27 ސެޕްޓެމްބަރ 2018 - 08:04
ތަފާތު ވައްތަރުގެ ސްކޫޓަރަކީ ކުޑަކުދިންގެ މެދުގައި ވަރަށް މަގުބޫލު އުޅަނދެކެވެ. ބޮޑެތި ގައުމުތަކުގައި ޕަބްލިކް ޓްރާންސްޕޯޓް ބޭނުންކުރާ މީހުން އެންމެ އާންމުކޮށް ބޭނުންކުރާ ދުއްވާ އުޅަނދަކީ ސްކޫޓަރެވެ. ޚާއްސަކޮށް މިހާރު އެންމެ ހިނގާ ބާވަތަކީ އިލެކްޓްރިކް ސްކޫޓަރެވެ. އާންމު ގޮތެއްގައި މީގެ ސްކޫޓަރުގެ އެންމެ ނުތަނަވަސް ކަމަކީ ބަރުވެފައި، ގެންގުޅެން އުނދަގޫވުމެވެ. ޖަރުމަނުގެ ކުންފުންޏަކުން ފައްކާކުރަމުން އަންނަ އާމޯ އިލެކްޓްރިކް ސްކޫޓަރަކީ ފަސޭއިން އުފުލާ ގެންގުޅެވޭ ގޮތަށް ފަރުމާކޮށްފައިވާ އެއްޗެކެވެ.
ރާއްޖޭގެ ކުދި ރަށްރަށުގައި މީގެ ސްކޫޓަރު ގެންގުޅެން އުނދަގޫވެދާނެއެވެ. އަދި މާލޭގެ ހަލަބޮލި މަގުތަކުގައި މީގެ ސްކޫޓަރު ދުއްވުން ނުރައްކާ ކަމަކަށް ވެސް ވެދާނެއެވެ. އެކަމަކު ދުއްވާ އެއްޗިހި މަދު ވަގުތެއްގައި ދުއްވާލަން މިއީ ވަރަށް ފަސޭހަ އުޅަނދެކެވެ. އާމޯ އިލެކްޓްރިކް ސްކޫޓަރުގެ އެންމެ ޚާއްސަ ސިފައަކީ މީގެ ލުއިކަމާއި ފަސޭހައިން ފައްޖަހާލައިގެން އާދައިގެ ބްރީފްކޭހެއް ގޮތަށް އުފުލައިގެން ތަންތަނަށް ގެންދެވޭ ކަމެވެ.
އެލުމިނިޔަމާއި ކާބަން ފައިބަރުން އުފައްދާފައިވާ މި ސްކޫޓަރު ފަރުމާކޮށްފައިވަނީ އެހެނިހެން ވެސް ހޯވާބޯޑްތަކެކޭ އެއްގޮތަށް މީގެ މައްޗަށް ކޮޅަށް އަރައިގެން ހުރެ، ތިމާގެ ބަރަށް ކޮޅުކޮޅަށް އެނބުރޭ ގޮތަށެވެ.
ބުރަކި ޖެއްސުމާއި ހޭރިޔާކުރުމާއި، ދުވެލި ބާރުކުރުން ބިނާވެގެންވަނީ ދުއްވާ މީހާ ބުރަވާ ކޮޅެއްގެ މައްޗަށެވެ. އާމޯ ސްކޫޓަރަށް ގަޑިއަކު 15 ކިލޯމީޓަރުގެ ބާރުމިނުގައި ދަތުރުކުރެވެއެވެ. މީގެ ބެޓެރީ އެއްފަހަރު ޗާޖުކޮށްގެން ވިއްސަކަށް ކިލޯމީޓަރުގެ ރާސްތާ ކަޑައްތުކުރެވޭނެއެވެ. ޗާޖު ދިޔުމުން 45 މިނިޓްތެރޭ 80 ޕަސެންޓަށް ބެޓެރީ ޗާޖުކޮށްދެއެވެ. މީގެ ބަރުދަނުގައި ހުންނަނީ 6.5 ކިލޯއެވެ.