15 ސެޕްޓެމްބަރ 2018 - 21:25
މި މަހުގެ 23 ގައި އޮންނަ ރިޔާސީ އިންތިހާބާ ދިމާކޮށް، ކަރެކްޝަނަލް ސާވިސްގެ ބައެއް ވެރިން އެކި ތަންތަނަށް ބަދަލު ކޮށްފި އެވެ.
ރާއްޖޭގެ ކުށްވެރިން ބަލަހައްޓާ މައި އިދާރާ އިން ބުނީ ކޮންމެ އިންތިހާބަކާ ދިމާކޮށް ޖަލުތައް ހަލަބޮލިކޮށް ހަމަނުޖެހުން ހިންގަން އުޅެފާނެތީ، އެއާ ދެކޮޅަށް ކޮންމެ ފަހަރަކު ވެސް ކަރެކްޝަންސް އިން ވަރަށް ބޮޑަށް ތައްޔާރުވާ ކަމަށެވެ. އެގޮތުން މިފަހަރުގެ ރިޔާސީ އިންތިހާބާ ގުޅޭ އޮޕަރޭޝަންގެ ކަންތައްތައް ސެންޓްރަލީ ކޮންޓްރޯލްކޮށް ބެލެހެއްޓުމަށް ބައެއް ވެރިން ބަދަލުކޮށްފައިވާ ކަމަށް ވެސް ކަރެކްޝަންސް އިން ބުންޏެވެ.
ކޮމިޝަނާ އޮފް ޕްރިޒަންސް އަހުމަދު ޝިހާން ގެންނެވި ބަދަލުތަކުގެ ތެރޭގައި މާލެ ޖަލުގެ ޑައިރެކްޓަ އޮފް ޕްރިޒަންގެ މަގާމަށް އެސްޕީ އިބްރާހިމް މުހައްމަދު ދީދީ އަދި މާފުށި ޖަލުގެ ޑައިރެކްޓާ އޮފް ޕްރިޒަންގެ މަގާމަށް ސީޕީއޯ އަހްމަދު ރިޒާ ވަނީ ހަމަޖައްސަވައިފަ އެވެ. އަދި ކަރެކްޝަންސްގެ ދެ ސުޕްރިންޓެންޑެންޓުން ކަމަށްވާ އެސްޕީ މޫސާ އަންވަރު އަދި އެސްޕީ މުހައްމަދު ޝާހީން އަލީ، ކަރެކްޝަންސްގެ ހެޑްކުއާޓަރުގައި މަސައްކަތް ކުރައްވާ ގޮތަށް ހަމަޖައްސަވާފައިވާ ކަމަށް ވެސް ކަރެކްޝަންސް އިން ބުންޏެވެ.
އެ އިދާރާއިން ބުނީ އެ ބަދަލުތަކާ ގުޅިގެން އަމުރު މައުރޫފު ހިންގުމަށް މަގުފަހިކުރުމުގެ ގޮތުން ބައެއް އިތުރު ބަދަލުތައް ވެސް ވަނީ ގެނެސްފައިވާ ކަމަށެވެ. ނަމަވެސް އޭގެ ތަފުސީލެއް ހާމައެއް ނުކުރެ އެވެ.