04 އޮކްޓޯބަރ 2018 - 13:21
އަމިން ކޮންސްޓްރަކްޝަނުން ހުޅުމާލޭގައި އިމާރާތްކުރި "އަމިން އެވެނިއު"ގެ އެޕާޓްމަންޓް ގަތް 10 މީހަކު، 30 މިލިއަން ރުފިޔާގެ ބަދަލު ހޯދަން ސިވިލް ކޯޓަށް ހުށައަޅައިފި އެވެ.
އެ ދިހަ އެޕާޓްމަންޓުގެ ވެރިން ވަކިވަކިން ސިވިލް ކޯޓަށް ހުށަހެޅި މައްސަލަތަކުގައި ވަކާލާތުކުރައްވާ ވަކީލު ނާޒިމް އަބްދުއްސައްތާރު ވިދާޅުވީ މައްސަލަ ހުށަހެޅީ ކަނޑައެޅި މުއްދަތުގައި އަމިން ކޮންސްޓްރަކްޝަނުން އެޕާޓްމަންޓްތައް ހަވާލުކޮށްފައި ނުވާތީ ލިބުނު ގެއްލުމުގެ ބަދަލު ހޯދަން ކަމަށެވެ.
އޭގެ އިތުރުން މެއިންޓަނަންސް ފީގެ ގޮތުގައި ކޮންމެ މަހަކު ނަގާ ފީ ހުއްޓުވައި ދޭން ވެސް، އެ މައްސަލާގައި އެދިފައިވާނެ ކަމަށް ނާޒިމް ވިދާޅުވި އެވެ.
އޭނާ ވިދާޅުވީ 10 ފަރާތުން ހޯދަން ހުށަހެޅި ބަދަލުގެ ޖުމްލަ 30 މިލިއަން ރުފިޔާއަށް އަރާ ކަމަށެވެ.
ތިން ބްލޮކަށް، ކޮންމެ ބްލޮކެއްގައި 12 ބުރި ހިމެނޭ ގޮތަށް ހަދާފައިވާ އިމާރާތުގެ މެއިންޓަނަންސް ފީގެ ގޮތުގައި ދައްކަން ޖެހެނީ އަކަ ފޫޓަކަށް މަހަކު ދެ ރުފިޔާ އެވެ. މެއިންޓަނަންސް ކަންކަން ބަލަހައްޓަން އަމިން ކޮންސްޓްރަކްޝަންގެ ފަރާތުން ހަވާލުކުރީ، ކުރީގެ އެޓާނީ ޖެނެރަލް ޑރ. ހަސަން ސައީދުގެ ޕްރިމިއާ ޕްރޮޕަޓީއާ އެވެ. އެކަމަކު އަމިން ކޮންސްޓްރަކްޝަނުން ކޮށްދެން ޖެހޭ ކަންކަން ފުރިހަމަވެފައި ނުވާތީ، މެއިންޓަނަންސް ފީ ދައްކަން އެތައް ބަޔަކު ދެކޮޅު ހެދުމުން، މިލިއަނަކަށް ވުރެ ގިނަ ރުފިޔާ ނުލިބި އޮތް ކަމަށް، ޕްރިމިއާ ޕްރޮޕަޓީން ބުނެފައިވެ އެވެ.
ދިހަ މީހަކު ކޯޓަށް މި ދިއައީ މެއިންޓަނަންސް ފީ ނުދައްކައިގެން އެތައް މައްސަލައެއް ކުރިމަތިވުމާއި އަމިން ކޮންސްޓްރަކްޝަނުން ކޮށްދޭން ޖެހޭ އެތައް ކަމެއް އަދިވެސް ފުރިހަމަނުކޮށްދީ އޮތުމުން ކަމަށް، އޭގެ ތެރެއިން ބައެއް މީހުން ބުނެ އެވެ.
މި މައްސަލާގައި އަމިން ކޮންސްޓްރަކްޝަންގެ ފަރާތުން އެއްވެސް ވާހަކައެއް އަދި ނުދައްކަ އެވެ.
އަމިން އެވެނިއުއަކީ ހުޅުމާލޭގައި މިހާތަނަށް ހަދާފައިވާ އެންމެ ބޮޑު އެއް އިމާރާތެވެ. އެތަނުގެ އެޕާޓްމަންޓްތަކުގެ އަގު އުޅުނީ 2 މިލިއަން ރުފިޔާ އިން ފެށިގެން 8 މިލިއަން ރުފިޔާއާ ދެމެދުގަ އެވެ. އެންމެ އަގުބޮޑީ އެންމެ މަތީ ދެ ބުރީގައި ހަދާފައިވާ ޕެންޓް ހައުސްތަކެވެ.