02 އޮކްޓޯބަރ 2018 - 07:37
ކަސްރަތަށް ބައިސްކަލު ދުއްވުމަކީ ރާއްޖޭގައި ވެސް މިހާރު އާންމުވަމުން އަންނަ ކަމެކެވެ. ރަށް ވަށައި ބުރު ޖެހުން ފިޔަވައި ބައިސްކަލުގައި މާ ބޮޑު ކަމެއް މި ކުޑަކުޑަ ގައުމުގައި ކުރެވޭކަށް ނޯވެއެވެ. އެކަމަކު ބޮޑެތި ގައުމުތަކުގައި ތަފާތެވެ.
މި ގޮތަށް ބުރުޖެހުމުގައި ރައްކާތެރިކަމުގެ ގޮތުން ބޭނުންކުރަނީ އެންމެ ބައްތިއެއް ނޫނެވެ. ހުންގާނުގައި ހުންނަ ބައްތީގެ އިތުރުން ނިތްކުރިމަތީގައި ވެސް ބައްތި ހަރުކޮށްފައި ހުރެއެވެ. ބޭނުމަކީ ދާ މަގު ދެނެގަތުމާއި ތިމާގެ ނަޒަރު ހިނގާ ދިމާ ދިއްލައިލުމެވެ. މީގެ ބަދަލުގައި ބައިސްކަލުގައި ތިން ބައްތި ހަރުކުރެވޭނެ ގޮތެއް ވެސް ހުރެއެވެ. މީގެ މިވަގުތަށް އެންމެ ޚަރަދުކުޑަ ބައްތިއަކީ ހައިޑްރާ 3 އެވެ.
މިސްޓިކް ޑިވައިސަސް ކުންފުނީގެ މި އުފެއްދުމަކީ ތިން ބޮކި ހިމެނޭ ބައްތިއެކެވެ. ކޮންމެ ބޮތްކެއްގައި 600ލޫމެންގެ އަލިކަން ހުރެއެވެ. މެދު ބޮކިން އަލިކުރާނީ ދިމާ ކުރިމައްޗަށެވެ. ދެ އަރިމަތީގެ ދެ ބޮކިން މަގުގެ ދެފަރާތަށް އަލިކޮށްދޭނެއެވެ. މި ބައްތީގައި ތިން ބޮކި ހުއްޓަސް ބަރުދަނުގައި ހުންނަނީ އެންމެ 227ގްރާމެވެ.
ދުއްވަމުންދާއިރު ދިއްލިފައި ހުންނާނީ ހަމައެކަނި ކުރިމަތީ ބައްތިއެވެ. ދެ އަރިމަތީގެ ބޮކި ދިއްލޭނީ ގޯޅި އަޅަންވުމުން، ނުވަތަ މިސްރާބު ބަދަލުކުރަންޖެހުމުންނެވެ. ކަނާތްފަރާތަށް އަނބުރާލާނަމަ ކަނާތްފަރާތަށް އަލިކުރާ ބޮކި އޭގެ އަމިއްލަ ޒާތުގައި ދިއްލޭނެއެވެ. ވައަތްފަރާތަށް މިސްރާބު ޖަހައިފިނަމަ ދިއްލޭނީ ވައަތްފަރާތު ބޮތްކެވެ.
ފަރުބަދަ މައްޗަށް އަރަމުންދާ ނަމަ ކްލައިމްބް މޯޑްގައި ބައްތި ބަހައްޓާނީއެވެ. އޭރުން ތިން ބޮކި ވެސް ހުންނާނީ ދިއްލިފައެވެ. އެކަމަކު ދެ އަރިމަތީގެ ދެ ބޮކި ދިއްލިފައި ހުންނާނީ ކުލަ ފަނޑުކޮށެވެ. ބޭނުމަކީ ކޮންމެވެސް ވަރެއްގެ ފުޅާ ދޯއްޖަކުން، ދުއްވަމުންދާ މަގަށް އަލިކުރުމެވެ. ބާޒާރުގައި މިހާރުވެސް މީގެ ތިން ބޮކިން އަލިކުރާ ބައްތި ލިބެން ހުރެއެވެ. އެކަމަކު ހައިޑްރާ 3ގެ އާދަޔާ ޚިލާފް ސިފައަކީ އެއްފަހަރާ ތިން ބޮކި އަބަދުވެސް އެއް އަލިކަމެއްގައި ދިއްލިފައި ނުހުންނަ ކަމެވެ. ނަތީޖާއެއްގެ ގޮތުން ބެޓެރީގެ ބާރުވެސް ގިނަ ދުވަހު ހިފަހައްޓާކަމަށްވެއެވެ.
މީގައި ހިމެނެނީ 3،400އެމްއޭއެޗްގެ ލީދިއަމް އައަން ބެޓެރީއެކެވެ. ކެނޑިނޭޅި ތިން ބޮކި ދިއްލިފައި ނުހުންނާތީ އެވެރެޖްކޮށް ދިއްލިފައި ހުންނާނީ 900ލޫމެންގެ އަލިކަމެވެ. މި ނިސްބަތުން ބަލާ ނަމަ ފުރިހަމަ ޗާޖާއެކު މެދުނުކެނޑި ދެ ގަޑިއިރު ބައްތީގެ އަލިކަން ހުންނާނެއެވެ. މިއަށްވުރެ ގިނައިރު ބައްތި ދިއްލައިގެން އުޅެން ބޭނުން ނަމަ މީގައި ހިމެނޭ ޔޫއެސްބީ ސީ ޕޯޓަށް ޖެހޭ ކަހަލަ އެކްސްޓާނަލް ބެޓެރީއެއް އަޅުވައިގެން ވެސް ހައިޑްރާ3 ބައްތި ބޭނުންކުރެވޭނެއެވެ.