12 އޮކްޓޯބަރ 2018 - 12:35
ދާރުއްސަލާމް (އޮކްޓޯބަރު 12) - އެފްރިކާގެ އެންމެ ޒުވާން ބިލިއަނަރު ކަމަށް ބުނާ ޓެންޒޭނިއާގެ މުހައްމަދު ދޭވްޖީ ވަގަށް ނަގައިފި އެވެ.
އުމުރުން 43 އަހަރުގެ ބިލިއަނަރު ވަގަށް ނަގާފައި ވަނީ ހަތިޔާރު އަޅައިގެން ތިބި ބަޔެކެވެ. އޭނާ ވަގަށް ނެގީ ދާރުއްސަލާމުގެ ހޮޓަލަކަށް ހެނދުނު ޖިމަށް ދަނިކޮށް ކަމަށްވެ އެވެ. އެ ހާދިސާއާ ގުޅިގެން ތިން މީހަކު ވަނީ ހައްޔަރުކޮށްފަ އެވެ. ފުލުހުން ލަފާ ކުރަނީ ދެވްޖީ ވަގަށް ނެގުމުގައި ބިދޭސީ ބަޔަކު ވެސް ބައިވެރިވެފައިވާ ކަމަށެވެ. އޭނާ ވަގަށް ނެގި ބޭނުމެއް އަދި ނޭނގެ އެވެ. ފުލުހުން ބުނީ ދޭވްޖީ ޖިމަށް ދިޔައީ ބޮޑީގާޑުން ވެސް ނުލައި އޭނާ އެކަނި ކާރުގައި ދުއްވާފައި ކަމަށެވެ.
ފޯބްސް މަޖައްލާ އިން ބުނި ގޮތުގައި ދޭވްޖީގެ މިލްކިއްޔާތުުގެ އަގު 1.5 ބިލިއަން ޑޮލަރަށް އަރަ އެވެ. އަދި އެއީ ޓެންޒޭނިއާގައި ހުރި ހަމައެކަނި ބިލިއަނަރު ކަމަށް ވެސް ބުނެފައިވެ އެވެ. މިދިޔަ އަހަރުގެ ރިޕޯޓެއްގައި ބުނެފައި ވަނީ ދޭވްޖީ އަކީ އެފްރިކާގެ އެންމެ ޒުވާން ބިލިއަނަރު ކަމަށެވެ. ދޭވްޖީ ވަނީ ޓެންޒޭނިއާގެ އެންމެ ބޮޑު ފުޓުބޯޅަ ކްލަބު ވެސް ސްޕޮންސާ ކޮށްފަ އެވެ. ދޭވްޖީގެ މިލްކިއްޔާތުގެ ދެބައި ކުޅަ އެއްބައި ޚައިރާތުގެ ގޮތުގައި ހޭދަކުރަން ނިންމާފައިވާ ކަމަށް ފޯބްސް އިން 2016 ވަނަ އަހަރު ބުނެފައިވެ އެވެ. އޭނާ ވަނީ 2015 ވަނަ އަހަރާ ހަމައަށް، ވެރިކަން ކުރާ ޕާޓީގެ މެންބަރެއްގެ ގޮތުގައި ޕާލަމެންޓުގައި ވެސް ޚިދުމަތް ކޮށްފަ އެވެ.
އާއިލީ ވިޔަފާރި ދޭވްޖީ ވަނީ ސަރަހައްދީ ބޮޑު ކުންފުންޏަކަށް ހަދައިފަ އެވެ. އޭނާގެ އެމްއީޓީއެލް ކުންފުނިން ޓެކްސް ޓައިލްސް އާއި ފުށާއި އެކި ބާވަތުގެ ބުއިންތަކާ އަދި ތެޔޮ އުފައްދަ އެވެ.