20 ސެޕްޓެމްބަރ 2018 - 15:22
އަންނަ އާދިއްތަ ދުވަހުގެ ބާއްވާ ރިޔާސީ އިންތިޚާބުގައި ރައްޔިތުން ލާ ވޯޓު ރައްކާތެރިކޮށްދިނުމަށް، ސަލާމަތީ ބާރުތަކަށް އިދިކޮޅު ކޯލިޝަނުން މިއަދު ގޮވާލައިފި އެވެ.
އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގެ ތަރުޖަމާނު މައްޗަންގޯޅި އުތުރު ދާއިރާގެ މެމްބަރު މާރިޔާ އަހުމަދު ދީދީ ވިދާޅުވީ، ސިފައިންނާއި ފުލުހުންގެ މަސްއޫލިއްޔަތަށް ވާންޖެހޭނީ ރައްޔިތުންނަށް ރައްކާތެރިކަން ފޯރުކޮށްދިނުން ކަމަށެވެ. އެހެންކަމުން ގައުމީ ބޮޑު ކަމެއްގެ ގޮތުގައި ދެކި ވޯޓުގެ ކަންތައްތައް އިންސާފުވެރިކަމާ އެކު ބަލައިދިނުމަށް އިދިކޮޅު ޕާޓީތަކުން ވަނީ އެދިފަ އެވެ.
އޭނާ ވިދާޅުވީ ބައެއް ފަހަރަށް ސަލާމަތީ ބާރުތަކުގެ އަމަލުތައް ހުންނަގޮތުން ވެސް ތަނެއްގައި ހަމަނުޖެހުން ހިންގަން ފުރުސަތު ލިބިގެންދާ ކަމަށެވެ. އެހެންވެ އެއްވެސް ފަރާތަކަށް ނުޖެހި، މިނިވަންކަމާއެކު އިންތިޚާބުގެ ސަލާމަތީ ކަންކަން ބެލެހެއްޓުމަށް އެދިވަޑައިގެންނެވި އެވެ.
"ފުލުހުންނާ ސިފައިންނަށް ވެސް އަޅުގަނޑުމެން އިލްތިމާސްކުރަން ރައްޔިތުންގެ ވޯޓު ރައްކާތެރިކޮށްދެއްވުމަށް،" މާރިޔާ ވިދާޅުވި އެވެ. "އެބޭފުޅުންގެ މަސްއޫލިއްޔަތެއް އެއީ، އެބޭފުޅުންގެ ވާޖިބުތަކުގެ ތެރޭގައި ހިމެނޭ ކަމެއް ރައްޔިތުންގެ މިފަދަ އަސާސީ ހައްގެއް، މިފަދަ ބޮޑު ކަމެއް ހިނގަމުުންދާއިރު، މި ވަގުތު އެބޭފުޅުންގެ އެންމެ ބޮޑު މަސްއޫލިއްޔަތަކަށް ވާނީ ހަމަހަމަކަމާ އެކީގައި ރައްޔިތުންގެ ފަރާތުން ތިބޭ ބައެއް ކަމުގައި ދެކެވަޑައިގެން ވޯޓުގެ ކަންކަން ރަނގަޅަށް، އިންސާފުވެރިކަމާ އެކީ ބައްލަވައި ކަން ކޮށްދެއްވުން."
އޭނާ ވިދާޅުވީ ވޯޓުގެ ތެރޭގައި ނަމަވެސް ސަލާމަތީ ބާރުތަކުގައި، ރައްޔިތުން އެހީތެރި ކަމަކަށް އެދިއްޖެނަމަ އެ ރައްޔިތުން ސަލާމަތް ކޮށްދޭން ޖެހޭނެ ކަމަށެވެ. އަދި ހަމަނުޖެހުމެއް ހިންގާނެ އެއްވެސް ކަމެއް ކޮށްގެން ނުވާނެ ކަމަށް ވެސް މާރިޔާ ވިދާޅުވި އެވެ.
"އިންސާފުވެރިކަން ގެއްލޭ ގޮތަކަށް ނުވަތަ ދެ ފަރާތް ދޭތެރޭގައި ޖެހިގެން އުޅޭ މައްސަލައެއްގައި، އެއް ފަރާތަށް ޖެހިގެން އެބޭފުޅުން [ސަލާމަތީ ބާރުތަކުން] ތިއްބަވާހެން ހީވެއްޖެކަމުގައި ވަންޏާ މި ކަހަލަ ހަމަނުޖެހުމަށް ފުރުސަތު ލިބިދާނެ. އެހެންވެ އެކަހަލަ އެއްވެސް ކަމެއް ނުކުރައްވާ، ވީހާ ވެސް އިންސާފުވެރިކަމާ އެކީގައި، ކޮންމެ ރައްޔިތަކީ ހަމަ އާއްމު ރައްޔިތެއް ކަމަށް ދެކެވަޑައިގެން، ކޮން ޕާޓީއަކަށްތޯ ނިސްބަތް ވަނީ ނުވަތަ އެއްވެސް ކަހަލަ ސިޔާސީ ނުފޫޒުން އެއްކިބާވެ އެ ދުވަހުގެ ކަންކަން ކޮށްދެއްވުން،" މާރިޔާ ވިދާޅުވި އެވެ.
ވޯޓުލާން ބާކީ ދެ ދުވަހަށް ވެފައިވާއިރު، އައިޑީކާޑު ގަތުން ފަދަ ކަންތައްތައް ކުރަމުންދާ ކަމުގެ އަޑުތައް ފެތުރެމުންދާ ކަމަށް އޭނާ ވިދާޅުވި އެވެ. ކަންބޮޑުވުންތައް ހިއްސާކުރައްވަމުން މާރިޔާ ވަނީ އެކަމަށް ސަމާލުކަން ދިނުމަށް އެދިވަޑައިގެންފަ އެވެ.
ގާނޫނާ ހިލާފަށް ހިނގާ ކަންކަން ރިކޯޑުކޮށް އެ ކަންތައް އިލެކްޝަންސް ކޮމިޝަން (އީސީ) އާއި ކަމާބެހޭ އެންމެހާ ފަރާތްތަކަށް ހުށަހެޅުމަށް ވެސް އިދިކޮޅު ޕާޓީތަކުން ވަނީ ގޮވާލައިފަ އެވެ. އަދި އެކަންކަމާ ގުޅޭ ހެކި ނައްތާނުލުމަކީ ވަރަށް މުހިއްމު ކަމެއް ކަމަށް ވިދާޅުވި އެވެ.