30 ސެޕްޓެމްބަރ 2018 - 07:47
އެމެރިކާގެ ކުރީގެ ނައިބު ރައީސް ޑިކް ޗޭނީގެ ހަޔާތުގެ މައްޗަށް ބިނާކޮށް ހަދާފައިވާ ފިލްމު "ވައިސް" އަންނަ ޑިސެމްބަރު މަހުގެ 25 ގައި ސިނަމާތަކަށް ގެންނަން ނިންމައިފި އެވެ.
އެޑަމް މެކޭ ޑައިރެކްޓްކޮށްފައިވާ މި ބައޮގްރަފިކަލް ކޮމެޑީ-ޑްރާމާގައި ޗޭނީގެ ރޯލް އަދާކޮށްފައި ވަނީ މަޝްހޫރު އެކްޓަރު ކްރިސްޓިއަން ބޭލް އެވެ.
އޭނާއާ އެކު "ވައިސް" ގެ ކާސްޓުންގެ ތެރޭގައި ހިމެނޭ ތަރިންނަށް ބަލާ އިރު، ފިލްމުގައި ޗޭނީގެ އަންހެނުން ލީން ޗޭނީގެ ރޯލު ކުޅެނީ އެމީ އެޑަމްސް އެވެ. ސްޓީވް ކެރެލް ފެނިގެން ދާނީ ކުރީގެ ޑިފެންސް ސެކްރެޓަރީ ޑޮނަލްޑް ރަމްސްފެލްޑްގެ ރޯލުންނެވެ. ރައީސް ޖޯޖް ޑަބްލިއު ބުޝްގެ ރޯލުން ސޭމް ރޮކްވެލް އެވެ.
ޖޯޖް ޑަބްލިއު ބުޝްގެ ދައުރުގައި ޗޭނީ، 77، ވަނީ އެ އެމެރިކާގެ ނައިބު ރައީސްކަން 2001-2009 އަށް ކުރައްވައިފަ އެވެ. އަދި އޭނާއަކީ އެމެރިކާ އިން އިރާގުގައި ހިންގި ހަނގުރާމަ ރޭވުމުގައި ވަރަށް އިސް ދައުރެއް އަދާކުރެއްވި ބޭފުޅެކެވެ.
ޗޭނީއަކީ ވަރަށް ގިނަ ބައެއްގެ ފާޑު ކިޔުންތައް އޭނާ ނައިބު ރައީސްގެ މަގާމުގައި ހުންނެވި ދުވަސްވަރު އަމާޒުވި ބޭފުޅެކެވެ.
ސާޅީސް މިލިއަން ޑޮލަރުގެ ބަޖެޓަކުން ހަދާފައިވާ ޗޭނީގެ ވާހަކަ ކިޔައިދޭ ފިލްމުގެ ސްކްރީންޕްލޭއަކީ ޑައިރެކްޓަރު އެޑަމް އަމިއްލަ އަށް ލިޔެފައިވާ އެއްޗެކެވެ. އޭނާ އެންމެ ފަހުން ޑައިރެކްޓްކޮށް، ގެނެސް ދިން ފިލްމަކީ 2015 ގެ ކާމިޔާބު ބައޮގްރަފިކަލް ކޮމެޑީ-ޑްރާމާ "ދަ ބިގް ޝޯޓް" އެވެ.