20 ސެޕްޓެމްބަރ 2018 - 07:05
"ލައިފް އިން އަ...މެޓްރޯ" ގެ ދެވަނަ ބައެއް ހަދަން ނިންމިކަން ޑައިރެކްޓަރު އަނޫރާގް ބާސޫ އިއުލާން ކުރުމާ އެކު، އެ ފިލްމުގެ ކާސްޓުންނާ ބެހޭ ގޮތުން ދެކެވޭ ވާހަކަތައް ގިނަ އެވެ. ބޮޑު ކާސްޓެއް ފެނިގެން ދާނެ ފިލްމަށް ސޮއިކުރިކަން ކަށަވަރުވާ ހަމައެކަނި އެކްޓަރަކީ އަދި ރާޖްކުމާރް ރާއޯ އެވެ.
ނަމަވެސް މި ފިލްމުން ފެނިގެން ދާނެ ކަމަށް ބުނާ ތަރިންގެ ތެރޭގައި ސައިފް އަލީ ހާން، އަރްޖުން ކަޕޫރް އަދި ސޮނާކްޝީ ސިންހާ ފަދަ ތަރިން ވެސް ހިމެނެ އެވެ.
މި ލިސްޓަށް އަލަށް އިތުރުވި ނަމަކީ ޕަރިނީތީ ޗޯޕްޅާ އެވެ. ބޮލީވުޑްގެ ހަބަރުތައް ގެނެސްދޭ ބައެއް ނޫސްތަކުން ބުނި ގޮތުގައި "ލައިފް އިން އަ...މެޓްރޯ" ގެ ދެނަ ބަޔަށް ޕަރިނީތީ މިހާރު ވަނީ ސޮއިކޮށްފަ އެވެ. އެކަމަކު އެކަން އޭނާ އާއި އަނޫރާގް ވެސް އަދި ކަށަވަރުކޮށެއް ނުދެ އެވެ.
އަނޫރާގް ދާދި ފަހުން ކުރި ޓްވީޓެއްގައި ބުނީ ފިލްމުގެ ކާސްޓުން ވަރަށް އަވަހަށް ރަސްމީކޮށް އިއުލާނުކުރާނެ ކަމަށެވެ.
ޕަރިނީތީ ކުރިން ބުނެފައިވާ ގޮތުގައި އޭނާ އެކުގައި މަސައްކަތްކޮށްލަން ބޭނުންވާ ޑައިރެކްޓަރުންގެ ތެރޭގައި އަނޫރާގް ހިމެނެ އެވެ. އަދި އޭނާގެ ފިލްމުތައް އަބަދު ވެސް ވަރަށް ކަމުދާ ކަމަށް، ސިތާދު މަލްއުތުރާއާ އެކު މިހާރު "ޖަބަރިިޔާ ޖޯޅީ" ޝޫޓް ކުރަމުން އަންނަ ބަތަލާ ބުނެފައިވެ އެވެ.
"ލައިފް އިން އަ...މެޓްރޯ" ގެ ސީކްއެލް އިން ޕަރިނީތީ ފެނިގެން ހިނގައްޖެ ނަމަ އެ ފިލްމުވެގެން ދާނީ ޕަރިނީތީ އާއި ރާޖްގެ ޖޯޑު އެކީގައި ފެނިގެން ދާނެ ފުރަތަމަ ފިލްމަށެވެ.
ޕަރިނީތީގެ ކުރިއަށް ހުރި ފިލްމުތަކުގެ ތެރޭގައި އަންނަ މަހުގެ 19 ގައި ރިލީޒް ކުރާ "ނަމަސްތޭ އިންގްލެންޑް" އާއި އަންނަ އަހަރު ރިލީޒް ކުރާ "ސަންދީޕް އޯރް ޕިންކީ ފަރާރް" ގެ އިތުރުން "ކެސަރީ" ހިމެނެ އެވެ.
މި އަހަރުގެ އެންމެ ކާމިޔާބު އެއް ފިލްމު ކަމަށްވާ "ސްޓްރީ" ގެ ބަތަލު ރާޖް މިހާރު އަންނަނީ "މޭޑް އިން ޗައިނާ" ކިޔާ ފިލްމެއްގެ މަސައްކަތް ކުރަމުންނެވެ.
ދިރިއުޅުމުގައި އެކި މީހުންނަށް ދިމާވެފައިވާ ތަފާތު ކަންތައްތަކެއް ކިޔައިދިން 2007 ގެ "ލައިފް އިން އަ...މެޓްރޯ" އަކީ ވެސް ބޮޑު ކާސްޓެއް ހިމެނުނު ފިލްމެކެވެ. އޭގެ ތެރޭގައި ޝިލްޕާ ޝެޓީ، ޝައިނީ އަހޫޖާ، ކަންގަނާ ރަނާވަތު، ކޭކޭ މެނަން، އިރްފާން ހާން، ކޮންކޮނާ ސެން ޝަރްމާ، ނަފީސާ އަލީ އަދި ދަރްމެންދްރާ ފަދަ ތަރިން ހިމެނެ އެވެ.
"ލައިފް އިން އަ...މެޓްރޯ" ގެ ދެވަނަ ބައި ގެނެސް ދޭނީ ޓީ ސީރީޒްއާ ގުޅިންގެންނެވެ.