15 އޮކްޓޯބަރ 2018 - 07:38
ހިންދީ ފިލްމުތަކަށް ލޯބިކުރާ ވަރަށް ގިނަ ބަޔަކު މިހާރު އެންމެ ބޮޑަށް އިންތިޒާރުކުރާ އެއް ކަމަކީ ޝާހްރުކް ހާންގެ ދޮށީ ފިރިހެން ދަރިފުޅު އަރިޔަން ހާން ބޮލީވުޑަށް ނުކުންނާނެ އިރަކަށެވެ. އެމެރިކާގެ ލޮސް އެންޖެލިސްގައި މިހާރު ކިޔަވަމުން އަންނަ 20 އަހަރުގެ އަރިޔަން ބޮލީވުޑަށް ލޯންޗް ނެރުން ވެގެން ދާނީ ވަރަށް ބޮޑު، ހާއްސަ ކަމަށެވެ.
ކުރިން ވެސް އަޑު އަރާފައިވާ ގޮތުން އަރިޔަން ބޮލީވުޑަށް ނެރޭނީ އޭނާގެ ބައްޕަގެ ގާތް އެކުވެރިޔާ އަދި ބައްޕަގެ ކާމިޔާބު ފިލްމުތަކެއް ގެނެސް ދިން ޑައިރެކްޓަރު/ޕްރޮޑިއުސަރު ކަރަން ޖޯހަރެވެ. ޔަގީންވާ ކަމަކީ ކަރަން ނޫން މީހަކަށް ޝާހްރުކްގެ ދަރިން ބޮލީވުޑަށް ދޫކޮށްލުމުގެ ނަސީބު ނުލިބޭނެ ކަމެވެ. އެގޮތުން އޭނާގެ އަންހެން ދަރިފުޅު ސުހާނާ ހާން، 18، އަކީ ވެސް ކަރަންއާ ހަވާލުވެފައިވާ ކުރިމަގުގެ ތަރިންނެވެ.
ރިޕޯޓްތައް ބުނާ ގޮތުން އަރިޔަން ކިޔަވައި ނިމުމާ އެކު، ބޮލީވުޑްގެ ދަތުރު ފަށާނެ އެވެ. އެގޮތުން ކުރިއަށް އޮތް ދެތިން އަހަރަށް މަޑުކޮށްލަން ޖެހޭނެ އެވެ. ކަރަން ހުރީ އަރިޔަންގެ އިންތިޒާރުގަ އެވެ. އަދި އަރިޔަން ބޮލީވުޑަށް ނެރެން ކެތްމަދުވެފަ އެވެ.
އެ ވާހަކަ އޭނާ ވަނީ ހުކުރު ދުވަހުގެ ރޭ ޒީ ޓީވީން ގެނެސް ދިން ޝޯ "ސްޓާރީ ނައިޓް ޓޫ ޕޮއިންޓް އޯ" ގައި ހިއްސާކޮށްފަ އެވެ.
މަޝްހޫރު ފިލްމު ކްރިޓިކް ކޯމަލް ނަހަޓާ ހޯސްޓްކޮށްދޭ ޝޯގައި ކަރަން ބުނީ އޭނާ މިހާރު އެންމެ ކެތްމަދުވެފައި ވަނީ އަރިޔަން ބޮލީވުޑަށް ލޯންޗް ކުރަން ކަމަށެވެ.
"ހަމައެއާ އެކު ސުހާނާއަކީ ވެސް އަހަރެންގެ ހުވަފެނެއް،" ތަހުތުގެ ނަމުގައި ތާރީހީ ފިލްމެއް ހަދަން ތައްޔާރުވަމުން އަންނަ ކަރަން ބުންޏެވެ.
ކަރަން ބުނި ގޮތުގައި އަރިޔަން އާއި ސުހާނާ ބޮލީވުޑަށް ދޫކޮށްލުމަކީ އޭނާގެ ކޮނޑުގައި އެޅިފައި އޮތް ބޮޑު ޒިންމާއެއްގެ ގޮތުގައި ދެކެ އެވެ.
"އެއީ ހަމަ ގައިމު ވެސް ކުޑަ މަސައްކަތަކަށް ނުވާނެ. އަދި މިއީ އެތައް ބައެއްގެ އުންމީދާ ގުޅިފައިވާނެ ކަމެއް،" އޭނާ ބުންޏެވެ.
މީޑިއާތަކުން ރިޕޯޓް ކުރާ ގޮތުގައި އަރިޔަން ބޮލީވުޑަށް ނެރޭ ފިލްމުން ކުރީގެ ބަތަލާ ސްރީދޭވީގެ ހަގު އަންހެން ދަރިފުޅު ހުޝީ ކަޕޫރް، 18، ވެސް ފިލްމީ ދުނިޔެ އަށް ދޫކޮށްލާނެ އެވެ. އެހެންވެ މި ވެސް ފިލްމު އިތުރަށް ހާއްސަވެގެން ދާނެ އެއް ސަބަބެވެ.
ސްރީދޭވީގެ ދޮށީ އަންހެން ދަރިފުޅު ޖާންވީ ކަޕޫރް، 21، ވެސް ބޮލީވުޑަށް ނެރުނީ ކަރަން އެވެ. އެއީ ޖުލައިގައި ރިލީޒް ކުރި "ދަޅަކް" އިންނެވެ. އަދި ސައިފް އަލީ ހާންގެ އަންހެން ދަރިފުޅު ސާރާ އަލީ ހާނަކީ ވެސް ކަރަން ޕްރޮޑިއުސް ކުރާ ފިލްމުން ތައާރަފުވެގެން ދާނެ ބަތަލާއެކެވެ. އެއީ ޑިސެމްބަރު 28 ގައި ރިލީޒް ކުރާ "ސިމްބާ" އިންނެވެ.
ކަރަން ނެރެފައިވާ ތަރިންގެ ތެރޭގައި ވަރުން ދަވަން، އާލިއާ ބަޓް އަދި ސިދާތު މަލްއުތުރާ ފާހަގަކޮށްލެވެ އެވެ.