15 ސެޕްޓެމްބަރ 2018 - 08:34
ސާފް ސުޒުކީ ކަޕްގެ ފައިނަލުގައި މިއަދު އިންޑިއާގެ 23 އަހަރުން ދަށުގެ ޓީމާ ދެކޮޅަށް ނުކުންނައިރު މިއީ ރާއްޖެ އަށް ތަށި ހޯދަން ލިބޭ ރަނުގެ ފުރުސަތެއް ކަމަށް ޓީމުގެ ކެޕްޓަން އަކްރަމް އަބްދުލް ގަނީ (އަކޫ) ބުނެފި އެވެ.
ރާއްޖެ އެންމެ ފަހުން ފައިނަލުގައި ކުޅުނީ މީގެ ނުވަ އަހަރު ކުރިން 2009 ވަނަ އަހަރު ބަންގްލަދޭޝްގައި އޮތް މުބާރާތުގަ އެވެ. އެ ފަހަރު ރާއްޖެ ބަލިވީ ފައިނަލުގައި އިންޑިއާގެ 23 އަހަރުން ދަށުގެ ޓީމު އަތުން ޕެނަލްޓީ ޖަހައިގެންނެވެ. އެ ފަަހަރު ގްރޫޕް ސްޓޭޖުގައި ރާއްޖޭން އިންޑިއާ އަތުން 2-0 އިން މޮޅުވި އެވެ. މި ފަހަރުގެ ގްރޫޕް ސްޓޭޖުގައި ރާއްޖެ ވަނީ އިންޑިއާ އަތުން 2-0 އިން ބަލިވެފަ އެވެ.
ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި އަކްރަމް ބުނީ ނުވަ އަހަރުގެ އިންތިޒާރަށް ނިމުމެއް ގެނެސް ތަށި ހިފައިގެން އެނބުރި ގައުމަށްދާން ބޭނުންވާ ކަމަށެވެ.
"އެންމެނަށް ވެސް އެނގޭ ގްރޫޕް ސްޓޭޖްގައި އަހަރެމެން ދިޔައީ ބޭނުންވާ ގޮތަކަށް ނޫން ކަން. އެކަމަކު އެންމެ ފަހުން ބުރަކޮށް ކުރި މަސައްކަތުން އަހަރެމެން މިތިބީ ފައިނަލުގައި. މިއީ ނުވަ އަހަރު ތެރޭގައި އަހަރެމެން ކުޅޭނެ ފުރަތަމަ ފައިނަލް. އިންޝާﷲ މިއީ ލިބޭނެ އެންމެ ރަނގަޅު ފުރުސަތު. އަހަރެމެން ގައުމަށް ޓަކައި އެންމެ ފަހު ވަގުތަށް މަސައްކަތްކުރާނަން،" އަކްރަމް ބުންޏެވެ.
އިންޑިއާ އިން ވަނީ ރާއްޖެ އަތުން އެންމެ ފަހުން ކުޅުނު ފަސް މެޗުން ވެސް މޮޅުވެފަ އެވެ. އިންޑިއާ އަތުން ރާއްޖެ އެންމެ ފަހުން މޮޅުވީ ނުވަ އަަހަރު ކުރިންނެވެ. އިއްޔެގެ ނޫސްވެރިންގެ ބައްދަލުވުމަށް ފަހު އަކްރަމް "މިހާރަ"ށް ބުނީ މި ފަހަރަކީ އިންޑިއާ ބަލިކުރާ ފަހަރަށް ހަދަން ބޭނުންވާ ކަމަށެވެ.
"އިންޝާﷲ މި ފަހަރު އެކަމަށް ނިމުމެއް ގެންނާނަން. މިއީ ކާމިޔާބު ހޯދަން ލިބޭ ރަނުގެ ފުރުސަތެއް. ވަރަށް ރަނގަޅަށް ޓީމު އޮތީ ތައްޔާރަށް،" އަކްރަމް ބުންޏެވެ.
ވޯލްޑް ކަޕް ކޮލިފައިންގައި 2015 ވަނަ އަހަރު އޮކްޓޫބަރު މަހު ގަތަރާ އެކު ކުޅުނު މެޗަށް ފަހު އަކްރަމް އަށް ގައުމީ ޓީމުން ފުރުސަތު ލިބުނީ ދެ އަހަރެއްހާ ދުވަސް ފަހުން މިދިޔަ ޖޫން މަހުގަ އެވެ. އެންމެ ފަހުން އިންޑިއާގައި އޮތް ސާފް ސުޒުކީ ކަޕްގައި އަކްރަމް ނުކުޅެ އެވެ. އެކަމަކު އޭނާ އަކީ 2008 ވަނަ އަހަރު މުބާރާތް ކާމިޔާބުކުރި ޓީމުގެ ކުޅުންތެރިއެކެވެ. އަދި 2009 ވަނަ އަހަރުގެ ފައިނަލުގައި ކުޅުނު ޓީމުގައި ވެސް އަކުރަމް ހިމެނެ އެވެ.
ރާއްޖޭން 2008 ވަނަ އަހަރުގެ ސާފް ތަށި އުފުލާލީ އަކްރަމްގެ ބޭބެ އައްސަދު އަބްދުލް ގަނީގެ ކެޕްޓަންކަމުގަ އެވެ. އަކްރަމްގެ އަމާޒަކީ ބޭބެ ހޯދި ފަދަ ކާމިޔާބެއް ހޯދުމެވެ.
ސާފްގެ ފައިނަލުގައި ރާއްޖެ އާއި އިންޑިއާގެ 23 އަހަރުން ދަށުގެ ޓީމު ކުޅޭ މެޗު ފަށާނީ ރާއްޖެ ގަޑިން އިރުއޮއްސި 6 ޖަހާއިރު އެވެ.