17 ސެޕްޓެމްބަރ 2018 - 12:09
އިސްލާމްއާބާދު (ސެޕްޓެމްބަރު 17) - ސިލްކް ރޯޑް ޕްރޮޖެކްޓްތަކާ މެދު ދެ ގައުމުގެ މެދުގައި ނުތަނަވަސްކަން އުފެދިފައި ވަނިކޮށް ތިން ދުވަހުގެ ދަތުރެއްގައި ޕާކިސްތާން ސިފައިންގެ ވެރިޔާ ޖެނެރަލް ގަމަރު ޖާވިދު ބަޖްވާ ޗައިނާ އަށް ވަޑައިގެންފި އެވެ.
މިއީ ޕާކިސްތާނުގައި އިމްރާން ޚާންގެ އާ ސަރުކާރު މިދިޔަ މަހު ގާއިމްކުރި ފަހުން ޗައިނާ އަށް ވަޑައިގަންނަވާ އެ ގައުމުގެ އެންމެ ސީނިއާ އޮފިޝަލެވެ.
ޗައިނާގެ ބެލްޓް އެންޑް ރޯޑް އިނިޝިއޭޓިވްގެ ދަށުން ޕާކިސްތާނުގެ ތަރައްގީ އަށް ހިންގާ ޗައިނާ-ޕާކިސްތާން އިކޮނޮމިކް ކޮރިޑޯ (ސީޕީއީސީ) ގެ މަޝްރޫއުތައް އަހަރެއްހާ ދުވަހަށް ހުއްޓާލަން ޖެހިދާނެ ކަމަށް ޕާކިސްތާނުގެ ކޮމާސް މިނިސްޓަރު އަބްދުލް ރައްޒާގު ދާއޫދު ދާދި ފަހުން ވަނީ ވިދާޅުވެފަ އެވެ. ސިލްކް ރޯޑް މަޝްރޫއުގެ ދަށުން ޕާކިސްތާނުގައި 60 ބިލިއަން ޑޮލަރު އިންވެސްޓް ކުރާނެ ކަމަށް ޗައިނާ އިން ވަނީ ބުނެފަ އެވެ.
ކޮމާސް މިނިސްޓަރު ދާއޫދު ވިދާޅުވީ ސީޕީއީސީގެ މަޝްރޫއުތައް ކުރީގެ ސަރުކާރުން ހިންގާފައި ވަނީ އެހާ އިންސާފުވެރި ގޮތުގައި ނޫން ކަމަށެވެ. އަދި އޭގެ ފައިދާ ބޮޑީ ޗައިނާ އަށް ކަމަށް އޭނާ ވިދާޅުވި އެވެ.
ޗައިނާ އިން ފަންޑްކުރާ ޕްރޮޖެކްޓަކާ ގުޅޭ ގޮތުން މަޝްވަރާ ކުރުމަށް އެ ގައުމުގެ ސްޓޭޓް ކައުންސެލާ އަދި ފޮރިން މިނިސްޓަރު ވަންގް ޔި މިދިޔަ ހަފުތާގައި ވަނީ ޕާކިސްތާނަށް ވަޑައިގެންފަ އެވެ.
ޕާކިސްތާން ސަރުކާރުން ބުރާސްފަތި ދުވަހު ބުނެފައި ވަނީ ސީޕީއީސީގެ މަޝްރޫއުތައް ހިންގަން ބޭނުން ވަނީ ސޯސިއޯ-އިކޮނޮމިކް ތަރައްގީ އަށް އިސްކަންދެވޭނެ ގޮތަކަށް ކަމަށެވެ.