަރެން ވަރަށް ގިނައިން ދެކެމެވެ. އާންމު ގޮތެއްގައި އޭނަ ހުންނަނީ އޭޓީއެމްތަކުގެ ކައިރީގައެވެ. އޭނަޔާ ބެހޭގޮތުން އެކި ކަހަލަ ވާހަކަތައް އަހަރެން އަޑުއަހަމެވެ. އޭނަގެ އެކައުންޓުގައި ގިނަ އަދަދަކަށް ފައިސާ ހުންނަކަމެވެ. ލިބޭ ފައިސާއަށް އޭނަ ޑުރަގު ގަންނަ ކަމެވެ. ލަފާކުރެވޭ ގޮތުގައި ވަރަށް ގިނަ މީހުންނަށް އޭނަގެ ހަގީގަތް އެނގެއެވެ. ދެ އަސާ ހިފައިގެން ހުރި މީހާއަށް ތިން މީހަކު ފައިސާ ދިނެވެ. ދެން ހުރި މީހާއަކަށް އެކަކު ވެސް ފައިސާއެއް ނުދެއެވެ. އޭޓީއެމުން ފައިސާ ނަގައިގެން އަހަރެން ނުކުތްއިރު ދެ އަސާ ހިފައިގެންހުރި މީހާއެއް ނެތެވެ. މަކަރުހަދާކަމަށް މަޝްހޫރު މީހާ ހުއްޓެވެ. އޭނައަށް އެއްޗެއް ދޭކަށް އަހަރެންގެ ނަފުސު ވެސް އެއްބަހެއް ނުވިއެވެ.
"ﷲ އަށް ޓަކާ އަހަންނަށް އެހީއެއްވެދީ!" އަހަރެން އަރާހަމަވި ވަގުތު އޭނަ ބުންޏެވެ.
އަހަރެންގެ ޚިޔާލު އެ ހިސާބުން ބަދަލުވިއެވެ. ވަރަށް ސިއްރުސިއްރުން އޭނައަށް ސަތޭކަ ރުފިޔާ ދިނީމެވެ. ބޮޑު އަދަދެއްކަން އެނގެއެވެ. އެއިން ކޮންމެ ފަދަ ބޭނުމެއް ވެސް އޭނަ ހިފައިފާނެއެވެ. އެކަމަކު ﷲ އަށް ޓަކައި އެއްޗެއް ދޭއިރު އޭގައި ހިފާ މީހާ އަހަންނަށް މުހިންމެއް ނޫނެވެ. އެއީ، ހެއްދެވި ފަރާތަށް އަހަރެންގެ ހިތުގައިއޮތް ލޯބީގެ ދާދި ކުޑަކުޑަ ރަމްޒެކެވެ. އެ ވަގުތު އަނިލް ގުޅިއެވެ.
"އަދިވެސް ގޭގަ ދޯ؟" އަނިލް ސުވާލުކުރިއެވެ.
"ނޫނޭ! މިތާ ކައިރި އޭޓީއެމުން މި ހަމަ ނުކުތީ!" އަހަރެން ބުނީމެވެ.
އަނިލް ގަބޫލެއް ނުކުރިއެވެ. ސާބިތުކޮށްދޭން އެދުނެވެ. އަހަރެން ފޮޓޯއެއް ނަގައިފައި ފޮނުވީމެވެ. އަދި އަވަސްއަވަހަށް ކާނިވާ ސަރަހައްދަށް މިސްރާބުޖެހީމެވެ. ސިޓްރޮން ރެސްޓޯރަންޓަށް ވަންއިރު ބިމަށް ތުންގަނޑު ހަރައިލައިގެން އަނިލް އިނެވެ. އަހަރެން ގޮސް އަނިލްގެ ކޮނޑުގައި ޖަހައިލައިފައި ގޮނޑީގައި އިށީނީމެވެ. ވެއިޓަރު އައުމުން އަހަރުމެން އޯޑަރު ދިނީމެވެ.
"ކުއްލިއަކަށް ހަތަރުއުދަރެސް ފެނުޖެހުނީތަ؟" އަހަރެން އެހީމެވެ. "އަންހެނުން ވަރިފަށަށްއެރީ؟"
"އަންހެނުން އިރުއިރުކޮޅާ ވަރިފަށަށްއަރާނެ،" އެ ކަމާ ކަންބޮޑުނުވާ ކަހަލަ ރާގެއްގައި އަނިލް ބުންޏެވެ. "އެ ހުންނަނީ މައްސަލައެއް ނޫން. ވަރިފަށަށްއަރަން ޖެހޭނެ. ޒުވާބުކުރަން ވެސް ޖެހޭނެ. އެހެންނޫނީ ލޯބި އިތުރެއް ނުވާނެ. އެއަށް ވުރެ މާ ސީރިޔަސްކަމެއް ދިމާވެގެން މިއުޅެނީ."
އަނިލް ގޮނޑީގައި ހަމަޖެހިލިއެވެ. ވެއިޓަރު ސައިގެނައެވެ.
"އަހަރެންގެ ހުންނާނެ ދައްތައެއް،" އަނިލް ބުންޏެވެ. "ދައްތައެކޭ ބުންޏަސް އެއީ ދުރުތާތިމާގެ މީހެއް. ކޮންމެވެސް ހިސާބަކުން މަންމަގެ ކޮއްކޮއެއްގެ ދަރިއެއް އެއީ. އަހަރެން ފެނުނީމަ ނިތްއަރުވައިލާނެ. ވާހަކައެއް ނުދައްކާނެ. ރޭގަ އޭނަ ގުޅާފަ ބުނީ ވަރަށް ބަލިވެޔޭ މިއުޅެނީ. ޑޮކްޓަރަށް ދައްކަން ލާރިކޮޅެއް ދީބަލާށޭ. އަހަރުމެން މުޅި ފެމެލީއަށް އެނގޭ އޭނަގެ ގޮތް. ބަލިވެގެނެއް ނޫން އެ އުޅެނީ. މިހާރު އާސަންދަ ވެސް އޮވެއެއްނު. ކީއްކުރާ ލާރިއެއް؟ ޕީސް ގަންނަން ލާރި ނުލިބިގެން އެ އުޅެނީ. އަހަރެން ހީކުރީ އެހެން. ނުދެން ލާރިއެއް. އާދޭސްކުރީމަ ވެސް ނުދެން. މިއަދު މެންދުރު އޭނަ ނުހޭލައިގެން އެ ގޭގެ މީހުން ބެލިއިރު މަރުވެފަ އޮތީ. އޭނަ އުޅުނޯ ބޮލުގަރިއްސާތީ..."
ދެރަވެގެން އަރުބެދެން ފެށުމުން އަނިލްގެ ވާހަކަ މެދުކަނޑައިލިއެވެ. އިރުކޮޅަކުން ފެށިއެވެ.
"އެ ކަމާ ގިލްޓީވެގެން އަހަރެން މިއުޅެނީ،" އަހަންނާ ހަތަރުކަޅި ހަމަކުރަން ޖެހިލުންވެފައިވާ އަނިލް ބުންޏެވެ. "ހިތަށްއަރަނީ އަހަރެން އެހީވި ނަމަ އޭނަ އަދިވެސް ދިރިހުރީހޭ. ދެން އެނގޭ މަރުވާންވީމަކަން މަރުވާނީ. އެކަމަކު .."
އަނިލްއަކީ އަހަރެން ނަމަ އަހަރެން ވެސް ދެރަވީހެވެ. ނުތަނަވަސްވީހެވެ. އެ ތުހުމަތު އަމިއްލައަށް ބޮލުގައި އެޅީމުހެވެ.
"މިހެން ވިސްނާލަބަލަ!" އަހަރެން ބުނީމެވެ. "އޭނަ ލާރި ބޭނުންވީ ޑޮކްޓަރަށް ދައްކަންވެގެންކަން އަނިލްއަށް އެނގުނު ނަމަ ލާރި ދޭނަމެއްނު!"
އަނިލް ބޯޖަހައިލިއެވެ.
"އަނިލްގެ ހިތް ރަނގަޅެއްނު!" އަހަރެން ބުނީމެވެ. "ކޮންމެ މީހަކަށް ވެސް ކުށްހީއެއް ކުރެވިދާނެ. ދެން ހަދަންވީ .."
އަހަރެން އެ ހިސާބަށް ބުނިތަނާ އަނިލްގެ ފޯނު ރަނގަބީލުވާން ފެށިއެވެ. ފޯނު އޮތީ މޭޒުމަތީގައެވެ.
"ޔަގީން މަންމަކަން." އަނިލް ބުނެލިއެވެ.
ފޯނަށް ޖަވާބުދިނުމަށް ފަހު އަނިލް ފޯނު ބޭއްވިއެވެ.
"އާ ސަހަރާގަ މަންމަ އެހެރީ،" އަނިލް ބުންޏެވެ. "މަންމަގެ ފޯނުގަ ޗާޖުނެތީމަ އޭނަގެ ފޯނުން އެ ގުޅީ. އަހަރެން ވީތަނެއް.."
"މަޑުކޮށްބަލަ!" އަހަރެން ބުނީމެވެ. "ދެންމެ ފޯނަށް އަރާފަ އެއޮތީ މަރުވި ދައްތަގެ ފޮޓޯ؟"
އަނިލް ބޯޖަހައިލުމުން އެ ފޮޓޯ ދައްކައިލުމަށް އަހަރެން އެދުނީމެވެ. އަނިލް ފޯނު ދިނެވެ.
"އެހެން ކިހިނެއްވާނީ؟" އަހަރެން ހައިރާންވެފައި ބުނީމެވެ. "މީނަ ދެންމެ ހުރި އޭޓީއެމް ދޮރުމަތީގަ. އަހަރެން ލާރި ވެސް ދިނިން."
"ތި ވާނީ ވައްތަރު މީހަކު ކަމަށް،" އަނިލް މާބޮޑު ސަމާލުކަމެއް ނުދިނެވެ. "ދައްތަ ރޭގަ ނިޔާވީ. އަދި ވަޅުނުލާ!"
އަހަންނަކަށް ގަބޫލެއް ނުކުރެވުނެވެ. އެ މީހަކީ، ހުކުރުދުވަހު އިސްލާމީ މަރުކަޒު ކައިރީގައި ވެސް ހުންނަ މީހެކެވެ. މާރުކޭޓު ސަރަހައްދުން ވެސް އޭނަ ދެކެމެވެ. އަނެއްކާ ވެސް އަހަރެން ފޮޓޯ ބަލައިލީމެވެ.
"ނޫނެކޭ އަނިލް!" އަހަރެން ޔަގީންކަމާ އެކުގައި ބުނީމެވެ. "ހަމަ މީނައޭ ހުރީ. މި ހެދުން ލައިގެން ހުރީ ވެސް."
އަނިލް ގަބޫލެއްނުކުރިއެވެ. އެކަކު ވެސް ގަބޫލެއް ނުކުރާނެއެވެ. އެންމެ ފަހުން އަހަރުމެން ނިންމީ އެއީ ވައްތަރު މީހެއްކަމަށެވެ. އަނިލްއަށް ހިތްވަރުދިނުމަށް ފަހު އޭނަޔާ އެކުގައި އަހަރެން ސަހަރާއަށް ދިޔައީމެވެ. ދައްތަގެ މޫނުދުށީމެވެ. ނިޔާވެފައިއޮތުމުން ކުޑަކޮށް ތަފާތެވެ. އެކަމަކު އަހަރެންގެ ހިތް ބުންޏެވެ. އަހަރެން ފައިސާ ދިނީ އޭނަޔަށެވެ.
ގެއަށް އައިސްފައި ވެސް އަހަރެން އެ ކަމާ ވިސްނީމެވެ. އެ ވަގުތު ކުއްލިއަކަށް ބަލިހަނދާނެއް އާވިއެވެ. އަނިލްއަށް ދައްކަން އަހަރެން އޭޓީއެމް ސަރަހައްދުގެ ފޮޓޯއެއް ނެގީމެވެ. ފޮޓޯނެގިއިރު ވެސް އޭނަ ހުއްޓެވެ. އަވަސްއަވަހަށް ފޮޓޯ ބަލައިލީމެވެ. ފޮޓޯއަކު އޭނައެއް ނެތެވެ. އަހަރެންގެ މުޅި ހަށިގަނޑު ފިނިވެގެންދިޔައެވެ. ފޮޓޯ ބޮޑުކޮށްގެން ބެލިއިރު ވެސް އޭނައެއް ނެތެވެ. އެއީ ކާކު ހެއްޔެވެ؟ އެ ތަނުގައި އޭނަ ހުރީ ކީއްވެގެން ހެއްޔެވެ؟ ފައިސާދޭން މީހުން ބޭނުންނުވާ މީހެއްގެ ސިފައިގައި އޭނަ ހުރީ ކީއްވެގެން ހެއްޔެވެ؟ އޭނައަށް ފައިސާ ދިން ހަމައެކަނި މީހަކަށް އަހަރެން ވީ ކީއްވެގެން ހެއްޔެވެ؟
އަހަރެން އަތުގައި އޮތް ނަސީބު ނަންބަރެއްގެ ގުރުއަތު ނެގީ ޖެހިގެން އައި ދުވަހުއެވެ. އެއް މިލިޔަން ރުފިޔާ ދިމާވި ނަސީބުވެރިޔަކީ އަހަންނެވެ.
ނިމުނީ