19 ސެޕްޓެމްބަރ 2018 - 11:03
ޒިއުރިކް (ސެޕްޓެމްބަރު 19) – ލީގެއްގައި ކްލަބަކުން އަމިއްލަ ދަނޑުގައި ކުޅެން ޖެހޭ މެޗު އެހެން ގައުމެއްގައި ކުޅެގެން ނުވާނެ ކަމަށް ވިދާޅުވެ، ސްޕެނިޝް ލީގުން އެމެރިކާގައި ބާއްވަން ރާވަމުން އަންނަ މެޗަށް ފީފާގެ ރައީސް ޖިއާނީ އިންފަންޓީނޯ ފާޑުވިދާޅުވެއްޖެ އެވެ.
ސްޕެނިޝް ލީގުން ހަދާފައިވާ އެއްބަސްވުމެއްގެ ދަށުން ކުރިއަށް އޮތް 15 އަހަރު، ކޮންމެ ސީޒަނެއްގެ އެއް މެޗު އެމެރިކާގައި ކުޅެން ޖެހޭނެ އެވެ. އެހެންވެ ލީގުގައި ޖެނުއަރީ 26 ގައި ޖިރޯނާ އާއި ބާސެލޯނާ ކުޅޭ މެޗު އެމެރިކާގެ މަޔާމީގައި ބޭއްވުމުގެ ހުއްދައަށް ކަމާބެހޭ ފަރާތްތަކުގައި ވަނީ އެދިފަ އެވެ.
"އަހަރެން އިހުތިޔާރުކުރާނީ މޭޖާ ލީގުގެ ވަރުގަދަ މެޗެއް އެމެރިކާގައި ކުޅޭތަން ބަލަން، ސްޕެނިޝް ލީގުގެ މެޗެއް އެމެރިކާގައި ކުޅުމަށް ވުރެ،" އިންފަންޓީނޯ ވިދާޅުވި އެވެ. "ފުޓްބޯޅައިގެ އާއްމު އުސޫލަކީ ހޯމް މެޗު ހޯމްގައި ކުޅުން، ބޭރު ގައުމެއްގައެއް ނޫން ކުޅެން ޖެހޭނީ."
އެ ވާހަކަތަކަށް ރައްދުދެއްވައި ސްޕެނިޝް ލީގުގެ ރައީސް ހަވިއޭ ޓެބާސް ވިދާޅުވީ ކެނެޑާގައި ޕްރޮފެޝަނަލް ލީގެއް އޮންނަ ކަމަށާއި އެކަމަކު އެމެރިކާގެ މޭޖާ ލީގުގައި ކެނެޑާގެ ތިން ޓީމު ވާދަކުރާ ކަމަށެވެ. އެހެންވިޔަސް ކެނެޑާ ތިން ޓީމުގެ ހޯމް މެޗުތައް ކުޅެނީ އަމިއްލަ ގައުމުގައި އަމިއްލަ ދަނޑުގަ އެވެ.
ސްޕެނިޝް ލީގުގެ މި އެދުން ފުރިހަމަވާން އޮތީ ސްޕެނިޝް ފުޓްބޯޅަ ފެޑެރޭޝަނާއި ޔޫއެސް ސޮކާ ފެޑެރޭޝަނާއި ޔުއެފާ އާއި ކޮންކާކަފުން ހުއްދަ ދިނުމުންނެވެ.
ސްޕެނިޝް ފުޓްބޯޅަ ފެޑެރޭޝަނާއި އެ ގައުމުގެ ސަރުކާރު އަދި ޕްލެޔާސް އެސޯސިއޭޝަނުން ވަނީ މި މެޗާ ދެކޮޅު ވާހަކަދައްކައިފަ އެވެ. ސްޕެއިނުގެ ސަރުކާރުން ދެކޭ ގޮތުގައި މެޗު ކުޅޭ ދެ ޓީމަކީ ސްޕެއިނުން ވަކިވާން މަސައްކަތްކުރާ ކެޓަލޯނިއާ ސަރަހައްދަށް ނިސްބަތްވާ ދެ ޓީމަށް ވާތީ މީގެ ސަބަބުން އެ ހަރަކާތަށް ސަމާލުކަމެއް ލިބިދާނެ ކަމަށެވެ. ބާސެލޯނާ އާއި ޖިރޯނާ ނިސްބަތްވާ ކެޓަލޯނިއާ ސަރަހައްދުގައި މިނިވަން ދައުލަތެއް ގާއިމްވެއްޖެ ނަމަ އެ ޓީމުތަކުން ސްޕެނިޝް ލީގުގައި ވާދަކުރުމުގެ ފުރުސަތު ގެއްލި ޔޫރަޕުގެ އެހެން ލީގަކުން ފެނުމުގެ ފުރުސަތު އެބައޮތެވެ.
ޖިރޯނާގައި ކުޅެން ހަމަޖެހިފައި އޮތް މި މެޗު ގައުމުން ބޭރަށް ބަދަލުކުރުމުން އޭގެ ގެއްލުން ލިބޭ ސަޕޯޓަރުންނަށް، އެމެރިކާ އަށް ދިއުމަށާއި އެތަނުގައި ތިބުމަށް މާލީ އެހީތެރިކަމެއް ފޯރުކޮށްދޭން ލީގުން ވަނީ ނިންމައިފަ އެވެ. އެގޮތުން ސީޒަން ޓިކެޓް ގަނެފައިވާ ސަޕޯޓަރުންނަށް 1500 ހިލޭ އެއާ ޓިކެޓްދީ އަދި ބޭނުން ނަމަ މެޗަށް ފަހު އެނބުރި އަންނަން ނުވަތަ ހަފުތާ ބަންދުގައި މަޔާމީގައި މަޑުކުރުމުގެ ފުރުސަތު ދޭނެ އެވެ. ދަތުރުކުރަން ބޭނުންނުވާ ސަޕޯޓަރުންނަށް، ބާސެލޯނާއާ ދަނޑުގައި ޖިރޯނާ ކުޅޭ މެޗުން ހިލޭ ޓިކެޓްދީ ސީޒަން ޓިކެޓުން 20 ޕަސެންޓް ޑިސްކައުންޓެއްދޭނެ އެވެ