19 ސެޕްޓެމްބަރ 2018 - 08:47
އާންމުކޮށް ލިބެން ހުންނަ ހުރިހާ ޔޯގަޓެއްގައި ހެން ވަރަށް ގިނައިން ހަކުރު އަޅާފައި ހުންނަ ކަމަށާއި އެކަމަށް ސަމާލުވާން ޖެހޭ ކަމަށް ސިއްހީ ތަޖުރިބާކާރުން ބުނެފި އެވެ.
ދިރާސާކުރާ މީހުން މިހެން ބުނީ އިނގިރޭސި ވިލާތުގައި ވިއްކަން ހުންނަ ޔޯގަޓްގެ ތެރެއިން 900 ވައްތަރެއްގެ ޔޯގަޓް ޓެސްޓްކުރުމަށް ފަހުގަ އެވެ. ދިރާސާއިން އެނގުނު ގޮތުގައި އޯގަނިކް ޔޯގަޓް ކަމަށް ބުނެ ވިއްކަން ހުންނަ ޔޯގަޓްގެ ބައެއް ބާވަތްތަކުގައި ވެސް އެކަށީގެންވާ ވަރަށް ވުރެ ގިނައިން ހަކުރު ހުއްޓެވެ.
ދިރާސާއަށް ފަހު ބުނީ ހެޔޮވަރު މިންވަރަކަށް، ހަކުރު މަދު ޔޯގަޓެއްގެ ގޮތުގައި ފެނުނީ ހަމައެކަނި ގްރީކް-ސްޓައިލް ޔޯގަޓް ކަމަށެވެ.
އިނގިރޭސި ވިލާތުގައި ހަކުރު ބޭނުންކުރާ މިންވަރު މަދުކުރުމަށް ސަރުކާރުން ފެށި މަސައްކަތާ އެކު މި ދިރާސާކުރީ އާންމުކޮށް ބޭނުންކުރާ ކާނާގެ ބާވަތްތަކުގެ ތެރެއިން ގިނައިން ހަކުރު ހުންނަ އެއްޗެހި ދެނެގަތުމަށެވެ. އެގޮތުން ޔޯގަޓަކީ ވަރަށް ގިނައިން ބޭނުންކުރާ އެއްޗަކަށް ވެފައި އެއީ ރައްކާތެރި އެއްޗެއްތޯ ގިނަ ބަޔަކު އައީ ސުވާލުކުރަމުންނެވެ.
ކުރިން ވެސް ހީކުރެވުނު ގޮތަށް، ޔޯގަޓް ޑިޒަޓްތަކުގައި ހަކުރު ގިނަ އެވެ. އެގޮތުން ކޮންމެ 100 ގްރާމެއްގައި 16.4 ގްރާމްގެ ހަކުރު ހުރެ އެވެ. އަދި އޯގަނިކް ޔޯގަޓްތަކުން ވެސް ބައެއް އުފެއްދުންތަކުގައި 100 ގްރާމަށް 13.1 ގްރާމް ހަކުރު ހުންނަކަން ފާހަގަވި އެވެ.
ކުޑަކުދިންނަށް ހާއްސަކޮށް ހަދާފައި ހުންނަ ޔޯގަޓްގައި އާންމުކޮށް، 100 ގްރާމަކަށް 10.8 ގްރާމް ހަކުރު ހުންނަ ކަމަށް ދިރާސާއިން ދެއްކި އެވެ.
އިނގިރޭސި ވިލާތުގައި އިރުޝާދު ދީފައި އޮންނަނީ އުމުރުން 4-6 އަހަރުގެ ކުދިންނަށް ދުވާލަކު 19 ގްރާމަށް ވުރެ ގިނައިން ހަކުރު ނުދިނުމަށެވެ. އަދި 7-10 އަހަރާ ދެމެދުގެ ކުދިންނަށް 24 ގްރާމަށް ވުރެ ގިނައިން ނުދިނުމަށެވެ.
އިނގިރޭސި ވިލާތުގައި މިހާރު އަންނަނީ ކާނާ އާއި އެކި ބުއިންތަކުގައި ހަކުރު ހުންނަ މިންވަރު މަދުކޮށް، އެކަމަށް އާންމުން ހޭލުންތެރިކުރުވަމުންނެވެ. އަދި ހަކުރު އަޅާފައި ހުންނަ ބުއިންތަކުން ނަގާ ޓެކްސް ވެސް ވަނީ ބޮޑުކޮށްފަ އެވެ.