30 ސެޕްޓެމްބަރ 2018 - 07:45
ނެޓްފްލިކްސް އިން ގެނެސްދިން ވެބް ސީރީޒް "ސެކްރެޑް ގޭމްސް" ގެ ފުރަތަމަ ސީޒަނުގެ ބޮޑު ކާމިޔާބީއާ އެކު، މީގައި ނުބައިބައި ރޯލް ކުޅުނު އެކްޓަރު ނަވާޒުއްދީން ސިއްދީގީ ދެވަނަ ސީޒަން ކުޅެދޭ އަގު ބޮޑުކޮށްފި އެވެ.
ބޮލީވުޑްގައި މިހާރު ތިބި އެންމެ ހުނަރުވެރި އެކްޓަރުންގެ ތެރޭގައި ހިމެނޭ ނަވާޒުއްދީން ބުނި ގޮތުގައި ފުރަތަމަ ސީޒަނަށް އޭނާ ކީ އަގަށް ވުރެ، ބޮޑު އަގެއް ދެވަނަ ސީޒަނަށް ކިޔުން އޭނާ އަށް ހައްގެވެ.
"އަނެއްކާ އަހަރެން ކިޔާ އަގެއް ދޭން ޕްރޮޑިއުސަރުން ވެސް ތިބީ ތައްޔާރަށް. އަހަރެން ގަބޫލު ކުރަނީ އަހަންނަށް ހައްގުވާ މިންވަރު ދޭކަށް އެއްވެސް ޕްރޮޑިއުސަރަކު ޖެހިލުމެއް ނުވާނެ ކަމަށް،" ކާމިޔާބު އެތައް ފިލްމެއް ކުޅެފައިވާ 44 އަހަރުގެ އެކްޓަރު ބޮލީވުޑް ހަންގާމާ އަށް ބުންޏެވެ. "އަހަރެން މިހިރީ ސެކްރެޑް ގޭމްސް އިން ލިބޭ އުޖޫރައާ ދޭތެރޭ ވަރަށް ހިތްހަމަޖެހިފައި."
ނަމަވެސް ފުރަތަމަ ސީޒަނަށް އޭނާ ނެގި އަގާއި ދެވަނަ ސީޒަނުން ނަގާ އަގެއް ހާމައެއް ނުކުރެ އެވެ.
ނަވާޒުއްދީން ބުނި ގޮތުގައި އަންނަ މަހު ރިލީޒްކުރާ، ނަންދިތާ ދާސް ޑައިރެކްޓްކޮށްފައިވާ ބައޮގްރަފިކަލް ޑްރާމާ "މަންޓޯ" ކުޅުނީ ހިލެ އެވެ.
"އެހެންވެ ދެން ކުޅޭ އެއްޗަކުން ބޮޑު އަގެއް ނެގުމަކީ ވެސް މައްސަލައެއް ކަމަކަށް ނުދެކެން،" އޭނާ ބުންޏެވެ.
އަނޫރާގް ކެޝަޕާއި ވިކްރަމަދިތިޔަ މޮޓްވާނޭ ޑައިރެކްޓް ކުރި "ސެކްރެޑް ގޭމްސް" ގައި ނަވާޒުއްދީން ކުޅުނު ގަނޭޝް ގައިކޮންޑޭގެ ކެރެކްޓާއަކީ އިންޑިއާގެ އުފެއްދުމަކުން މިހާތަނަށް ފެނުނު އެންމެ ވަރުގަދަ އަދި އެންމެ މޮޅު ވިލަންގެ ރޯލު ކަމަށް ބުނެ ވަރަށް ގިނަ ކްރިޓިކުން އޭނާ އަށް ތައުރީފުކޮށްފައިވެ އެވެ. އަދި އެ ކެރެކްޓާއަކީ ނަވާޒުއްދީންގެ އެންމެ މޮޅު އެކްޓިން ފެނިގެން ދިތަ ރޯލް ކަމަށް ވެސް ކްރިޓިކުން ބުންޏެވެ.
ބައެއް ކްރިޓިކުން ސިފަކޮށްފައިވާ ގޮތުގައި އޭނާގެ އެކްޓިން މޮޅުކަމުން "ސެކްރެޑް ގޭމްސް" ގެ ބަތަލުގެ ރޯލް ކުޅުނު ސައިފް އަލީ ހާން ކުޅުނު އިންސްޕެކްޓަރު ސަރްތާޖް ސިންގް ކެރެކްޓާ އަށް ވެސް ހިޔަނި އެޅިފައިވެ އެވެ.
ރިޕޯޓްތައް ބުނާ ގޮތުން ސައިފް ދެވަނަ ސީޒަނުން ވެސް ނަގާނީ "ސެކްރެޑް ގޭމްސް" ގެ ފުރަތަމަ ސީޒަނުން ނެގި އަގެވެ.
"ސެކްރެޑް ގޭމްސް" ގެ ދެ ވަނަ ސީޒަނެއް ގެނެސް ދޭން ތައްޔާރުވަމުން އަންނަކަން ނެޓްފްލިކްސް އިން އިއުލާން ކުރި ނަމަވެސް، އެ ސްޓްރީމް ކުރަން ފަށާނެ ތާރީހެއް އަދި ނުނިންމަ އެވެ.
"ބަޖިރަންގީ ބައިޖާން" އާއި "ކިކް"، "ރައީސް" އަދި "ބަދްލާޕޫރް" ފަދަ ފިލްމުތަކުގައި އޭ ލިސްޓް ތަރިންނާ އެކު މަސައްކަތްކޮށްފައިވާ ނަވާޒުއްދީންގެ ކުރިއަށް ހުރި ފިލްމުތަކުގެ ތެރޭގައި "މަންޓޯ" ގެ އިތުރުން ބައޮގްރަފިކަލް ޑްރާމާ "ތަކެރީ" އާއި ރަޖްނީކާންތުއާ އެކު ކުޅޭ "ޕެޓާ" ހިމެނެ އެވެ.