26 ސެޕްޓެމްބަރ 2018 - 06:34
ޖުލައި މަހު ރިލީޒްކުރި "ދަޅަކް" އިން ބޮލީވުޑަށް ތައާރަފުވި ބަތަލާ ޖާންވީ ކަޕޫރް ރަސްމީކޮށް ސޮއިކުރި ދެވަނަ ފިލްމަކީ ކަރަން ޖޯހަރް ޑައިރެކްޓްކޮށް، 2020 ގައި ރިލީޒްކުރަން ނިންމާފައިވާ ތާރީހީ ފިލްމު "ތަހުތު" އެވެ.
ނަމަވެސް އެ ފިލްމުގެ އިތުރަށް ،ސްރީދޭވީގެ އަންހެން ދަރިފުޅު ޖާންވީ ސޮއިކޮށްފައިވާ ކަމަށް ބުނާ އިތުރު ފިލްމުތަކެއް ވެސް އެބަ ހުއްޓެވެ. އޭގެ ތެރޭގައި މުޅިން ވެސް ހުރީ ކަރަންގެ ދަރްމާ ޕްރޮޑަކްޝަންގެ ފިލްމުތަކެވެ.
ކަރަން ޕްރޮޑިއުސްކޮށް، ޝަޝަންކް ކައިތާން ޑައިރެކްޓް ކުރާ "ރަންބޫމީ" ގެ ބަތަލާއަކަށް ޖާންވީ ހަމަޖައްސާފައިވާ ކަމަށް ރިޕޯޓްތައް މިހާރު ބުނެ އެވެ. ނަމަވެސް މިކަން އަދި ރަސްމީކޮށް ކަށަވަރެއް ނުވެ އެވެ. މި ފިލްމުގެ ޑައިރެކްޓަރު ޝަޝަންކްއަކީ "ދަޅަކް" ގެ ޑައިރެކްޓަރު ވެސް މެ އެވެ.
ކުރިން އަޑު އަރާފައިވާ ގޮތުން ވަރުން ދަވަން ބަތަލުގެ ރޯލް ކުޅޭ ކޮސްޓިއުމް އެކްޝަން ޑްރާމާ "ރަންބޫމީ" ގައި ބަތަލާގެ ރޯލް ކުޅޭނީ އާލިއާ ބަޓް އެވެ. ނަމަވެސް ކަރަން ޕްރޮޑިއުސް ކުރާ ހަތަރު ވަނަ ފިލްމެއްގައި ވަރުން އާއި އާލިއާ އެކުގައި މިހާރު ވެސް މަސައްކަތް ކުރަމުން އަންނާތީ، އެހެން ބަތަލާއަކަށް ފިލްމު ދިނީ އެވެ. އަންނަ އަހަރު ރިލީޒް ކުރާ "ކަލަންކް" އަކީ ވަރުން އާއި އާލިއާ އެކުގައި ފެނިގެން ދާނެ ހަތަރު ވަނަ ފިލްމެވެ.
ޖާންވީ ސޮއިކޮށްފައިވާ ކަމަށް ބުނާ އިތުރު ފިލްމުތަކުގެ ތެރޭގައި "ދޯސްތާނާ 2" އާއި އިންޑިއާގެ ފުރަތަމަ އަންހެން ހެލިކޮޕްޓަރު ޕައިލެޓްގެ ޝަރަފު ހޯދާފައިވާ އަސްކަރީ އޮފިސަރު ގުންޖަން ސަކްސޭނާގެ ވާހަކަ ކިޔައިދޭ ފިލްމު ހިމެނެ އެވެ.
"ރަންބޫމީ" އަކި 2020 ގެ ފަހުކޮޅު ރިލީޒް ކުރަން ތާވަލުކޮށްފައި އޮތް ފިލްމެކެވެ.
ބޭބެ ސަލްމާން ހާނާ ގާތް ކުރާ ވަރުގެ މަގުބޫލު ކަމެއް ނުލިބުނަސް ކޮއްކޮ އަރްބާޒް ހާނަކީ ދޭތެރެ ދޭތެރެއިން ކޮންމެވެސް ފިލްމެއްގައި އެކްޓްކޮށްލާ މީހެކެވެ. މިހާރު ވެސް އޭނާގެ ފިލްމެއް ރިލިވާން އޮތީ ތައްޔާރަށެވެ. އެއީ އަންނަ މަހުގެ 26 ގައި ރިލީޒް ކުރާ "ޖެކް އެންޑް ދިލް" އެވެ.
ސަޗިން ޕީ ކަރަންޑޭ ޑައިރެކްޓްކޮށްފައިވާ ފިލްމުގެ އިތުރު ކާސްޓުންގެ ތެރޭގައި ސޮނާލް ޗޯހަން، އަމިތި ސާދު އަދި އެވެލީން ޝަރްމާ ހިމެނެ އެވެ. "ޖެކް އެންޑް ދިލް" ގައި އަރްބާޒް ފެނިގެން ދާނީ ވާލިއާޖީ ކިޔާ ކެރެކްޓާއަކުންނެވެ.
އަންނަ އަހަރު އިޓަލީގެ ލޯބިވެރިޔާ ޖޯޖިއާ އެންޑްރިއާނީއާ ކައިވެނި ކުރަން ތައްޔާރުވަމުން އަންނަ ކަމަށް ބުނާ އަރްބާޒް އެންމެ ފަހުން ބޮޑު ސްކްރީނުން ފެނިފައި ވަނީ މި އަހަރުގެ ޖެނުއަރީގައި ރިލީޒް ކުރި "ނިރްދޯޝް" އިންނެވެ.
އިންޑިއާ އާއި މޯލްޓާގެ ޝޫޓިން ޝެޑިއުލް ނިންމާލާފައި އޮތް ސަލްމާން ހާންގެ ފިލްމު "ބާރަތު" ގެ ޓީމް އަބޫ ދާބީ އަށް މިސްރާބު ޖަހައިފި އެވެ. އެ ގައުމުގެ ލޮކޭޝަން ހަންޓްގެ ތެރެއިން ޑައިރެކްޓަރު އަލީ އައްބާސް ޒަފަރު ވަނީ ބައެއް ފޮޓޯތައް ވެސް ޓްވީޓްކޮށްފަ އެވެ.
އަންނަ އަހަރުގެ ފިތުރު އީދުގައި ރިލީޒް ކުރާ "ބާރަތު" ގައި ސަލްމާނާ އެކު ފެނިގެން ދާނެ ތަރިންގެ ތެރޭގައި ކެޓްރީނާ ކެއިފް، ޖެކީ ޝްރޮފް، ތައްބޫ، ޑިޝާ ޕަޓްނީ، ސުނިލް ގްރޯވާ، ނޯރާ ފަތެހީ ހިމެނެ އެވެ.
މި ފިލްމަކީ މިދިޔަ އަހަރު ރިލީޒްކޮށް، ބޮޑު ކާމިޔާބީއެއް ހޯދި "ޓައިގާ ޒިންދާ ހޭ" އަށް ފަހު ސަލްމާނާ ކެޓްރީނާ އެކުގައި ކުޅޭ ފުރަތަމަ ފިލްމެވެ. އަދި އެކުގައި ސްކްރީން ހިއްސާ ކުރާ އަށް ވަނަ ފިލްމެވެ.
އިންޑިއާގެ ތާރީހުގައި ފާހަގަކޮށްލެވޭ ވަރުގަދަ ހަނގުރާމަވެރިއެއް ކަމަށްވާ ތާނަޖީ މަލުސާރޭގެ ވާހަކަ ކިޔައިދޭ ފިލްމް "ތާނަޖީ: ދި އަންސަންގް ވޮރިއާ" ގެ ޝޫޓިން އަޖޭ ދޭވްގަން ފަށައިފި އެވެ. ފިލްމްގެ ޓައިޓްލް ރޯލް ކުޅޭނީ އަޖޭ އެވެ.
މި ފިލްމް ޑައިރެކްޓް ކުރަނީ މަރާޓީ ޑައިރެކްޓަރު އޯމް ރައުތު އެވެ. ޓީ ސީރީޒް ވެސް ހިއްސާވާ ގޮތަށް ބޮޑު ބަޖެޓަކުން ހަދާ "ތާނަޖީ" ގެ މަންޒަރުތައް ނަގަން މުމްބާއީގައި ވަނީ ވަރަށް ބިޔަ ސެޓެއް ވެސް ހަދައިފަ އެވެ.
ރިޕޯޓްތައް ބުނާ ގޮތުން މި ފިލްމުގެ ރޯލެއް ވަނީ ސައިފް އަލީ ހާނަށް ވެސް ހުށަހަށަޅައިފަ އެވެ. އެކަމަކު އަޖޭއާ އެކު ކާސްޓުން ދެން ފެނިގެން ދާނީ ކޮން ތަރިންނެއް ކަމެއް އަދި ނޭނގެ އެވެ.
އަންނަ އަހަރު ރިލީޒް ކުރާ ފިލްމު "ސްޓޫޑަންޓް އޮފް ދި އިޔާ 2" ގެ ކާސްޓާއި ކްރޫ އިންޑިއާގެ ޝޫޓިން ނިންމައިލުމަށް ފަހު، ފިލްމްގެ މަންޒަރުތަކެއް ނަގަން ތައިލެންޑަށް ހިނގައްޖެ އެވެ. އެ ގައުމުގައި ފިލްމްގެ މަންޒަރުތަކެއް ނަގައި ނިންމައި، އެނބުރި އިންޑިއާ އަށް އަންނަ އިރު ފިލްމުގެ ޝޫޓިން އެއްކޮށް އޮންނާނީ ނިމިފަ އެވެ.
ދެހާސް ބާރަ ވަނަ އަހަރު ކަރަން ޖޯހަރު ޑައިރެކްޓް ކުރި "ސްޓޫޑަންޓް އޮފް ދި އިޔާ" ގެ މަންޒަރުތަކެއް ވެސް ތައިލެންޑްގައި ނެގި އެވެ. މި ފިލްމްގެ ދެވަނަ ބައި ތަފާތު ކާސްޓަކާ އެކު ޑައިރެކްޓް ކުރަނީ "އައި ހޭޓް ލަވް ސްޓޯރީޒް" ފަދަ ފިލްމްތައް ގެނެސް ދިން ޕުނިތު މަލްއުތުރާ އެވެ. އޭނާ އެންމެ ފަހުން ޑައިރެކްޓް ކުރީ ކަރީނާ ކަޕޫރާއި އިމްރާން ހާން ލީޑް ރޯލް ކުޅުނު 2013 ގެ ފްލޮޕް ފިލްމް "ގޯރީ ތެރެ ޕިޔާރް މޭ" އެވެ.
މެއި، 10، 2019 ގައި ރިލީޒް ކުރާ "ސްޓޫޑަންޓް އޮފް ދި އިޔާ 2" ގެ ތަރިންނަކީ ޓައިގާ ޝްރޮފާ އެކު އަލަށް ތައާރަފު ކުރާ އަނަންޔާ ޕާންޑޭ އާއި ތާރާ ސުތާރިއާ އެވެ. މިއީ ކޮލެޖް ޒުވާނުންތަކެއްގެ ލޯބީގެ ވާހަކައެއް ކިޔައި ދޭނެ ފިލްމެކެވެ.
ކަރަން ޑައިރެކްޓް ކުރި "ސްޓޫޑަންޓް އޮފް ދި އިޔާ" އަކީ ވަރުން އާއި އާލިއާ އަދި ސިދާތު މަލްއުތުރާ ބޮލީވުޑަށް ނެރުނު ފިލްމެވެ.