25 ސެޕްޓެމްބަރ 2018 - 13:14
ޖަކާޓާ (ސެޕްޓެމްބަރު 25) - އިންޑޮނީޝިއާގައި ފިޝިން ހަޓެއް ބަލަހައްޓަން އުޅުނު 19 އަހަރުގެ ޒުވާނަކު އޮޔާ ގެންގޮސް ކަނޑުމަތީގައި ހާލުގައި ޖެހި 49 ދުވަސް ހޭދަކުރި ފަހުން ސަލާމަތްކޮށްފި އެވެ.
ޖުލައި މަހު މެދެއްހާ ހިސާބުގައި އިންޑޮނީޝިއާގެ އައްސޭރިން 125 ކިލޯ މީޓަރު (77 މޭލު) ބޭރުގައި އަޅާފައި އޮތް ހަޓް ކޮޅިގަނޑެއްގައި ޖެހި އޭގައި ޖަހާފައި ހުރި ވާތައް ގަދަ ވަޔާ އެކު ކަނޑައިގެން ދިއުމުން 19 އަހަރުގެ އަލްޑީ ނޮވެލް އަޑިލަން އާއި ހަޓް ކަނޑު މައްޗަށް ބެހުނެވެ. އޭނާ ސަލާމަތް ކުރީ އެތައް ހާސް ކިލޯ މީޓަރެއްގެ ދުރުން ގުއާމް ކައިރިންނެވެ. އޭނާ ސަލާމަތް ކުރީ ޕެނަމާގެ އުޅަނދަކުންނެވެ.
ސުލަވޭސީ އައިލެންޑަށް އުފަން ޒުވާނާ ހަޓްގައި ކުރީ އޭގެ ލައިޓްތައް ދިއްލުމުގެ މަސައްކަތެވެ. ކަނޑު މެދުގައި އަޅާފައި އޮތް ހަޓް ކޮޅިގަނޑެއްގައި ޖެހުނީ ޖުލައި 14 ވަނަ ދުވަހު އެވެ. ނަތީޖާއެއްގެ ގޮތުން އޭގެ ވާތައް ކެނޑި އޮޔާ ގެންދަން ފެށި އެވެ. އޭގައި ހުރީ ކާބޯތަކެތީގެ މަދު އެތިކޮޅެކެވެ. އެ ތަކެތި ހުސްވުމުން އޭނާ ސަލާމަތްވީ ލޮނު ބޮއެގެންނާއި ކަނޑުން މަސް ހިފައި ކައްކައިގެން ކައިގެންނެވެ.
އަޑިލާންއާ ހަވާލާދީ ޖަޕާންގެ އޮސާކާގައި ހުރި އިންޑޮނީޝިއާގެ ޑިޕްލޮމެޓަކު ވިދާޅުވީ ކަނޑު މައްޗަށް ބެހުމުން އަލްޑީ ވަރަށް ބިރުގަތް ކަމަށެވެ.
"ކާގު ބޯޓެއް ފެންނަ ކޮންމެ ފަހަރަކު އޭނާ އެ ބޯޓަށް ގޮވާ ހަދާ ކަމަށް ބުނި. މި ގޮތުން 10 ބޯޓު އޭނާ އަށް ވަނީ ފެނިފައި. އެކަމަކު އެއްވެސް ބޯޓަކަށް އޭނާ ފެނިފައެއް ނުވޭ،" ޑިޕްލޮމެޓް ވިދާޅުވި އެވެ.
އޮގަސްޓް 31 ވަނަ ދުވަހު އަޑިލާން އަށް ކާގޯ ބޯޓެއް ފެނުމުން އޭނާ ވަނީ ރޭޑިއޯ ސިގްނަލެއް ފޮނުވައިފަ އެވެ. ޕެނަމާގެ އުޅަނދަށް އަލްޑީގެ ހަޓް ފެނުމުން އެއަށް އޭނާ ނެގުމަށް ފަހު ވަނީ ގުއާމްގެ ކޯސްޓްގާޑަށް އަންގައިފަ އެވެ. ކޯސްޓްގާޑުން ވަނީ އޭނާ ޖަޕާނަށް ގެންދިއުމަށް އަންގައިފަ އެވެ. އޭގެ ފަހުން އޮސާކާގައި ހުންނަ އިންޑޮނީޝިއާގެ ކޮންސިއުލޭޓުން ވަނީ އޭނާއާ ހަވާލުވެފަ އެވެ.