04 އޮކްޓޯބަރ 2018 - 13:31
އުމުރުގެ ކޮންމެވެސް ހިސާބެއްގައި ޓީޗަރެއްގެ އެހ ނުލިބޭ ދިވެއްސަކު މަދުވާނެ އެވެ. ރައީސުލްޖުމްހޫރިއްޔާގެ މަގާމުން ފެށިގެން އެންމެ ދަށް ފަންތީގެ މަގާމުތަކުގައި އުޅޭ މީހުން ވެސް ކުޑައިރު ކިޔަވާފައި ހުންނާނީ ކޮންމެވެސް ޓީޗަރެއްގެ ކައިރިންނެވެ. އެހެންކަމުން އެއީ ގައުމުގައި އެންމެ ބޮޑު ޒިންމާއެއް އުފުލަމުން އަންނަ އެއް ބަ އެވެ.
ޓީޗަރުން ދެކެ މުޅި ގައުމު ލޯބިވެ އެވެ. އެކަން މިއަދު، ރާއްޖޭގެ ސްކޫލްތަކުން އެވަނީ އަނެއްކާވެސް ފެނިފަ އެވެ.
ދުނިޔޭގެ ޓީޗަރުންގެ ދުވަހަކީ އޮކްޓޯބަރު 5 ނަމަވެސް، މާދަމާއަކީ ރަސްމީ ބަންދު ދުވަހެއް ކަމުން، ޓީޗަރުންގެ އަގު ވަޒަންކުރުން ކުރިއަށް ގެންދިޔައީ މި ހަފުތާގަ އެވެ. އެގޮތުން އެކި ސްކޫލުތަކުގައި ތަފާތު ތީމްތަކަށް މުޅި ސްކޫލް ޒީނަތްތެރިކޮށްފައިވާއިރު ޓީޗަރުންނަށް މިއަދު ވަރަށް ހޫނު މަރުހަބާއެއް ވެސް ކިޔެވެ.
އަމީނިއްޔާ ސްކޫލުގައި ޓީޗަރުންގެ ދުވަސް ފާހަގަކުރީ އިއްޔެ އެވެ. އެކަމަކު އެކި ދުވަސްތަކަށް ބަހާލައިގެން ތަފާތު ހަރަކާތްތައް އަންނަނީ ހިންގަމުންނެވެ.
އެ ސްކޫލުގެ ޑެޕިއުޓީ ޕްރިންސިޕަލް ޝުވެއިބަތު ސައީދު ވިދާޅުވީ ޓީޗަރުންނަކީ ބުރަ މަސައްކަތެއް ކުރަމުން އަންނަ ބަޔަކަށް ވާއިރު، އެ މީހުންގެ އަގު ވަޒަންކުރަން ސްކޫލު ފެންވަރުގައި ހާއްސަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން އިއްޔެ ވެސް ދަރިވަރުންނާ އެކު ޓީޗަރުން ކުޅިވަރުގެ ހަރަކާތްތަކުގައި ބައިވެރިވެ ރަނގަޅު ވަގުތުތަކެއް ހޭދަކުރި ކަމަށް އޭނާ ވިދާޅުވި އެވެ.
"ފެއްސާއި ރަން ކުލައިން ސްކޫލު ތެރެ ޒީނަތްތެރިކޮށް އިއްޔެ ހަރަކާތްތަކެއް ބޭއްވީ. މިރޭ ޑިނާ ނައިޓެއް، ދެން މިރޭ ފަތިހު ހިނގާލުމެއް ވެސް އޮންނާނެ. އޭގެ އިތުރުން ވެސް ތަފާތު ހަރަކާތްތައް އޮންނާނެ،" ޝުވެއިބަތު ވިދާޅުވި އެވެ.
ބ. އޭދަފުށީގައި ހުންނަ އަތޮޅު ތައުލީމީ މަރުކަޒުގެ ޕްރިންސިޕަލް އަހުމަދު ރަފީއު ވިދާޅުވީ އެ ސްކޫލުން ޓީޗަރުންނަށް މިއަދު ހެނދުނު މަރުހަބާކީ ދަރިވަރުންގެ ނެށުމުގެ ހަރަކާތްތަކަކުން ކަމަށެވެ. ހާއްސަ އެސެމްބްލީއެއް ބޭއްވުމަށް ފަހު ދަރިވަރުންނާއި ޓީޗަރުންނަށް ހާއްސަ ސައެއް ވެސް އޮތް ކަމަށް އޭނާ ވިދާޅުވި އެވެ.
އިސްކަންދަރު ސްކޫލް ވެސް ވަނީ ވަރަށް ބޮޑަށް ޒީނަތްތެރިކޮށްފަ އެވެ. އެހެން އަހަރުތަކާ ހިލާފަށް ސްކޫލުތެރެ ރީތިކުރުމުގެ މަސައްކަތް ކުރީ ސްކޫލްގެ މެނޭޖްމަންޓުންނެވެ.
އެ ސްކޫލުގެ އިސް ބޭފުޅަކު ވިދާޅުވީ ޓީޗަރުންގެ ދުވަހާ ގުޅުވައިގެން ތަފާތު ކުޅިވަރުތައް ކުޅެން ހަމަޖައްސާފައިވާ ކަމަށެވެ. އަދި ގުރުއަތުން ހޮވޭ ޓީޗަރަކަށް އުމްރާ ދަތުރެއް ދޭން ނިންމާފައިވާ ކަމަށް ވެސް އޭނާ ވިދާޅުވި އެވެ.
"ޓީޗަރުންގެ މޫނުމަތިން އުފާވެރި ހިނިތުންވުން ފެނިގެން ދިޔައީ. ވަރަށް ހާއްސަ ވަގުތުކޮޅެއް ޓީޗަރުންނާއި ދަރިވަރުންނާ އެކު ހޭދަކުރެވިގެން ދިޔައީ،" ސްކޫލުގެ އިސް ބޭފުޅަކު ވިދާޅުވި އެވެ.
އެ ސްކޫލުގެ ޓީޗަރުންނަށް ވެސް މަރުހަބާ ކީ ދަރިވަރުންނެވެ. އެގޮތުން ސްކޫލުގައި މަސައްކަތް ކުރާ 130 ޓީޗަރުންނަށް ދަރިވަރުން ވަނީ މާބޮނޑިއެއް ހަދިޔާކޮށްފަ އެވެ.