27 ސެޕްޓެމްބަރ 2018 - 08:31
ސިނަމާލެ ބްރިޖު އަޅަން މާލޭގެ ރާޅުގަނޑު ސަރަހައްދު ބަންދުކުރުމަށް ފަހު އެ ތަން އަލުން ހުޅުވާލި އިރު ބޮޑެތި ދަގަނޑު ހޮޅި ފަދަ ނުރައްކާތެރި ސާމާނު މޫދުގައި ހުރި މައްސަލައިގައި ރާޅާއެރުންތެރިން ކަންބޮޑުވުން ފާޅުކުރަން ފަށައިފި އެވެ.
ހުޅުލެ އާއި މާލެއާ ދެމެދު ބްރިޖު އަޅަން ފެށުމާ އެކު، ލޮނުޒިިޔާރަތްކޮޅުގައި ރާޅާއެޅުން މާޗް 2016ގައި މަނާކުރުމަށް ފަހު މި މަހު 7ގައި ބްރިޖު އާއްމުންނަށް ހުޅުވުމާ އެކު ރާޅާއެޅުން ހުއްދަކުރި އެވެ. ނަމަވެސް ބްރިޖު އަޅަން ހެދި ވަގުތީ ޕްލެޓްފޯމްތަކުގެ ބައިތައް އެ ސަރަހައްދުގައި އަދިވެސް ހުރުމުން ރާޅާ އެޅުމުގައި ސަމާލުވާން ޖެހޭ ކަމަށް ހައުސިން މިނިސްޓްރީން މިދިޔަ ހަފްތާގައި ނެރުނު އިއުލާނެއްގައި ބުނެފައިވެ އެވެ.
ބްރިޖު ހުޅުވަން ތައްޔާރުވި އިރު ހައުސިން މިނިސްޓަރު މުހައްމަދު މުއިއްޒު ވިދާޅުވެފައި ވަނީ އެ ސަރަހައްދުގައި ރާޅާއެޅުން މަނާކުރީ ސަލާމަތީ ސަބަބުތަކަކަށްޓަކައި ކަމަށާއި "ބްރިޖު ހުޅުވުމާ އެކު، އުފަލާ އެކު ރާޅާއަޅަންވީ" ކަމަށެވެ.
އެކަމަކު ރާޅުގަނޑު ހުޅުވި އިރު އެ ތަން ސާފުކޮށްފައި ނުވާތީ ރާޅާއެޅުންތެރިންނަށް ވަނީ ނުރައްކަލާ ކުރިމަތިލާން ޖެހިފަ އެވެ.
ރާޅުގަނޑު ސަރަހައްދުގެ މޫދުގައި ހުރި ކުނިބުނީގެ ފޮޓޯތަކަކާ އެކު މޯލްޑިވްސް ބޮޑީބޯޑިން އެސޯސިއޭޝަނުގެ ރައީސް އަބްދުﷲ އަރީފު (ފުކޫ) ފޭސްބުކްގައި ޕޯސްޓްކޮށްފައިވާ ގޮތުގައި އެ ސަރަހައްދު އަދިވެސް އޮތް ގޮތަކީ އެއީ އެވެ. މޫދަށް އެރޭ މީހުންނަށާއި ފަރުތަކަށް ވެސް އެ އެއްޗެހީގެ ނުރައްކާ ބޮޑުކަން އޭނާ ފާހަގަކޮށްފައިވެ އެވެ.
"މިއިން ހޮޅިއަކަށް އެރިއްޖެއްޔާ ފުރާނަ އަށް ނުރައްކާވާ ފަދަ ބޮޑު އަނިޔާއެއް ލިބުން އެކަށީގެންވެ އެވެ،" ރާއްޖޭގެ އިސް ރާޅާއެރުންތެރިއެއް ކަމަށްވާ ފުކޫ ލިޔެފައިވެ އެވެ.
"ފަރުމަތީ ބައެއް ހޮޅިތައް ރާޅާއެކީ ފުރޮޅި ފަރަށް ވެސް ބޮޑެތި ގެއްލުންތަކެއް ދަނީ ލިބެމުން."
ފުކޫ ވަނީ އެ ތަކެތި މޫދުން ނަގައި ސާފުކޮށްދޭން އެންވަޔަރްމެންޓް މިނިސްޓްރީ އާއި ހައުސިން މިނިސްޓްރީގެ ކިބައިން އެދިފަ އެވެ.
ބްރިޖުގެ މަސައްކަތް ފެށުމާ އެކު އެ ސަރަހައްދުގައި ރާޅާއެޅުން މަނާކުރުމުން ރާޅާއަޅާމީހުން ހިތްހަމަނުޖެހުން ފާޅުކުރި އެވެ. އެ މައްސަލައިގައި ހައުސިން މިނިސްޓްރީ އާއި ކަމާ ބެހޭ އެހެން އިދާރާތަކަށް ޝަކުވާ ވެސް ހުށަހެޅި އެވެ.
އެކަމަކު އެހާ ބޮޑު މަސައްކަތެއް ކުރިއަށް ދާ އިރު ރާޅާއެޅުންތެރިންނަށް ނުރައްކާތަކެއް ކުރިމަތިވެދާނެތީ ސަރުކާރުން އެ ސަރަހައްދު ބަންދުކުރީ އެވެ.