26 މެއި 2016 - 10:21
ޒިއުރިކް (މެއި 26) - ކްލާސް ގަޑި ފެށޭ އިރާއި ނިމޭ ގަޑީގައި މުސްލިމް ކިޔަވާ ކުދިން ވެސް ޓީޗަރުންނާ ސަލާމްކުރަން ޖެހޭ ގޮތަށް ސްވިޒަލެންޑުގެ ސަރަހައްދީ އިދާރާއަކުން ނިންމައިފި އެވެ.
މުސްލިމް ކިޔަވާ ކުދިން ޓީޗަރުންނާ ސަލާމް ނުކުރާ މައްސަލަ ބޮޑު ކަމަކަށް ހަދާފައި ވަނީ ސްވިޒަލެންޑުގެ ސްކޫލެއްގައި ކިޔަވާ ސީރިއާގެ މުސްލިމް ދެ ބެން އަންހެން ޓީޗަރުންނާ ސަލާމް ނުކުރުމަށް ލުޔެއް ދީފައި ވަނިކޮށެވެ. އެ ދެ ކުދިން ޓީޗަރުންނަށް ސަލާމް ނުކުރުން ހުއްދަކޮށްފައި ވަނީ އެ ކުދިންގެ ދީނީ އަގީދާގެ ސަބަބުން އެކަން ކުރަން ބޭނުން ނުވާތީ އެވެ.
އެކަމަކު ސްވިޒަލެންޑުގެ ސަރަހައްދީ އިދާރާއަކުން ނިންމާފައި ވަނީ ކިޔަވާ ކުދިން ޓީޗަރުންނާ ސަލާމް ކުރުމަކީ އާދަކާދައެއްގެ ގޮތުން ކުރާ ކަމެއް ކަމަށާއި އެހެންވެ ހުރިހާ ކުދިން ވެސް ޓީޗަރުންނާ ސަލާމް ކުރަން ޖެހޭނެ ކަމަށެވެ. އަދި ސަލާމް ނުކުރާ ކުދިންގެ ބެލެނިވެރިން ޖޫރިމަނާ ކުރުމަށް ވެސް ވަނީ ނިންމައިފަ އެވެ. ޓީޗަރުންނާ ސަލާމް ނުކުރާ ސީރިއާގެ ދެ ކުދިންގެ ބައްޕައަކީ އިމާމެކެވެ.
ޖަސްޓިސް މިނިސްޓަރު ސިމޮނެއްޓާ ސޮމަރުގާ ވިދާޅުވީ ޓީޗަރުންނާ ސަލާމް ކުރުމަކީ ދީނީ ގޮތުން ކުރާ ކަމެއް ނޫން ކަމަށާއި އެއީ ސްވިޒަލެންޑުގެ ސަގާފަތުގެ ބައެއް ކަމަށެވެ.
ސްވިޒަލެންޑުގެ އާބާދީގައި ހިމެނޭ އަށް މިލިއަން މީހުންގެ ތެރޭގައި މުސްލިމުންގެ ނިސްބަތަކީ 350،000 މީހުންނެވެ.
މި މައްސަލަ ފެންމަތިވުމާ ގުޅިގެން ސީރިއާގެ އާއިލާ އަށް ސްވިޒަލެންޑުގެ ރައްވެހިކަން ދިނުމުގެ މަސައްކަތް މިހާރު ވަނީ މަޑުޖައްސާލައިފަ އެވެ. އަދި ބާސެލްގައި ހުންނަ އިމިގްރޭޝަން އޮފީހުން މިހާރު ދަނީ އެ ކުދިންގެ ބައްޕަ އަށް ސްވިޒަލެންޑުން ހިމާޔަތް ލިބުނު ގޮތް އިތުރަށް ސާފު ކުރަމުންނެވެ.
ސީރިއާގެ ދެ ކުދިން އަންހެން ޓީޗަރުންނާ ސަލާމް ނުކުރާ ގޮތަށް ސްކޫލުން ހުއްދަ ކުރީ އެ ކުދިންގެ އާއިލާ އިން އެގޮތަށް އެދުމުންނެވެ. ނަމަވެސް މީޑިއާގެ ސަމާލުކަން މި މައްސަލަ އަށް މާބޮޑަށް ލިބުމުން ސްކޫލުން ވަނީ ސަރަހައްދީ އިދާރާ މެދުވެރިކޮށް އިތުރު ލަފައެއް ހޯދައިފަ އެވެ.
ޓީޗަރުންނާ ސަލާމް ނުކުރާ ކުދިންގެ ބެލެނިވެރިން 5،000 ޑޮލަރާ ހަމައަށް ޖޫރިމަނާ ކުރުމަށް ވެސް ވަނީ ނިންމައިފަ އެވެ.