24 ސެޕްޓެމްބަރ 2018 - 09:52
ޓޫރިސްޓުން ގިނަ އަދަދަކަށް ޒިޔާރަތް ކުރާ ބޮޑެތި ސިޓީތަކުން ގެންގުޅޭ ހާއްސަ އުސޫލުތައް ހުރެ އެވެ. އެގޮތުން ބްރިޖް ފަދަ ތަންތަނުގައި މަޑުކޮށްލައިގެން ތިބުމާއި ކޮތަރަށް ކާންދޭން ތިބުމާއި ކުނި އެޅުމާއި މޫދަށް އެރޭ ހެދުމުގައި އާންމުންގެ ތެރެއަށް ނުކުމެ އުޅުމާއި މޮނިއުމަންޓްތަކުގައި ބައިސްކަލް ފަދަ އުޅަނދުތަކުގެ ތަޅު ހަރު ކުރުން ފަދަ ކަންކަމަކީ އިޓަލީގެ ވެނިސްގައި މިހާރު ވެސް މަނާ ކަންކަމެވެ.
އެ ގައުމުގެ އެންމެ ހިތްގައިމު އަދި ޓޫރިސްޓުން ވަރަށް ގިނަ އަދަދަކަށް ކޮންމެ އަހަރަކު ވެސް ޒިޔާރަތް ކުރާ ވެނިސް އިން މިހާރު އަންނަނީ އަނެއްކާ ގަވައިދަކަށް އަމަލު ކުރަން ފަށަން ތައްޔާރުވަމުންނެވެ. އެއީ ރަށުތެރެ ބަލައިލަން ނުކުމެ އުޅޭ އިރު، ޖެހުނުހާ ތަނެއްގައި ޓޫރިސްޓުން އިށީނުން މަނާ ކުރާ އުސޫލެކެވެ.
ވެނިސްގެ މޭޔަރު ލުއީ ބުރްނާރޯގެ އިސްކޮށް ހުންނަވައިގެން ހުށަހަޅުއްވާ މި ގަވައިދާ ގުޅޭ ގޮތުން ވޯޓެއް އަންނަ މަހުގެ ތެރޭގައި ވެނިސް ސިޓީ ކައުންސިލްގައި ނެގުން އޮންނާނެ އެވެ. އެއަށް އަމަލު ކުރަން ފަށާނީ ވޯޓަށް ފަހު އެވެ.
އެ ގަވަދުގައި ފާހަގަކޮށްފައިވާ ގޮތުގައި އިށީންނަން ނުޖެހޭ ތަންތަނުގައި އިށީނދެ މަޑުކޮށްލައިގެން ތިބޭ ނަމަ 500 ޔޫރޯ އިން ސިޓީ އަށް ޒިޔާރަތް ކުރާ ޓޫރިސްޓުން ޖޫރިމަނާ ކުރާނެ އެވެ. އެހެންވެ މިއީ ކުރިއަށް އޮތް ތަނުގައި ވެނިސް އަށް ދަތުރެއް ކުރާ ނަމަ ހަނދާނުގައި ބަހައްޓަން ޖެހޭ ކަމަކަށް ވާނެ އެވެ.
ވެނިސްއަކީ މިހާރު ވެސް އެ ސިޓީގައި ޓޫރިސްޓުންނަށް ހާއްސަކޮށްފައިވާ ތަންތަނުގައި އާންމުން އިށީނދެ މަޑުކޮށްލައިގެން ތިބުން މަނާކޮށްފައި އޮންނަ ސިޓީއެކެވެ.